Тундонь неть читнестэ 70 иень юбилеензэ тешксты алкуксонь эрзянь цёрась, республикасонок ламонень парсте содавикс ломанесь, минек газетань умонь ды кемевикс оясь Александр Михайлович Живаев.
Александр Михайловичень чачома тарказо – Отяжеле ёнксонь Таразбуе велесь. Тетязо, Михаил Дмитриевич, шабра колхозонь прявтоль, авазо, Лидия Матвеевна, школасо тонавтыцяль.
Тешкстасынек, куш Саша покш сазорканзо Надя марто ульнесть «прявтонь» эйкакшокс, кассть тунь апак кольневте. Ды теемскак тень ульнесь а кинень ды а зярдо. Тетяст-аваст весе виест ды шкаст максыльть важодемазост, мартост эриця сырькаест-покштяст арасельть. Секс кудоютконь весе тевтне, пирень кочкамотне-валноматне, кудо ракшатнень-нармунтнень мельга якамось, меремс, весе ульнесь сазоронть-ялаксонть лангсо. Оршамосо-карсемасояк сынь эзть явново эсест шкань эйкакштнеде.
Школанзо прядомадо мейле Александр Живаев тонавтнесь Мордовиянь госуниверситетэнь велень хозяйствань факультетсэ. Агрономонь диплом марто сась важодеме Саранскоенть маласо совхозов. Сестэнь КПСС-нь XXV съезд лемсэ хозяйствасонть од цёранть вастызь учозь ломанекс – вельть парсте невтизе прянзо студентэкс практикатнень ютамсто. Од специалистэсь эзинзе маня учоматнень. А стяко уш колмо иень ютазь од агрономонть аравтызь васня эмежень цехень участкань прявтокс, седе тов – весе цехенть прявтокс. Эштё кавто-колмо иень ютазь, Живаев – совхозонь прявтонь полавтыцяль.
1991 иестэ те хозяйствастонть теплицатнень явомсто теезель лия, «Тепличный» лем ало од совхоз. Сонзэ прявтокс аравтызь А. М. Живаевень. Зярыя шкань ютазь совхозонтень максозель «Тепличное» Государственной унитарной предприятиянь лемесь. Меельце иетнестэ сон АО – акционерэнь вейсэндявкс. Вана те тевсэнть-таркасонть лакась-важодсь Александр Михайлович се шкастонть саезь ды мелень тунда оймсеме туемазонзо. Ды эштё кода важодсь! Эрьгатя, свал масторсонок тунь аволь шожда шкатнестэяк сонзэ кедь ало «Тепличноесь» ульнесь икеле молиця предприятиякс аволь ансяк Мордовиясо – Россиянть келес! Тень коряс прявтоськак содавиксэль масторонть келес.
Корреспондентэкс важодемстэнь ламоксть ульнинь «Тепличнойсэ». Эштё ловов, якшамо ды вармав ушосто парниктнес совазь, прят марясак лия мирс-масторс понгозекс. Ломанде сэрейстэ таргавозь нетькстнэнь лопаст юткова неявить куярнэть, лия пиже «стенанть» лангсо уш ожолгалить помидорат. Тесэ вана копёронь, пиже чурькань, лопань салатонь пандят. Маряви мекшень, промонь бизнэма…
Тесэ анокстазь эмежень пидевкстнэ, салтовкстнэ, банкава пештнезь, марявить, кудазораватнень теевкстнэде тантейть.
Лембелгадозь келей паксяст лангсо кармить кастомо модамарь, эрьва кодат эмежть. Мейле весе те пачтяви лавкатнес, лецямонь, тонавтнемань учреждениятнес, эйдень кужотнес, сыре ломанень кудотнес. Содасызь ды вечксызь тесэнь продукциянть Московсо, Нижнийсэ, Рязаньсэ, Екатеринбургсо, Челябасо.
Теке марто, аволь куватень шка тесэ улемстэяк, ве ёндонь варштавкссояк содавсь, кодат покш вийть савкшны путомс весе те покш хозяйстванть роботанзо, теке часонь механизмакс важодицякс, ладямонть. Нама, теньсэ весемеде покш таликазо прявтонть – А. М. Живаевень.
