Вете иеде икеле, 2020 иень ноябрянь 18-це чистэ, Мордовия Республикань Прявтокс аравтозель Артем Алексеевич Здунов. Неть иетнень перть теезель покш робота минек республиканть, сонзэ эрицятнень ды целанек масторонть лезэс.
Васняяк, киртязель республиканть долкось. Меельце 5 иетнень перть республиканть эсензэ доходонзо кассть 1,8-ксть.
Эсь доходтнэнь касомась, коммерческой кредиттнэнь целанек пандомась ды бюджетэнь заимствованиятнень киртямось лездасть теемс долконь нагрузканть 52% уровнянть коряс. Артем Алексеевичень самодо икеле жо ульнесь 211%. Теке марто Россиянь Президентэнть лезксэнзэ вельде тедеде Мордовиянь бюджетэнь кредиттнэнь коряс 2/3 долктнень нардамонть лувсо уш каязь 1,3 млрд целковойть. Неть ярмактне путозь виевгавтомань проекттнэс. Иенть прядовомс каявить эште 1,5 млрд целковойть. Тедеде весемезэ долконть арсеви киртямс малав 10%.
Мордовиясь касты экономикань потенциалонть. Ютазь вете иетнень перть региононь валовой продуктась кассь малав 13% ды васенцеде кармась пель триллионт целковойде седе ламо.
Промышленной производствань индексэсь те шканть перть кассь 1,4-ксть. 60% ламолгадсь розничной микшнемань оборотось.
Региононь валовой продуктантень вишка ды средней бизнесэнь путовксось кармась 25%. Те секторонть марто сюлмавозь республикань экономикасо эрьва колмоце важодицясь.
Колмо иетнень перть инвестициятнень покшолмась кармась 220 млрд целковойть.
Тедеде Мордовиянь аграрийтне таго малавгадсть сюронь пурнамонь коряс рекордонь тешксэнтень – пивсэзь малав 2 млн тоннат сюро. Меельце вете иетнень перть ярсамопелень ды перерабатывающей предприятиятнень продукциянь производствань покшолматне кассть малав кавксть.
Велесэ важодемань ды эрямонь условиятнень тееманть, од специалисттнэнь тердеманть туртов тевс нолдави велетнень комплексной виевгавтомань программась. Меельце вете иетнень перть велень районтнэсэ ансяк социальной, инженерэнь ды транспортонь инфраструктурань объекттнэнь строямс ды витнемс, вадрялгавтомс-мазылгавтомс явозь 10 млрд ламо целковойть. Велень агропромышленной комплексэнь ды социальной сферань важодицятнень туртов строязь 100 седе ламо кудот.
Теке марто, республикасонть шкадо икеле прядозь каладозь кудотнестэ одс эрицятнень ютавтомань программась. Правительстванть тевезэ – 2030 иентень вадрялгавтомс эште малав 6,5 тежат ломантнень эрямонь условиятнень.
«Молодежь и дети», «Семья», «Кадры» национальной проекттнэнь лувсо поладови виев важодемась эйдень кужотнесэ, школатнесэ, колледжтнесэ ды техникумтнесэ, эйкакшонь лагертнесэ тонавтнемань ды превс путомань неень шкань условиятнень тееманть коряс. Федеральной программань тевдееманть ушодовомантень педе-пев витнемс эрявсть республикань тонавтнемань организациятнень пеледест ламо зданиятнень, сынст ютксо эйдень кужотне ды техникумтне. Ютазь вете иетнень перть те невтевксэнть удалась киртямс пелевидьс, сыця вете иетнестэ неень шкань вешематненень ладицякс эряви теемс тонавтнемань организациятнень эште нилеце пельксэнть.
Меельце 3 иетнень перть малав 200 млн целковойть явозь туризмань коряс проекттнэнь топавтомантень, кирдезь предпринимательтнень ды общественной зярыя кементь ушодкст.
Уш нилеце ие Мордовиясь изни «Регион для молодых» ды «Регион добрых дел» пелькстамотнесэ. Тень вельде 3 иетнень перть явозь федеральной ярмакт Саранскойсэ Мордовиянь республикань од ломанень центранть витнеманть-одкстомтоманть лангс, теке марто истямо робота ютавтозь Рузаевкань, Дубенкань ды Чаунзань районтнэсэ.
Сы иестэ арсеви одкстомтомс Од ломанень центратнень Орданьбуень ды Краснослободскоень районтнэсэ.
Неть невтевкстнэ – республикань руководстванть виев ды эрявикс важодема, конанть вельде седе вадрялгады Мордовиясо эрямось.