Июнень 1-це чистэ – Эйкакшонь ванстомань чистэ, А.С. Пушкин лемсэ библиотеканть вакссо гайгсь музыка, эйкакштне киштсть, налксесть, пелькстасть эрьва кодамо пелькстамосо, артсть асфальтонть лангсо. Тей сынь тердевсть аволь стяко. Библиотекасонть панжовсь «Ташто тумонь евкст» лементь ало эйкакшонь культурно-просветительской центра.

– Те центрась – васенце минек республикасо. Сон алтави ловномантень, налксематненень, пелькстамотненень, эрьва кодамо темань коряс кенярксчинь ютавтомантень. Эйдетне тердевить сехте вишкинестэ саезь ды 14 иес. Минь явинек нупальсэнек башка ужинеть: ули «Тамашань вирь», косо теезь цюдань тумо, нейтядо, лангсонзо касыть сэряткак. Вальматнесэ аштить артозь Вирява ды Ведява. Ули «Поляна приключений» – те сцена-подиум вастовоматнень ды мастер-класстнэнь ютавтоманть туртов. Мебеленек покшолгавтови ды вишкалгавтови. «Семейный дворик» таркась алтави сехте вишкатненень, тесэ учить аватнень ды эйдинест. Нама, улить минек эрзянь ды мокшонь раськень оршамопельтькак, сынст мереви оршамс. Эрьва зонасонть ули эйкакшонь литература, книгат беряньстэ неиця эйкакштненень, – кортась эйкакшонь культурно-просветительской центрань прявтось Наталья Губанищева.

«Ташто тумонь евкст» центранть панжомо сакшность МР-нь культурань, раськень политикань ды архивень тевень министрась Светлана Баулина, МР-нь Эйкакштнень праваст коряс уполномоченноесь Наталья Юткина.

– Тедеде республикасонок панжовить эште 12 истят центрат. Сынь кармить важодеме Культурань кудотнень, музейтнень эли библиотекатнень юрсо. Кадык неть куншкакуротне эйкакштнень туртов кармить вечкевикс ды эрявикс таркакс, косо мельспаросо ютавтсызь оймсема шкаст. Течинь чистэ саезь ушоды важодеме «Детский отдых в музее и библиотеке» од проектэнек, – кортась Светлана Баулина.

Истя жо те вастовомантень сакшность ламо эйкакшонь триця семиятне. Никишинтнэнь семиясо кавто церынеть ды кавто тейтернеть, ней учить ветеце. Лукашовтнень семиясо кото эйкакшт: вете церынеть ды вейке тейтерне. Сынст валост коряс, эйдест пек вечкить ловномо Антуан де Сент-Экзюперинь «Маленький принц» ды В. Драгунскиень «Денискины рассказы» книгатнень.

«Ташто тумонь евкст» эйкакшонь культурно-просветительской центрась панжовсь «Семья» национальной проектэнь «Семейные ценности и инфраструктура культуры» федеральной проектэнть юрсо Российской государственной библиотеканть лездамонзо вельде.

Татьяна Маторкина