Эрямось тонавтызе Александр Михайловичень одсто кармамс эседензэ седе покштнень, умок важодицятнень туртов паро невтемакс, икелев ветицякс. Ансяк цёрась мельс сайсь сынст сюпав содамочисткак. Икеле молиця предприятиянь прявтось эзь лотксе тонавтнемадо: кирдсь кеме сюлмот масторонь эсест кондят хозяйствань прявттнэнь марто, ардтнесь семинаров. А лововияк, зяроксть ульнесь Голландиясо (ней мерить лемдямс Нидерландыкс). Неезенть, мельс туезенть ды эстест ладицянть эрямонь вешематнень чарькодиця прявтось сеске ушодыль топавтомо, тевс совавтомо.
Самай сестэ предприятиясонть суликань парниктнень кармасть полавтнеме макролонсо. Те шожда, нардев, пачк невтиця, лембень парсте кирдиця материал. Аравтозель ведень пек ванстыця байгень-байгень валномань системась. Рамсевсь кедьёнксонь полавтыця ды шождалгавтыця оборудования. Умок кастневиця эмежень сорттнэ полавтовсть одсо – седе паро урожаень максыцясо, ванстомс маштовицясо.
Сельмем сявадыль, кода тесэ пек мелявтсть ломантнеде. Ней уш кармасть стувтневеме шкатне (ды пек паро!), зярдо ошонь предприятиятнесэ яла иень перть кирдевиль важодемань кис пандомась. Тесэ вана аванскак макснильть. Зарплатась лия таркансетнень коряс мик кавксть седе покшоль. Предприятиянть ярмак лангс стявтовильть ламо этажонь ды башка азоронь кудот – шкань-шкань эрямонь таркавтомо майсицят мик а кадовкшныльть. Эрьва кенярксов чинтень – тантей ярсамопель марто пакетт, ламо урожаень саема шкастонть – вишка питнеде, эли тунь питневтеме явшить эсест кастозденть. Учневиль покш тев: эйкакшот свадьба, школань прядома, питней рамамо – пшкадть ярмаконь лезкс мельга. Саезенть велявтсак аламонь-аламонь, проценттэме. Эсест столовойсэ ярсамонть кисэ питнесь тунь вишкинель – сехте покш пельксэнзэ эсь лангозонзо саилизе предприятиясь. Важодеме ды одов ломантнень усксильть эсест автобустнэсэ, шумбрачист витсть-паролгавтсть эсест медсанчастьсэ. Питнень апак пандо ардтнильть маласо ды васоло санаторияв, яксильть туристэкс…
А. М. Живаев эсь шкасто ульнекшнесь Саранскоень ошонь Советэнь, мейле – МР-нь Госсобраниянь депутатокс. Сестэ, кода кортыть, сонсь Пазось мерсь лездамс кочкицятненень, топавтомс алтамотнень. Куш, видькстатано, «народонь слугатнестэ» тунь аволь весе истя теить. Ансяк Александр Михайлович – валонзо лангсо азор. Сестэ депутатонть вешеманзо коряс Озёрной посёлкав васенцеде кармась якамо автобус. Парсте витнезельть те посёлканть школась ды эйдень кужось… Кода эно?! Эдь тесэ эрить предприятиянь ламо важодицят, тестэ депутатокскак кочкизь. Сыненст – башка мель. Эно, апак стувтозельть лиятнеяк. Вана Химмашсо участкасонзо панжозель милициянь отделения. Тень кисэ депутатонть Сюкпрянь ёвтамонь марто конёвсо (Благодарностьсэ) казизе МР-нь МВД-сь. Сонзэ кармавтоманзо вельде паролгавтозельть ламо этажонь зярыя кудотнень перька таркатне, витнезельть латост…
Эно, депутатокс а улемстэнзэяк А. М. Живаевнень лезкс мельга пшкадицятнеде, кемемизь, монь содамгаяк а лововицят.
Газетанть лангс сёрмадстомань тевсэнть ламо иень перть сон лездась «Эрзянь правдантеньгак». Ды тешкстама, республикасонок лисиця весе изданиятне пшкалесть тензэ.
