И. М. Яушев лемсэ Оперань ды балетэнь театрасо ютась кенярксчинь вастовома, конась алтавсь Тундонь ды важодемань покш чинтень. Тесэ яволявтозельть 2025 иенть коряс трудовой пелькстамонь республикань конкурсонь изницятнень лемест. Ютксост промышленностень ды велень хозяйствань, строительствань, жилищно-коммунальной хозяйствань, транспортонь, предпринимателень коллективтне. Истя жо образованиянь, медицинань, культурань важодицятне. Сынь казевсть Изницянь знамясо.

Лембе вал марто пурнавозтненень пшкадсь МР-нь Прявтось Артем Здунов, сон евтась сюкпря весенень, кие теи покш путовкс экономикантень, социальной сферантень.

– Васенце маень кенярксчись вейсэнди эрьва кодамо профессиянь, эрьва кодамо иень, эрьва кодамо раськень ды кемемань ломантнень. Сюкпря сетненень, кить лездыть СВО-нь участниктненень ды семияст туртов. Сень эйстэ, кода важодить предприятиянок, ашти вандынь чинек, – кортась региононь прявтось.

Сон тешкстызе, меельце иетнень перть республикань экономикась виевгадсь. Панжозельть важодемань од таркат, малав 3,5 тежат. Аволь умок панжовсь «Световые инновационные системы» предприятиясь. Поладови важодемась «Лисмасояк».

МР-нь Прявтось башка валт евтась ламо эйкакш марто семиятнень туртов. «Семиятне улест покшт, эряви кепедемс демографиянть!» – пшкадсь Артем Здунов залонтень. Эряви меремс, Прявтонть Указонзо коряс кемекстазь «Лучшая корпоративная практика поддержки рождаемости» од пелькстамо. Сонзэ коряс казевсть колмо предприятият.

«МР-нь сехте вадря трудовой династия» тешкссэ ды Почетной дипломсо казевсь Чижовтнень важодицятнень династиясь. Сынь роботыть Орданьбуень светотехнической заводсо. Чижовтнень вейсэнь стажост – 196 иеть.

Истя жо те кенярксчиденть икеле Республикань кудосо казевсть «Лучший по профессии» пелькстамонь изницятне.

Татьяна Маторкина