Масторлангсонть эрьва ломанентень сехте малавиксэкс ульнесь ды кадови авазо. Сонензэ минь чийтяно, зярдо тенек стака, капшатано тензэ панжомс потмонок, учотано пельдензэ оймавтомань, седеень эждиця валт. Минсь жо а свал мелявттано седе, кодамо ёжомарямосо ашти аванок, мезде арси-мелявты. Лиясто апак фатя коласынек ёжонзо ды тунь теде а янксетяно. Эдь авань седеесь весе цидярдсы, чарькодьсы...
Вишка порань ледстнемастон кадовсть ансяк валдо, маней арсемат. Валске марто сеедьстэ сыргозтилимим прякань тантей чине. Авам кенярдовтылимим эсензэ кедьсэ стазь мазый платиясояк. Сон кенерсь эрьва ков: зярдояк эзизе кадно роботанзо (стажозо ульнесь 50 иеде ламо). Ды лиясто топавтсь мик колмо-ниле тевть: колхозсо важодсь, вирьсэ пурнась пичеой, почтальонкакс ульнесь, кардазонокак, текень пес, свал пешксель ракшадо. Минь, эйкакштне, эзинек кадновкшно ловсовтомо, алтомо, сывельтеме. Вишка пингстэ саезь, авам тейсь весементь, штобу минь касовлинек шумбракс, ломаннень паронь арсицякс ды аволь кенгелицякс.
Ледстневи, вишкинестэ лелям весть кандсь кудов чеменев эскеть. Авам сеске видькставтызе сонзэ, косто саевсь те «ули-парось», ды ушодсь мурнемензэ. Паро, се шкастонть совась шабрань тейтерь-ава ды сонсь мерсь неть эскетнень лелянень максомадост. Эйкакш пингстэ эрьва мезть эрсекшнесть, лиясто соват кудов авардезь ды кучат авать ульцяв кисэть пшкадеме. Тень каршо авань ёвтавксозо вейкель: «Тонсь ульть вадрякс, тонь мартояк парсте кармить тееме».
Теде авам сеедьстэ кортакшнось колмоненек туртов. Кодамокс касынек – а миненек кортамс, теде кадык лиятне ёвтыть. Авам вана весе виензэ, эрямонзо алтызе миненек, эйкакштненень. Касынек, тонавтнинек (тень кисэяк тензэ покш сюкпря), эрьванть эсензэ семиязо, эйкакшонзо, нуцьканзо... Ды ней янксетяно: мекс чуросто пурнавкшнынек сонзэ перька, мекс аламо кевкстнинек превс путомат, ламонть а содасынек сонзэ стака эрямодо....
Тиринь авам, Василиса Андреевна Казакова (тейтерьксэнь фамилиязо), чачсь 1927 иестэ Покш Березникень Симкина велесэ. Вишкине ялаксонзо марто кемень иесэ кадовсть тетявтомо. Савсь цидярдомс войнань ды седе мейлень вачо иетнень. Ансяк колмоксть савсь тензэ путомс кудо! Мезе те истямось, соды ансяк се, кие сонсь кепедсь-стявтсь кудо. Степан ялаксонзо марто васня одкстомтызь Симкина велесэ покштяст-бабаст кудонть. Вейсэ посёлкав мирденень лисемстэяк, тетянь Кечайкин Владимир Михайловичень марто топавтсть а ёвтавияк зяро стака тевть. Цидярдызь весементь!
Пингензэ перть, ловт, кодат-бути вийть варчнесть нардевчинзэ. Ламо иеть савсь тензэ якамс сэредиця ававтонзо мельга, мейле тетянок мельга, кона кемголмово иеть таркасто эзь стякшново. Вень аудомат, седей ризнэмат! Весе печтязь, весе цидярдозь. Ней уш кеветее иеть кода авам арась – ансяк ве чимгак а ютакшны сонзэ апак ледстя. Сон эри седейсэнь, минек эйкакштнесэ, нуцькатнесэ. Вечкевикс авань свал ледстнян сехте питней ды мазый валтнэсэ, ды пингенек перть сон тенек а стувтови…
Валентина ЮДИНА-КЕЧАЙКИНА