Четверг, мая 06, 2021
Важное

Эрьва иень чадыковонь 6-це чистэ тешкстави Россиянь МВД-нь предварительной следствиянь органтнэнь теевемань чись. Сон ловови Внутренней тевень министерствань следовательтнень профессиональной кенярксчикс. Системасонть важодить ламо ёроков, эсь тевень парсте содыця вадря специалистт. Аволь аламо ютксост тейтерь-ават.
Вейкесь эйстэст – Мордовия Республикава Россиянь МВД-нь Следственной управлениянь организационно-зональной отделэнь прявт тевтнень коряс старшей следователесь, юстициянь майорось Светлана Александровна Петрова.

Неть читнестэ минь вастовинек Светлана Александровна марто ды сон ёвтнесь профессиянтень эсь самодонть, панжинзе важодемань явовтыця ёнкстнэнь ды салавачитнень.

Светлана Петрова чачсь-кассь Кочкурбуень Рузонь Давыдова велесэ, школанть жо прядызе шабра Мордовской Давыдовасо. Эштё вишка класстнэсэ тонавтнемстэ тейтересь содась, школадо мейле эсь тевекс кочкасы юридической ёнксонть. Васняяк арсесь молеме тонавтнеме эсенек университетэнь юридической факультетэв. Ансяк вана шкань ютазь неть мельтнень колынзе лелязо, кона роботась внутренней тевень органтнэсэ. Инжекс самсто сон истя покш мельсэ ёвтниль эсь важодемадонть, Светланаяк арсизе кочкамс те кинть.

– Мольсть школасо тонавтнемань меельце иеть. Эрявсь уш парсте арсемс, ков молема седе тов тонавтнеме? – ёвтни Светлана Петрова. – Ванкшнынь юридической факультетэнть. А мейле превезэнь сась Россиянь МВД-нь Нижегородской академиясь. Истя жо юридической ёнксось, теке марто, кочкавт профессиясь ульнесь престижной. Ды документэнь максынь тов. Те ульнесь 2001 иесь. Академияв конкурсось пек покшоль. Ансяк минек Мордовиясто тов понгомс бажасть 28 ломанть. Весе экзаментнэнь ютызь кемнилеетне, конатнень юткс понгинь монгак. Эряви меремс, экзаментнэ а шождальть. Васняяк эрявсь ютамс шумбрачинь коряс, изнямс спортонь пелькстамотнень, эрявсь чиемс 3 вайгельпеть вирьга ды чувар ланга. Неть вайгельпетнень эрявсь чиемс нурька шкас, весе капшасть, эрьвась бажась кенеремс. Истя жо эрявсь максомс экзамент, конатнень юрсо ульнесь кевкстема Конституциянть содамга. Ансяк весемесь изнязель ды мон карминь студенткакс.

Тонавтнемань иетне ютасть, эзть марявояк. 2006 иестэ тейтересь направлениянь коряс велявтсь мекев Мордовияв ды эсь службанть поладызе тесэ. Васняяк важодсь следователекс Саранск ошонь Ленинской райононь ОВД-сэ, кавто иень ютазь аравтозель старшей следователекс Октябрьской райононь ОВД-сэ. 2009 иестэ Светлана Александровнань ютавтызь старшей следователекс МР-ва МВД-нь Следственной управленияс, косо роботы течинь чис.

– Васняяк покшоль мелем роботамс эйкакштнень марто, улемс ПДН-нь инспекторокс, – корты Светлана Петрова. – Мейле жо, зярдо кундынь следователень тевентень, чарькодинь – те монь. Те тевенть улить эсензэ башка ёнксонзо. Васняяк, тесэ ванновить уголовной тевть, конат сюлмавозь ломантнень марто, сынст уцяскаст ды мелявксост марто. Эрьва уголовной тевесь а моли кодамояк лия ёнов.

Светлана Александровна те шкас ледстни эсь васенце тевенть, конань лангсо роботась. Те ульнесь ломань лангс каявомань тев. Почтальонокс важодиця авась, кона сонськак уш пенсиясоль, кандтнесь кудова явшемс пенсият. Ярмактнеде кескавсонзо ульнесть байтяк. Вейке кудонь подъездсэ лангозонзо каявсь цёра ды нельгинзе ярмактнень.

– Аванть мелявксто ды сэредькстэ пешксе вановтозо те шкас ашти сельмень икеле. Сон сонськак уш аволь одоль ды кандтнесь сыре ломантнень пенсияст. Ды вана кодамо-бути, монь койсэ, аволь шумбра цёра каявсь лангозонзо. Нама, закононь колыцясь кундазель ды эсь тевенть кисэ чумондозель, – ёвтни старшей следователесь.
Светлана Петровань валонзо коряс, седе сеедьстэ савкшны ванномс бытовой ёнкс марто закононь коламотнень. Тесэ мирденть ды нинть ютксо аладямотне, эли жо общественной сэтьмечинть коламотне.

