Воскресенье, марта 03, 2024
Важное

Алтави А. Т. Куняевень чачома чистэнзэ 90 иетнень топодемантень

Те ломаненть эйстэ фотографиястояк моли потмоёжонь вий, неяви сонзэ кеме обуцязо, пек домка вановтозо ды паронь арсиця седеезэ. Кода ней кортыть, тевесь, паряк, «покш энергетикасонть», конасонть Александр Трофимович Куняев казезель Пазонть пельде. Кадык малав 30 иеть ютасть эрямостонть туемадонзо мейле, ялатеке те шкас сонзэ тейтерензэ туртов маряви: тетяст марто сюлминесь эзь керяво, эзь ёма. Сехте стака шкатнестэ, сехте ризнэвтиця минутатнестэ, зярдо мелявтовтыця кевкстематнень лангс а муевить каршо валт, сыненст маряви тетяст лездамозо ды тенст панжовить виде кить-янт.

Кортыть, истят виев ломанть эрямонтень Пазось кучни пек чуросто ды ансяк паро тевень тееме. Отяжелень райононь ломантне тень коряс пек уцяскавт. Те тосонь мода лангс 90 иеде теде икеле чачсь эрзянь цёрась Александр Трофимович Куняев. Тиринь Дюрькина велезэ 60-70 иетнестэ, зярдо Александр Трофимович роботась тосо колхозонь председателекс, гайгсь весе масторонть келес. М. И. Калинин лемсэ колхоздонть славась кассь-кепететсь иестэ иес, сонзэ содылизь Советской Союзонть келес ды натой казекшнизь В. И. Ленинэнь орденсэ. Колхозось дивавтсь весень урожайсэнзэ, конатне пачколесть 70 центнерс гектарстонть. Тесэ стявтовсть од кудот, школа, эйдень кужо, кафе. Плитасо ацазь китне сявадстовтсть ламонь сельметь. А оймавиця председателесь арсекшнесь натой велень ды райононь эрицятнень кудос газонь ветямодояк. Ды те ютазь пингень 70 иетнестэ, зярдо истямо уштомапельденть кияк эзь марсеяк, эзь арсеяк. Эсензэ колхозниктнень, велесэ эрицятнень кисэ Александр Трофимович Куняев мелявтсь теке вечкевикс эйдензэ кисэ. Ды те аволь стяконь валт, конатнесэ авторось бажи мазылгавтомс эсь статьянть. Школасо тонавтницятненень колхозось рамсиль формат, армияв туицятнень лемс банксо панжильть счётт, секскак од цёратне эзть арсеяк ношкстамс лия ёнов.

Дюрькинадонть се шкастонть кортыльть кода «вишка Швейцариядо». Истямо председателенть превейчинзэ, ёжовчинзэ ды опытэнзэ эрявсь тевс нолдамс райононть келес. Ды Куняевень тердизь покш таркас. Партиянь райкомонь васенце секретарекс ладямодо мейлеяк Александр Трофимович невтизе прянзо кода паро хозяйственник, домкасто арсиця прявт. Отяжелень районось 80-це иетнестэ вестькак эзизе срамавто лемензэ. Нейгак тосонь эрицятне ледстнить «Куняевень шкадонть», ды те валрисьмесь ней уш совась историяс. Сеедьстэ тосонь ломантне, роднянзо-раськензэ марто вастовомсто, мельспаросо кортыть А. Т. Куняевде, ды низэ Нина Михайловна свал бажиль ёвтамс «сюкпря» неть ледстнематнень кисэ.

Ялатеке монь ули мелем ёвтнемс те эрзянь ине цёрадонть, Социалистической Трудонь Геройденть, Сырнень Тештень, Ленинэнь колмо  ды Октябрьской Революциянь ордентнэнь кавалердэнть (икелень шкане неть казнетне кортасть ламодо) аволь ансяк кода содавикс политикте, райононь васенце секретарде, истя жо мирдеде, тетядо, покштядо, ялгадо. Кие, кода а низэ Нина Михайловна, ниле тейтерензэ – Валя, Вера, Анна ды Татьяна, содылизь те ломаненть весемеде пек, печтильть мартонзо весе мелявкстнэнь ды кеняркстнэнь.

Нина Михайловна Живаева нинзэ марто Александр Трофимович вастовсь тиринь велесэ, Дюрькинасо. Од тонавтыцясь сеске токизе Куняевень седеензэ. Тейтересь ульнесь шабра велень, Таразбуень. Живаевтнень покш, ялгаксчисэ эриця семиянть Александр Трофимович содылизе умок, ды шкань апак сатстне теевсь сынст содамокс. Ютксост вечкемась зярдояк эзь лепамкшно, вейсэ сынь ютызь весе апаротнень, стака шкатнень. Александр Трофимович теевсь алкуксонь тетякс Нина Михайловнань тейтерьканзо Валянь туртов ды те кевкстемась пекстазель пингеде-пингес. Улемс истямо покш ломанень никс – тевесь а шожда, ялатеке Нина Михайловна весементь чарькодиль: пелевес училь роботасто мирдензэ, эсь пачканзо ютавтылинзе весе мелявксонзо, ванстыль шумбрачинзэ, бажиль лездамс вечкевиксэнзэ туртов валсояк, тевсэяк. Кода кортыть, неть ломантне уш чачокшность вейкест-вейкест туртов, ды уцяскась эзь юта вакскаст, сюлминзе пек кеместэ. Александр Трофимович зярдояк эзь визде ёвтамс: весе сонзэ покш казнетнень кисэ эряви сюкпря ёвтамс нинзэ туртовгак.

