Апрелень 29-це чистэ А.С. Пушкин лемсэ Раськень библиотекасо ютась музыкально-литературной чокшне, конась алтавсь специальной военной операциянь боецтнэнь ды ветерантнэнь туртов.
«Мы вернемся живыми» мероприятиянть лувсо СВО-нь ветеранось ды фронтонь врачось Кирилл Левкин евтнесь инжетненень эсь эрямодонзо ды аволь шожда важодемадонзо.
Весе содатано, неень шкане обществасонть пек стака истямо ломантеме, кие вансты шумбрачинть ды иди эрямот – медицинань важодицятнень тевтеемаст пек покш. Минь тонадынек сынст неемс больницянь валдо кабинеттнэсэ ды коридорсо, ансяк масторонть туртов стака шкатнестэ медиктне лавтовдо лавтовс аштить минек боецтнэнь марто. Сынь истя жо бороцить ломантнень эрямост кисэ, идить куломадонть. Фронтовой врачтне важодить госпитальсэ, улить истяткак, кить чинек-венек топавтыть а шожда тевест тюремань паксятнесэ. Сынст ютксо специальной военной операциянь ветеранось, «Герои среди СВОих» региональной программань финалистэсь, С.В. Катков лемсэ Республиканской клинической больницянь реаниматологось-анестезиологось ды фронтовой врачось Кирилл Левкин.
Кирилл Иванович чачсь-кассь Мордовиясо, эйкакш пингезэ ютась Северсэ. Школань прядомадо мейле церась а кувать арсесь, ков моли тонавтнеме. Сон кочкизе тиринь Мордовиянь Н.П. Огарев лемсэ МГУ-нь медицинской факультетэнть. Мекс жо церась явсь мель медицинантень? Те кевкстеманть лангс Кирилл Иванович тешкстась, тетязо пингензэ перть топавты врачонь тевенть, авазо – тонавтыця. Тетязо свал аштесь церанть туртов вадря невтемакс, сон нейгак важоди поликлиникасо хирургокс.
– Кие-бути бажась улемс космонавтокс, полицейскоекс ды музыкантокс, мон жо явинь мель медицинантень. Ледстявить шкатне, зярдо вишкинестэ ванылинь тетянь лангс – свал ашо халатсо, кеме обуця, мездеяк а пелиця ды ломанень эрямонь идиця, теке евксонь мараля. Эште эйкакш пингестэ максынь эстень вал – карман врачокс. Эрямосонть истя лисськак, – тешксты Кирилл Иванович.
Эряви меремс, Кирилл Левкинэнь важодемань кизэ ушодовсь ковидэнь кезовонь шкатнестэ. Церась важодсь якстере зонасонть. Седе тов ушодовсь специальной военной операциясь. Кирилл Иванович эзь служа срочной служба, ансяк кода марясь, СВО-нь таркатнес эрявить медицинань важодицят, сеске сермадстызе прянзо эсест олясо молицятнень юткс, седе тов тешкстась контракт. Специальной военной операциянь таркатнес васенце командировказо ульнесь 2022 иень августонь меельце читнестэ.
– Цератнень марто якинек Мариуполь ошов. Зярдо мон васенцеде неинь яжазь таркатнень, арсезевинь: «Те ошось аштесь кумажа лангсо, ансяк ятонть туртов ялатеке эзь изняво…» Эрицятнеде эрьвась – алкуксонь герой. Ламо важодинь кода военнойтнень, истя мирной эрицятнень марто. Лецинь ломанть, конатне ламо шка эрясть подвалсо, ковонь перть апак шлякшно, сынст сельмесэ ульнесь талнома, конань таркас шкань ютазь сась кеняркс. Ней сынст олякстомтызь, Россиянь солдаттнэ идизь нацизмадонть, – евтни фронтовой врачось.