– Следователентень свалшкане ламо савкшны важодемс ломань марто, – ёвтни Светлана Александровна. – Лиссь кодамояк тев, муемат неицятнень ды кортама мартост, тевенть ваннома зыянс понгозенть ёндо ды теицянть ёндояк. Лиясто ломанесь закононть колы содазь, чарькодезь ды бажи весементь сёпомс. Лиясто жо мекевланк, тевесь лиссь апак арсе. Ды уш ломаненть марто кортамсто редясак, кие икелеть ашти. Чумочись шождасто редяви вановтонть коряс, прянь ветямонь коряс. Лиясто ломанесь эстензэ тарка а муи,талны ды уш чарькодеви, мезе-бути сёпи, а ёвты.

Следователень тевесь мелень явовтыця ды, теке марто, а шождаяк. Лиясто зыянонь тевтне лиснить ветькак. Мезе илязо уле, тонеть молема. Дежурстватнень кияк а полавтни. Ульнесь истямо тев. Дежурноенть пельде сась пачтямо, чаво кудосто муезь кулозь ломань, ансяк а содави, сонсь кулось эли чавизь. Следственно-оперативной группанть марто минь ардтано чаво кудонтень. Те ульнесь вень колмо чассто. Ушосонть сёксь, чопода, мезеяк а неят. Кудонть перька касыть куракшт ды циплик. Совинек кудонтень, свет арась, тарькс якшамо. Фонарьсэ валдомтынек кудо потмонть, рединек кулозенть, карминек ванкшномо кодаткак кедьёнкст, пильге чалгавкст. Мейле уш, зярдо ютавтозельть весе экспертизатне, карминек содамо, ломанесь морявсь а содавикс веществасо.

Кода тешксты Светлана Александровна, важодемань иетнень перть весементень тонадовсь. Ансяк неемс килангонь зыянсо чавовозтнень, зярдо сынст вакссо лайшить малавиксэст – пек стака те шкас. Истямонтень а тонадат.

– Светлана Александровна, явовить-арась эсь ютковаст цёрань-следователень тевтне авань-следователенсетнень эйстэ?

– Зыянов тевтне а эрсить цёрань эли авань. Васняяк – тон следователь. Тон – следственно-оперативной группанть прявтсо. Тон максат кармавтомат уголовной розыскень важодицянтень, участковой уполномоченноентень, экспертэнтень. Кортат ломантнень марто, штобу ванкшномс лисезенть. Тесэ кодаткак явовомат арасть.

– Мейстэ ушодови важодемань чись?

– Минек эрямос ней уш пек кеместэ совасть информационной технологиятне. Секскак, эрьва валске васенцекс ваннови электронной почтась. Эрьва важодицянть сон эсензэ. Тезэ кучовить весе документтнэ, конатнень ванномат. Эрьванть ули топавтома шказо. Истя жо ванновить уголовной тевтне ды материалтнэ. Весементь коряс пачтяви отделэнь прявтонтень.

Эрси истя, чинзэ перть важодят процессуальной документтнэнь лангсо, анокстат кевкстнемантень. Эдь бути тонеть сы ломань, эряви содамс тевенть, кодат максома кевкстемат. Лиясто чинзэ перть кортат колмо ды седе ламо ломань марто. Бути закононь колыця ломанесь а ливтеви, тевесь лоткавтови. Зярдо жо зыянонь теицясь ливтезь, весе эрявикс материалтнэ пурназь, чумондомань заключениясь тешкстазь, прявтонть марто весемесь кемекстазь, тевесь максови ванномс прокуратурас. Тосто уш кучови судс ды ваннови тосо.

– Светлана Александровна, кода тынк тевенть лангс ваны семиянк?

– Мирдем сонськак комсь иеть роботась внутренней тевень органтнэсэ. Истя жо васень шкасто ульнесь следователекс. Ды минек зярдояк арасельть кортамот, карман те тевсэнть важодеме эли арась. Мон кочкия те профессиянть, сон вечкеви тень ды мон сонзэ топавтан.
Минь кудосояк сеедьстэ кортатано важодемадонть. Лиясто кевкстнян сонзэ мелензэ-арсеманзо. Невтемга, мон тевенть неян ве ёндо, сон жо лиякс. Ёвты тень кодаткак од мельть, кунсолоса ды тевесь сырги. Эрси истяяк, валонок а ладить.

Зярдо жо сыргат тевс, тосо кияк мезеяк теть а ёвты. Тон – следственной группань прявт. Тон кирдят вал пурназь материалонть уличинзэ кис, закононь коламонь панжоманть кис. Весемеденть пачтят седе вере аштиця прявттнэнень. Тесэ весемесь ашти ансяк тонть эйстэ.
Вадря важодеманть кис Светлана Петрова ламоксть тешкстазь Шнамонь конёвсо ды Почётонь грамотасо. Аволь весть эсь содамочинзэ ды ёрокчинзэ невтекшнинзе ведомствань пелькстамотнесэ, конат алтавить кодамояк кенярксчинтень.

Кода тешксты сонсь тейтерь-авась, следователекс важодемань комсь иетнень перть ульнесь эрьва мезе, ансяк превскак зярдояк эзь сакшно полавтомс профессиянть.

Юлия Еремина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».