Сехте уцяскавт сеть эйкакштне, конатне эйкакшпингест ютавтызь кудосо, косо эри вечкемась. Куняевтнень ниле тейтерест эйкакшпорадост ледстнильть кода сехте а стувтовиця, маней шкадост.

Вера Александровна, эйстэст омбоцесь, видьксты: «Те шкас минь сайтяно тосто вийть, ледстнематне кандыть тенек мельспаро, валдо мельть, ды те шкадонть вадря ёжомарямотне, арсян, кармить мартонок свал».

Чуросто тейтерькатне некшнесть тетяст кудосто чинь-паро куншкане. Сеедьстэ сон сакшныль, зярдо эйкакштне удыльть, ды туиль ашолгадома шкане. Ялатеке свал варштылинзе, кунсолылинзе, кода лексить-пувсить. Кенярксов вайгельде пешкедиль кудось, бути тетяст сыль седе рана. Вейкень-омбоцень икельдязь, тейтернетне снартнесть васенцекс чиемс кутмордамонзо, кирнявтнесть лангозонзо, токшесть, палсесть, вадяшасть. Колмонезэст (сестэ Таня эштё эзь чачокшно) сатыль тарка тетяст элесэ: кинь лавтов лангс озавтылизе, кинь кедьс саилизе, кинь кедьбеде ветилизе.

– Мон арсинь, весе ломантне истят, кодамо монь тетям: пек ванькс, лембе, домка ойме марто, – ёвтни Вера Александровна. – Сонзэ кондят ломантнеде яла кортыть, келя, сынь прок «лисьмапрят»: симат тантей ванькс ведтест ды аволь ансяк явавтсак симемат – саят пельдест вий, лезкс, парочи. Минек туртов тетям ульнесь Чипазокс. Истятнэнень, кода сон, стака эрямс масторлангсонть.

Веженсь тейтересь, Татьяна Александровна, чачсь сестэ, зярдо тетятненень-аватненень ульнесть уш 40 иеть. Нама, Александр Трофимович учось цёрыне, Куняевень фамилиянть поладыця, рузкс меремс, «наследник». Зярдо Нина Михайловна невтизе тензэ чачтома кудонь вальмасто Танянь, сон аволь ацирьгадсь – мекевлангт, бажась оймавтомс нинзэ лембе валсо: «Иля янксе, мон кавоненк вечктядызь». Ламо иень перть веженсь тейтерькинензэ туртов пеедькшнезь мернесь «Таня-цёрынем». Татьяна, ловт, кассь ськамонзо, эдь патятне сестэ уш тукшность ошов тонавтнеме, ды тетянзо-аванзо вечкемась целанек алтазель тензэ. «Мон зярдояк эзинь марсе тетянь пельде кежей валт. Бути мезень кис сёвнылимим, мон ялатеке неилинь сонзэ сельместэнзэ оймень лембечи ды мизолкст. Свал бажинь ёвтнемс тензэ эсень изнявкстнэде, эдь сон маштыль кисэст кенярдомо. Бажамс теемс эрямонь перть ансяк паро – те лувось совась монь ды патятнень обуцяс, – ледстни Татьяна Александровна. – Тетям зярдояк эйсэнек валсо эзь тонавто. Минь седейсэнек чарькодилинек, мезесь тензэ вечкеви, а мезенть кис сон бу мурневлимизь. Мон ледстнян вейке сонзэ валмеревксэнзэ: бути тон алтыть мезеяк ломанентень, свал кирдик эсь валот, илить маня кемеманзо. Те коенть сонсь кирдсь эрямонзо перть, ды минь, тейтерензэ, бажатано текеньс».

А мезть сёпомс, Куняевтне эйкакшост кастызь истя, а сави кисэст виздемс. Ниленест тейтертне высшей образования мартот: Анна  ды Татьяна – врачт, Анна – медицинань наукань доктор, профессор, лечебной тевень кафедрань прявт. Татьяна Куняева (сон кадызе тейтерьксэнь фамилиянзо) – медицинань наукань кандидат, ней важоди МРЦКБ-нь (республикань сехте покш больницясонть) прявт врачонь полавтыцякс, ПФО-нь главной терапевт.  Валя – экономистэль (сон тусь эрямостонть зярыя иеде икеле), Вера – англань келень тонавтыця, ульнесь Саранск ошонь 34-це школань завучокс. Паро койтнень, конатнес тонавтынзе тетяст, сынь бажить совавтомс эсь эйкакштнень ды нуцькаст эрямос. Покштядонть ледстнематне-арсематне истя кеместэ аштить сынст превсэ –  натой вейке нуцькинезэ Усанова Таня вишкинестэ сёрмадокшнось А. Т. Куняевде ёвкс-былина. Покштянзо сон неизе эрзянь ине богатырекс, конась пек вечкилизе тиринь моданть, ды корьмаесь пандсь тензэ сюпав сюросо.

