Понедельник, октября 18, 2021
Важное

Умарьковонь 1-це чистэ саезь ушодовсь Велень хозяйствань вишка сёрмадстомась. Сон карми молеме 2021 иень умарьковонь 30-це чис. Тень коряс Мордовиястатсо ютась промкс.
Сонзэ ветясть Мордовиястатонь прявтось И.В. Парамонова, МР-нь Велень хозяйствань ды продовольствиянь министрань полавтыцясь И.П. Учайкин ды велень хозяйствань ды пертьпельксэнь статистикань отделэнь прявтось В.М. Стукалова. Сынь ёвтнесть, кода карми молеме сёрмадстомась.

Кода пачтясь И.В. Парамонова, велень хозяйствань вишка сёрмадстомась ютавтови ансяк велетнесэ, косо кирдить хозяйстват. Лемть ды адрест кияк вешеме а карми, киненьгак лиянень ловоматне а пачтявить. Секскак пелемс теде а эряви.

Сёрмадстомо кармить 366 ломанть. Весе сынь тонавтозь. Конёв лангс ней кияк а карми сёрмалеме, сеске тешкстыть электронной планшетс. Мезе парось, сёрмадстыцятне кармить теке жо велень ломанть. Неть эли школань тонавтыцят, эли библиотекарть. Сынь сеске содавить. Лангсост карми валдо-пиже оршамопель ды кепка, конатнесэ ашти СХМП-2021 тешксэсь. Ломантне кармить медицинань маскасо, мартост – удостоверения ды паспорт. Ламот эйстэст уш содасызь сёрмадстомань тевенть, икеле иетнестэ важодсть. Сыненст пандови 18 тёжат целковойть зарплата.

Сёрмадстыцятненень сави ламо важодемс. Эрьвась эйстэст юты малав 480 таркат. Чизэнзэ мереви ютамс личной подсобной 16 хозяйстват. Республикасо эряви ванномс велень хозяйствань 255 организацият, 500 КФХ-т, 175 тёжат личной подсобной хозяйстват, 652 садонь-пирень вейсэндявкст. Сёрмадстомань васенце чистэнть уш кевкстнезь 6687 хозяйстват.

– Сёрмадстомась ансяк ушодовсь. Кемтяно, сон юты лезэвстэ, ломантне ёвтнить мезе трить, кастыть ды кирдить. Васенце цётамотне кармить 2021 иенть прядовомсто, меельце ловоматне яволявтовить 2022 иенть прядовомсто, – кортась Мордовиястатонь прявтось И.В. Парамонова.

Вишка сёрмадстомась невтьсы, кодамо Российской Федерациясо велень хозяйствась. Кевкстематнеде ней аволь истя ламо, кода ульнесь 2016 иестэ ютавтозь сёрмадстомасонть. Ломантнень кевкстнесызь, зяро модаст, мезе кастыть паксясо ды пиресэ. Зяро ды кодат ракшат ды кудонь нармунть кирдить.
Татьяна Маторкина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».