Кирилл Левкинэнь ульнесь кевейкее командировка СВО-нь таркатнес, тов сон ардтни кода фронтовой врач ды добровольческой отрядонь солдат. Неень шкане Кирилл Иванович служи В.Ф. Маргелов лемсэ «Барс-33» добровольческой отрядсо медицинской взводонь командирэкс. Те отрядсонть улемстэ церась кандсь службанть аволь ансяк кода фронтовой врач, сонензэ максозель автоматось ды весе эрявикс обмундированиясь. Тюремань паксятнесэ улемстэ арась шка явшемс ломантнень врач ды солдат лангс, тосо эрьвась – масторонь идиця ды сэтьмечинь кисэ аштиця.
Башка мель кортамосонзо СВО-нь участникесь явсь алкуксонь ялгаксчиденть евтнемантень.
– Неть иетнень перть кеме ояксчинь сюлмот кирдян Одессань, Днепрань, Донецкоень, Киевень, Дальней Востоконь ды Уралонь ломантнень марто. Весе минь тейтяно вейке покш тев – идетяно Тиринь масторонть. Истя жо СВО-нь таркатнесэ улемстэ карминь содамо, кодат эрсить алкуксонь ялгатне – ломантне, конатне апак кавтолдо макссызь тонь кисэ эсест эрямост, – корты Кирилл Иванович.
Мероприятиянь омбоце пельксэсь алтазель музыкально-лирической композициятнень кунсоломантень. Н.П. Огарев лемсэ МГУ-нь филологиянь факультетэнь тонавтыцясь, поэтэсь ды музыкантось Николай Карпов казсь инжетнень туртов моронь од альбом. Кода тешксты церась, те альбомось алтазь СВО-нь ветерантнэнь ды боецтнэнь туртов. Эйзэнзэ совить кавксо морот, конатне сермадозь специальной военной операциянь участникенть, фронтовой сермадыцянть Дмитрий Филипповонь стихензэ лангс. Весе моротне военно-патриотической смусть марто.
– Монь койсэ, Дмитрий Филиппов – содавикс сермадыця. Сонзэ произведениятне, стихтне – седей токицят, домкат, смустевть. Шкинеманзо марто теевинь содавиксэкс, зярдо васенцеде ловныя «Собиратели тишины» романонзо. Ежось ловномадонть мейле а евтавикс. Кармавтан эрьванть ловномо те произведениянть. Мейле карминь содамо, Дмитриень лиссь «Мы вернемся живыми» стихень васенце пусмозо. Зярдо ловныя те книганть, чачсь мель сермадомс неть стихтнень лангс музыка. Истя лисськак моронь те альбомось. Монень зярс эзь савкшново вастовомс поэтэнть марто, ансяк арсян, Дмитрий Филиппов а моли каршо, бути марясы, кода сонзэ шкинемазо гайги сцена лангсто, – тешксты Николай Карпов.
Аламошка евтнетяно специальной военной операциянь участникенть ды фронтовой сермадыцянть Дмитрий Филипповонь ланга. Церась чачсь-кассь Санкт-Петербургсо, тонавтнесь А.С. Пушкин лемсэ Ленинградонь университетэнь филологиянь факультетсэ, седе тов – Курской областень университетсэ. Служась Чечнясо, ульнесь саперокс. Армиядо мейле вете иеть важодсь Санкт-Петербургонь Пушкинской райононь администрациясо, ветясь од ломанень политикань коряс отдел. Сермадыцянть лиссть «Я – русский» (2015), «Три времени одиночества» ды лия книганзо.
Кода ушодовсь специальной военной операциясь, Дмитрий Филиппов васенцетнень ютксо тусь Тиринь масторонть ванстомо. Юткошкасто церась сермады. Те тевенть лови ежонь витемакс.
Эряви евтамс, Дмитрий аволь ськамонзо тусь семиястонть СВО-нь таркатнес, сондензэ башка тосо тиринь ялаксозояк.
Алена Артемьева
Фототне авторонть.