Александр Трофимович Куняев эри аволь ансяк роднянзо-раськензэ седейсэ. Кода уш тешкстазель, лембе валсо ледстнить «Куняевень шкадонть» Отяжеле ёнксонь эрицятне. Те статьянть сёрмадомсто кевкстия вейке ломаненть, конась ютазь пингень 80-це иетнестэ важодсь Дюрькинасо: «Апак сёпо ёвтыка тень, кодамо ломанекс кадовсь Александр Трофимович тонь мельс?». Ды маринь истят каршо валт:

 – Алкуксонь ломанесь ульнесь, рузкс мон бу меревлинь, «простой, настоящий, старинный». Истят ней уш чуросто вастневить, сынь весе, нать, кадовсть ютазь пингентень. Мон сонзэ аволь сеедьстэ некшния, ансяк ламо иень ютазь вастымим ды пшкадсь тень лемсэ. Дивазевинь, вана те превть, те шкас эзизе стувто лемем. Эштё вейке ёнксонзо бу тешкставлия: сон зярдояк эзь покшкавтне. Ульнесь уш райкомонь прявт, ялатеке ве содавикс ломань вакска а ютыль апак пшкаде.

Истят мельть-арсемат Александр Трофимовичте эсь седейсэст кирдить Отяжеле ёнксонь лия эрицятнеяк. А уш Дюрькинань ломантненень сонсь Пазось мерсь ледстнемс Куняевень пингеде-пингес. Тиринь велензэ, тосонь эрицятнень, Александр Трофимович вечкилинзе сехте пек. Сон мерильгак тенст чевтестэ «Дюрькинат». Лемест-фамилияст содылинзе весень, натой вишка эйкакштненьгак. Пек ацирьгалиль, зярдо кияк невтилизе прянзо берянь ёндо. Яла кортыль: «Тетянзо-аванзо эдь вадря ломанть, мекс уш сон истямо лиссь?»

Теке марто Куняев лездыль аволь ансяк Дюрькинань эрицятненень – весе пшкадицятнень туртов, кадык сынь Таразбуень эли Сабанцелень. Кинень кором эрявкшнось, кинень трактор, кинень кодаяк муськема машина а рамави (сестэ те товарось ульнесь покш дефицитэкс) – весе энялдоматнень топавтылинзе ды эзь учо кисэст сюкпрянь валт. «Теить паро тев – ёртык ведьс» – те валмеревксэнть сон свал ледстнесь тейтерензэ туртов ды поладыль: «Эйстэнзэ мейле туить толкунт ды ломантне сынськак ушодыть тееме паро». Сон ульнесь Тонавтыцякс, икелев ветицякс, превень максыцякс ды покш авторитетэкс.

Александр Трофимовичень эрямонзо перть эзь полавтово обуцязо. Сонзэ эзизе «вите» покш таркасо аштемась, властесь. Эрьва ломаненть марто муиль кель-вал ды весень марто кортнесь истя, теке вастсь умонь ялга. Куняевень оянзо-ялганзо ютксо вастневсть кода велень эрицят, истя жо мирэнть-масторонть келес пек содавикс, покш ломанть. Народной академикесь Т. Мальцев ловсь эйсэнзэ цёранзо кондямокс, Кубань прявтось Фидель Кастро дивсесь те эрзянь цёранть виев рунгозонзо,  космонавтонть В. Шаталов марто эрьва вастовомась теевиль кенярксчикс. Содылизе Куняев Сергей Михалков поэтэнтькак.

Сон зярдояк а явиль ломантнень «покшокс» ды «вишкинекс», кортамо лувонзояк а полавтылизе, кода лиясто вечкить прявттнэ. Веенстнэнь вадяшить «чевте» вайгельнесэ, лиятнень – казямо, ёжонь апаркстомтыця «онгомасо». Вай, кода неень шкане стака вастомс истятнэнь, кадовсть-арась сынь масторлангсонть?

Эзь правто эрямонзо перть Александр Трофимович а сия, а сырне мельга, вечксь ансяк тиринь моданть ды лангсонзо трудий ломантнень. Сынь пандсть тензэ текеньсэ. Сетненень, кить арсесть тензэ берянь, зярдояк эзь пандо кежть. Арсян, те алкуксонь ломанень ёнкст, эдь кода сёрмадсь Сергей Есенин поэтэсь: «В бури,  в грозы, в житейскую стынь, в минуты, когда тебе грустно, казаться улыбчивым и простым – высшее в мире искусство!» Ансяк алкуксонь ломанекс улемс стака, эзь вансто Куняев эсь прянзо, ансяк мелявтсь лиядо, шумбрачись аштесь меельце таркасо. 60 иесэ сон тусь юткстонок…

Марина Девятова

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».