Неть оймсема читнестэ Республикань Культурань кудосонть ютасть пародояк паро концертт. Сцена лангсо киштсть-морасть Атюрьевань, Отяжбуень ды Саранск ошонь округонь артисттнэ.
– XXIX-це фестивалесь алтави Ине Отечественной войнасо Изнямонь 80 иетненень. 2025 иесь яволявтозь Тиринь масторонь ванстыцянь иекс, минек республикасо – Исторической памятень иекс. Минь кирдтяно каштанчи Советской Союзонь 11 Геройтнень кувалма, конат чачсть Отяжбуень моданть лангсо. А стувтнетяно сетнень, кить течи ванстыть Тиринь масторонть. Сюконятано тенст! – истямо вал марто пшкадсь фестивалень инжетненень Отяжбуень прявтось Константин Николаев.
Мельспароль неемс сцена лангсо «Комолькай», «Горнипов», «Лисьмапря» фольклорной ансамблятнень, «Валскень зоря» народной ансамблясь кецявтынзе весень ламо вайгельсэ моразь эрзянь моротнесэ. Коень коряс, фестивалев сакшность ськамост морыцятнеяк: Ольга Колемасова, Наталья Кудашкина, Анжела Ивашкина, Владимир Титяпкин, Марина Атласова ды Сергей Лашманов. Сынь казсть ваныцятненень седейс токиця вадря морот. «Киштемань кудо» коллективесь невтсть хореографиянь номер. Максимовтнень семиясь (тетясь ды эйкакштне) морызь «Семиянь гимнанть», сонзэ вастызь пек лембестэ.
Залось стядо вастызе Вера Щуковань. Алексей церазо чавовсь СВО-со. Авась ловнось стихотворения, конась алтавсь вечкевикс церанстэнь. Эрьва валсонть – пшти сэредькс. Ломантнень эзть кирдеве сельведест, залось копачавсь сэтьмечис.
«Мастерство земли мордовской» выставкасонть Отяжбуень мастертнэ невтсть гигерьстэ, севоньстэ теевкст, викшневкст, кодавкст, артовкст. Инжетне рамсесть казнекс сувенирт.
Меельцекс концерт невтсть Саранск ошонь округонь артисттнэ. Номерт анокстакшность «Луч», «Заречье» ды культурань лия учреждениятне. «Времен связующая нить» лем ало кенярксчись мольсь колмо часонь перть. Кода сынст вейкетстямс, райононь артисттнэнь ды ошонь? Паряк, жюринтень ошонь номертнэнь эрявить ванкшномс конкурсто башка.
Концертэнь васенце отделениясо морамонь номерт невтсть «Морама», «Эрзят-мокшет», «Гайги моро», «Вармава» фольклорной ансамблятне. Ламо номерт алтавсть Ине Отечественной войнантень ды СВО-тень. Ваныцятне паро мельсэ вастызь «Argutus» хоронть, «Романтик band» церань народной ансамблянть, «Радоница» народной вокальной ансамблянть, «Отрада» моронь театранть, «Гайгема» инструментальной ансамблянть.
Сцена лангс лиснесь специальной военной операциянь участникесь Денис Салдатов. Тешкстасынек, ламонень сон теевсь содавиксэкс Интернетсэ, косо БТР лангсо седясь скрипкасо.
Концертэнь программасо ульнесть киштемань ламо номерт. Сынст анокстызь кода эйкакшонь коллективтне, истя жо покшоньгак. Те: «Вертикаль», «Мы», «Антарес», «Flash», «Валдоня», «Инелей» ды лиятне.
«Шумбрат, Мордовия» фестивальсэнть ульнесть Л.П. Кирюков лемсэ Саранскоень музыкальной училищань рузонь народной инструментэнь оркестрась, народной инструментэнь народной оркестрась, «СарГрад» вокальной ансамблясь, «Гончарный круг» церань морамонь ансамблясь, «Республика» морамонь народной студиясь.
Паро казнекс кармась Саранск ошонь округонь Культурань кудонь «Семиянтень гимна» номерэсь. Артисттнэ морасть семиянек, эйкакшост марто. Удалост покш экрансонть невтевсть сынст семиянь фототне.
Выставкасонть истя жо невтевсть ламо мазычи: викшнезь-стазь эрзянь ды мокшонь оршамопельть, Михаил Олькинэнь илевсто кодазь теевксэнзэ, чувтосто керсевкст, някат, артовкст. Ды тесэ натой ульнесь оршамопелень невтема.
«Шумбрат, Мордовия!» раськень творчествань фестивалень Гала-концертэсь карми декабрянь 7-це чистэ, невтеви кавксть.