…Отяжелестэ ардомсто Трокскужос совамсто сельмс каяты «сырнестэ» крёстось. Велень умонь эрицятнень валост коряс, сон путозь-аравтозь веленть, сонзэ эрицятнень, паксясо касовкстнэнь ванстомга.

– Крёстонть путомо-стявтомо пурнавкшность веленек, – ёвтни «МАПО «Восток» предприятиянь прявт агрономось Н.И.Слугин. – Эрицятнень мельспарос, крёстонь путомасонть покш таликаст, нама, минек хозяйствань прявтонть Александр Владимирович Трошинэнь, Ромодановань райононь «МАПО и К» велень хозяйствань предприятиянь прявтонть Н.В.Ютяевень, кона эйкакшпоранзо ютавтызе ды обуцянзо кемекстызе Трокскужосо.

Тесэ, Трокскужосо, ашти «МАПО «Восток» велень хозяйствань предприятиянь 3№ скалонь фермась. Сонзэ прявтсо В.М.Колдаев.
– Те фермась – минек велень хозяйствань предприятиянть мельспарозо, – ёвтни Валерий Митрофанович. – Ташто, каладозь кардосто теинек неень шкань вешематнень коряс кардо, косо ашти од оборудования, молокопровод. Икеле киякстнэ ацазельть лазсо. Летькеденть сынь куроксто наксадыльть, савкшнось эрьва иестэ полавтнемс. Ней кардонь кияксось вельтязь бетонсо, конань лангс путозь резина.

3 № фермань прявтонть В.М.Колдаевень валонзо коряс, кардосонть кирдевить 223 потявтовиця скалт. Сынст мельга оймень путозь якить потявтыцятне Татьяна Ширкаева, Наталья Алякина, Оксана Бурмистрова, Надежда Станкина. Сынь важодить кавто сменасо. Васенцесь ушодови 17 чассто 30 минутасто ды чинть прядовомс, омбоцесь – валске 5 чассто 30 минутасто ды обед шкас. Эрьва потявтомадо мейле скалтнэнь ливтьсызь, кода мерить, стадасо якамо. Ракшатне свал ванькст ды парсте андозь. Теньсэ, нама, покш таликаст ваныцятнень Дмитрий Поляковонь ды Иван Азоркинэнь.
Течи фермасонть эрьва скалсто чистэ потявтневи 16 литрат ловсо. Отяжелень ловсонь заводов ильтяви 3,5 тёжат тоннат. Теске жо, фермасонть, онкстави ловсонть оевчизэ.
В.М.Колдаев чачсь 1963 иестэ Атемарень райононь Атемарь велесэ. 1980 иестэ Морд. Козловкань средней школанть прядомадо мейле саизь служамо армияв.

– 1983 иестэ карминь тонавтнеме Н.П.Огарёв лемсэ МГУ-нь велень хозяйствань факультетсэ, – ледстни Валерий Митрофанович. – Кочкия зоотехникень тевенть. Ды овсе а янксян. Тевесь тень вечкеви.
Университетэнть прядомадо мейле В.М.Колдаев зоотехникень тевенть ламо иеть топавтсь Чаунзань райононь «50 лет ВЛКСМ» велень хозяйствань предприятиясо. Сон аволь ансяк покш мель явсь хозяйствань скалтнэнень, истя жо лездась Апраксина велень сеть эрицятненень, кить эсь кардазсо кирдсть ракшат.
– Мон Ламбаське велесэ эрян 1988 иестэ саезь, – ёвтни В.М.Колдаев. – Тесэ эрицятне пек вадрят, седеймарицят, вейке-вейкенень лездыцят, трудонь вечкицят.

Мелят «МАПО «Восток» велень хозяйствань предприятиянь животноводтнэ важодсть виевстэ. Иезэнзэ эрьва скалсто потявтозель малав 5 тёжат килограммат ловсо. Тедеде скалонь потявтыцятне арсить скалсто потявтомс седе ламо. Тень туртов тесэ ули весемесь. Хозяйствасонть покш мель явови ракшатненень коромонь анокстамонтень. Тедеде тесэ арсить эрьва скалс анокстамс малав 38 центнерт кормовой единицат.
3 № фермасонть ули кормоцех, кона строязь хозяйстванть ярмаконзо лангс. Текенень, строязь силосонь туртов од ямат.
Тешкстасынек, фермасонть парсте тевест топавтыть зоотехникесь М.О.Луговов, ветеринарной врачось Д.В.Казаков, осеменаторось Наталья Тимошкина.
– Сынь монь кеме нежень, – тешксты фермань прявтось Валерий Митрофанович. – Важодить тевень содазь. Мезесь сыненст а чарькодеви – нолдасызь компьютерэнть, «совить» Интернетс, ды весемесь тееви вадрясто.
– Мон ванан сень мельга: зяро ды ков ильтяви фермасто ловсось, – ёвтни Л.П.Полякова учётчицась. – Те тевенть топавтан уш умок. Ловсонть ильтятано Отяжелень ловсонь заводов. Кисэнзэ тосто сакшны автомашина.
3 № скалонь фермасонть ташто кардотнень одс витнемась-петнемась эзь прядово. Сон поладови.
– Арсян, тедеде омбоце кардонтькак витнесынек, – видькстась В.М.Колдаев. – Тесэ тевтне виевстэ молить.
Апак кавтолдо мертяно: мезе арсесть теемс «МАПО «Восток» велень хозяйствань предприятиясо, сень тейсызь.

Пётр ЗИНОВЬЕВ. Эдуард Ретунский.
Отяжелень район