Нама, весенень а савтоват, весень туртов парокс а улят. Ялатеке, кеман, Александр Михайловичень «Тепличноень» прявтокс улемазо ламодояк ламо ломанень мельс кадови паро ёндо. Ды аволь ансяк мартонзо важодицятненень. Эряви тешкстамс сонзэ лездамонзо Таразбуе велень, Отяжеле ёнксонь вейсэнь тевсэст ды башка эрицятненень.
Свал тешкстылия: «Тепличнойсэ» улемстэ эрьва косо ламонь пельде марят эрзякс кортамо. Те секс, нать, важодицятнестэ пелест эрзят – састь А. М. Живаевнень, кода малавикс ломанест туртов, лезксэнь вешнемстэ. Сестэ, зярдо тенст эрявсь робота. Прявтось мейле покш мельспаросо ёвтнесь важодемань ёрокчидест.
Меремс, эрямом перть Александр Михайловичень содазь, монень сон маряви эрзянь раськенек пек редявикс пельксэкс, весе паро ёнксонзо невтицякс. Сэрей, чуморксов, вановтозо валдо, ламонь кортамо а вечкиця, сельмс а эциця. Теке марто, тевентень весе виензэ ды оймензэ путыця, максозь алтамонзо топавтыця, валонзо кирдиця. Эштё: малавиксэнзэ пек вечкиця, эйкакшонзо ды нуцьканзо кольневтиця. Седееть витеви кунсоломстонзо, истя мазыйстэ ды вечкезь, мельспаросо сон корты эрзякс!
Мерят, свал текень учнияк. Пейдезь ванылинь, кода эрзякс велявтсы кортамонть, зярдо тензэ рузокс пшкадиль эрзянь эли мокшонь ломань. Вант, тонаськак чоледезь чоледезеви.
Кода уш тешкстазель, топодсь ие, кода Александр Михайлович тусь оймсеме. Тень эйстэ мельспаросот весе малавиксэнзэ. Эдь сон важодсь оймсема шкань, чинь апак сода. Ней ули шказо налксемс нуцьканзо марто: Живаевтнень сындест, тейтерест Ленань ды цёраст Мишань пельде, мик вете. Седе сеедьстэ вастневи ламодояк ламо ялганзо марто. Ды мезть уш кортамс, те шкас кудоютконь тевсэ эзь кольневтне нинзэяк. Татьяна Михайловна образованиянь коряс химик-биолог, свал важодсь теке предприятиясонть. Оймсеме тусь биологиянь лабораториянь прявтонь таркастонть.
Эзь карма тошнакалеме сонсь Александр Михайловичкак. Эдь сон, кода моданть, пертьпельксэнть марто ояксчисэ эриця ды сынст пек вечкиця ломань, умок уш кадызе сэрей кудосо эрямо тарканзо, сэтьме ульцясо стявтсь эсест кудо, озавтсь мазый сад-пире. Окойники, ней ули шказо васькавтомс-кольневтемс сонзэ. Алкуксонь агрономось соды: телень шкастояк тосо тевтнеде певтеметь. Вечкеманзо кис модась панды сюпав урожайсэ – кастозест саты аволь ансяк семияст туртов, ламо явшить содавиксэст туртовгак. Содан, мирдесь-нись мурнесамизь тень кисэ, ялатеке ёвтаса. Лиянь пельде маринь: вана уш зярыя иеть сыре ломанень ковстонть, Татьяна Михайловна пурны аволь аламо канстт-кескавт. Эйзэст путы пиресэст кастозденть, эсензэ салтовкст, варения, компот марто банкат. Мейле весе тень пачтнесы сыре, аволь тунь шумбра, ськамост эриця ломань ланга.
Кудазоронь юбилеенть малавгалемстэ сась превс ловомс, зяро важоди ансяк сынст семияст, аволь раськест-буест, велень хозяйствань предприятиясо. Лиссь: топодсть сядо иеть. Пинге! Секс юбилеест лиссь кавонзазь. Поздоровтне, паронь арсематне, кенярксов тешкстамось – весемесь улезэ ламонькирда.
Александр Михайлович! Ёвтатано Тенк седейшкавань поздоровт юбилеенк топодеманть кувалма. Арсетяно Тенк ламо иес кеме шумбрачи, валдо уцяска эстенк ды малавиксэнк туртов.
Татьяна Рябова