Тиринь масторонь Героень кенярксчиденть икеле Беряньстэ неицятнень туртов Мордовиянь республиканской специальной библиотекасонть ютавтовсь «Наши земляки – России славные сыны» патриотической чокшнесь.

Библиотекань важодицятне ёвтнесть минек Тиринь масторонть историядо, геройтнеде, конатне тейсть ине подвиг аволь ансяк специальной военной операциянь шкасто, наградатнеде, конатне максовсть масторонть лезэс покш тевтнень кисэ, ды истя жо Мордовиясо чачозтнеде Давид Малыйкиндэ ды Григорий Слугиндэ, конатненень максозь «Россиянь Герой» лемесь.

Мероприятиянь инжекс кармась Кирилл Иванович Лёвкин – специальной военной операциянь участникесь, боевой тевтнень ветеранось, военной медикесь. Минек шкасто ламо кортыть СВО-нь тевтнеде, седе питнеесь жо – марямс кулятнень сетнень пельде, кие неизе весементь эсь сельмесэ. Кирилл Иванович ёвтнесь эсь важодемадонть, минек воинтнэде, конатне, апелемачинть ды героизманть невтезь, ванстыть Тиринь масторонть, сеть ёжомарямотнеде, конатне эрсить, зярдо боецтнэнень сыть лембе вал марто сёрмат ды кулят тиринь кудосто малавиксэст ды овсе а содавикс ломантнень пельде.
Чокшненть мазылгавтызь Л.Воинов лемсэ 4 № Эйкакшонь музыкальной школань тонавтницятне, конатне казсть Тиринь масторонтень алтазь морот.