Четверг, декабря 02, 2021
Важное

А. С. Пушкин лемсэ Национальной библиотекасо ютась лембе вастовома, кона алтазель «Эрзянь правда» ды «Мокшень правда» газетатнень 100 иень юбилеентень. Тей сакшность редакциянь прявттнэ, газетань теицятне, прессань ветерантнэ, ловныцятне, Н. П. Огарёв лемсэ МГУ-нь филологиянь факультетэнь студенттнэ.

 

Ловнома кудось анокстась мельстуиця выставка, косо ульнесть эрьва кодамо иестэ нолдазь газетатне. Тюжа конёвонть лангсо минек коллегатне сеть васоло шкатнестэ мезде ансяк эзть сёрмадо, кодат ансяк стакачить эзть кепеде.

Редакциянь течинь эрямодо пурнавозтнень туртов пачтясь прявт редакторось М. Н. Девятова.

Лембе валт редакциянть лемс ёвтась Эрзянь ды мокшонь раськень регионъютконь исполкомонь прявтось О. В. Дулкин:

– 100 иеть – те виев юбилей. Газетатне ютасть касомань-кепетемань покш ки. Сынст учить ды ловныть аволь ансяк минек республикасо, Мордовиянь томбалеяк. Газетась кармась тиринь кудокс раськень творческой интеллигенциянть туртов. Мельспаро, сонзэ важодицятне улить минек исполкомонь составсо. Исполкомонть ды газетанть ютксо умок ладявсь паро ялгаксчи, кадык сюлмонок седе товгак виевгадыть. Арсян тенк ламо ловныцят ды покш тиражт!

Исполкомонть пельде Благодарностьсэ казевсть газетань важодицятне Юлия Ерёмина ды Татьяна Маторкина.

Паро инжекс те вастовомасонть ульнесь Татьяна Дмитриевна Рябова. Сон колоньгемень иень перть важодсь «Эрзянь правдасо».

– Газетасо важодемам лован эрямосон уцяскав шкакс. Мон роботынь Ине Отечественной войнань участниктнень марто. Те тунь лия ломанть. Пельдест маринь истят ёвтнемат, конатнеде а ловнат книгасто, газетасто, ды сындест а невтить телевидениява. Писательтне ды поэттнэ ульнесть свалшкань инжекс минек редакциясо, мельспароль мартост кортамс, кунсоломс. Газетась лиснесь недлязонзо зярыяксть. Нама, эзинек эрсе кудосо, ламо ардтнинек командировкава, эзинек некшне семиянок, ялатеке тевесь тукшнось мелезэнек. «Эрзянь правданть» ловность, макснесть вейкест-вейкест туртов. Сеедьстэ лиснесть сялдомань материалт. Сынст нолдамодо мейле ульнесть паро ёнов полавтомат. Важодемстэ зяро паро ломань марто теевинек содавиксэкс! – ледстнесь Т. Д. Рябова.

Истя жо лембе валт ёвтась МР-нь заслуженной поэтэсь Г. С. Гребенцов. Ицялонь педучилищасо тонавтнемстэ сон ламо сёрмадсь минек газетав, пачтясь педучилищань тевтнеде. Мейле кармась сакшномо «Тештине» литературань кружоков, конань ветясть писательтне В. К. Радаев ды М. А. Втулкин. Од автортнэ покш мельсэ учость цетьверькенть, те чистэнть ютасть вастовоматне, мейле – газетань лисеманть, тосо башка лопасо лиснесть сынст сёрмадовксост.

Редакциясо важодемадонзо пачтясь Эдуард Ретунский фотокорреспондентэсь. Минек марто сон кемзисемге иеть. Валонзо коряс, важодицятнень икеле ютасть эпохальной тевтне-валтнэ. Саемга, Тёжа иень вейсэндямось, Россиянь Президентэнть В. В. Путинэнь Мордовиясо улемазо, Футболонь коряс 2018 иень масторлангонь чемпионатось ды ламо лият. Весе неть покш читнестэ Эдуардонь фотографиятне лиснесть газетасо. Икеле важодемась фотографонть туртов седе стакаль. Кавто част эрявсь фотографиянь теемга (костямс плёнканть, кандомс, нолдамс печатьс). Ней – кавто секундат – фотографиясь кучови модамасторонь келес. Путсак Интернетс – несызь ламодояк ламо ломанть. Кодамо мельспаро ваномс фотографиятнень, конат теезь 20-30 иеде икеле! Те кадови историяс.

Покш Игнатбуестэ сакшнось минек свалшкань ловныцянок – МР-нь заслуженной тонавтыцясь Р.Д. Жегалина. Сонзэ авазо важодсь изба-читальнясо. Секскак эрзянь газетатнень ды журналтнэнь весе ловнылинзе. Мейле, зярдо ушодсь ветямо школасо эрзянь келень урокт, сонензэ пек лездасть тиринь кельсэ лисниця изданиятне. Римма Дмитриевна явсь мель минек газетань пелькстамонтень, сон кучсь тенек валморо. Истя жо тей сакшнось паро ловныцянок, пелькстыцянок, Саранскоень 80 № эйдень кужонь воспитателесь В. В. Дыдыкина. Сон морынзе тенек эсензэ частушканзо, сынь алтазь «Эрзянь правдантень».

Паро казнекс ульнесь Г. И. Сураев-Королёв лемсэ «Келу» фольклорной ансамблянь морыцятнень морамост. Эрзянь ды мокшонь моросо эждимизь МР-нь народной артисткась Анна Атласова, МР-нь заслуженной артисткатне Елена Воронина, Галина Макшева, Любовь Князькова ды «Пувама» фольклорной ансамблясь.

А минь ёвтатано сюкпря А. С. Пушкин лемсэ библиотекантень лембе ды мельстуиця вастовоманть кисэ.

 

Татьяна Маторкина

 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».