Суббота, июня 15, 2024
Важное

Репортаж «АПО «Элеком» ОАО-нь паксятнестэ


«Агропромышленное объединение «Элеком» ОАО-сь – республикань велень хозяйствань прявт предприятиятнестэ вейкесь. Вейсэндявксонть юрс совить ниле отделеният, конатне аштить Ромодановань райононь Алтары, Курмачкасы, Трофимовщина велетнесэ ды Ицялонь райононь Береговые Сыреси велесэнть. Неень шкасто предприятиянь весе хозяйстватнесэ моли пси шка – ветявить сюротнень видемань тундонь тевтне. Неть читнестэ минь ульнинек предприятиянь «Трофимовщинская» агрофирмань паксятнесэ ды ванынек, кода тесэ молить видемань тевтне.

Кода мерсь «АПО «Элеком» ОАО-нь агрономось Виктор Вячеславович Паулкин, тундонь видемань тевтне хозяйствасонть ушодовсть апрелень 6-це чистэ. Истя, тедеде предприятиянь хозяйстватнесэ кемекстазь видемс 600 гектарт яровой товзюро, 972 гектарт фуражокс шуж, 400 гектарт пиянь пидеманть туртов шуж, 450 гектартнэ максозь силосокс кукурузанть алов, 550 гектарт видеви чиньжарамо. Ламбамо якстерькайденть те иестэ, кода свал, арсеви видемс 2000 гектарт, 100 гектарт – кснав. Веиень тикшетнеде 407 гектарт, ламо иенсетнеде – 30 гектарт.

Ломантне кортыть: «Мезе видят, сень саят». «АПО «Элеком» ОАО-нь хозяйстватнесэ тень чарькодить. Секскак тесэ покш мель явови видьмекстнэнень. Кода икелеяк, нейгак сынь элитнойть, истя жо васенце ды омбоце репродукциянь.

– Минь кеме юр путынек сы иень урожаенть алов, – ёвтни предприятиянь агрономось Виктор Паулкин. – 2500 гектарт видинек озимойть. Те тевенть топавтынек шкастонзо, кодамояк стакачинь апак сода. Теленть сюротне ютавтызь а беряньстэ. Яровой сюротнеяк, кемтяно, видевить весе шкасто.

Зярдо ульнинек «АПО «Элеком» ОАО-нь паксятнесэ, мольсь фуражокс шужонь видемась. John Deere тракторонть азорозо – Алексей Гогулин механизаторось – эсь тевенть топавтсь маштозь, кода эряви.
Неень шкань техникась пек превей, бути маштат сонзэ экшсэ роботамо, кодаткак мелявкст ды стакачить а лисить. Алексей Викторович жо те тевенть содасы пек парсте, малав весе эрямозо сюлмавозь механизаторонь тевенть марто. Те хозяйствасонть цёрась важоди 2010 иестэ саезь. Теде икеле жо фермерэкскак эсь прянзо варчнизе, плотникень бригадасояк савкшнось роботамс.

– Мон чачинь-касынь теске, Трофимовщинасо. Прядыя школанть, тоско жо макссть прават, сестэ эдь водителень тевентень тонавтсть школасо, ды озынь руль экшс, – ёвтни Алексей Викторович. – Аламонь-аламонь весементень тонавтнинь. Мейле жо, важодемань весе шканть перть, кодамо ансяк техникасо роботамс эзь саво: тракторсояк, комбайнасояк. Варчнинь эрьва мезе. Нама, неень шкань техникась вадря. Роботамс эйсэнзэ мельспаро ды тевеськак маряви седе шождакс. Тундонь видема ды сёксень сокамо шкатнестэ важодян John Deere тракторсонть, тикшетнень ледемстэ-урядамсто озан «Беларусос». Теньсэ стакачить арасть, эрьванть вадрясто содаса.

Алексей Гогулиннэнь видемань тевтнесэ лездыцякс тесэ жо ульнесь трактористэсь, видьметнень усксицясь Сергей Голубев. Цёрась механизаторокс роботы 1988 иестэ саезь. Тевензэ улить куш кодамо шкасто. Тунда котьми видемань тевтнесэ, кизэнь перть анокстыть тикше, мейле ушодови велень хозяйствань предприятиятнень ды механизатортнэнь туртов сехте пси шкась – сюронь урядамось. Трактористэсь таго тевсэ. Телень перть жо лездыть фермань важодицятненень ды витнить-петнить техниканть.

– Тракторонь паркось хозяйствасонок аволь берянь, – ёвтни Сергей Голубев. – Пек умонь техниканок ней уш арась, сон свал одкстомтови. Рамавить од тракторт-комбайнат ды эйзэст весе эрявиксэсь. Мон эсь тевем пек вечкса. Лиясто оймсема чистэ кудосо цяк тень сы, седе курок бу лисемс роботамо. Тесэ чись юты кода-бути а марявияк. Чоп ломань ютксат, топавтат эсь тевенть. Мон эдь школань эземстэ саезь весе эрямон перть важодян велесэ, моданть лангсо. Те монь весе эрямом.


Видемань тевтнень ванномадо мейле Виктор Паулкин агрономось минек саимизь лия паксяв, тосо Валерий Борисов механизаторось тейсь изамонть. Лиякс меремс, анокстась моданть сюротнень алов. Механизаторось важодсь неень шкань «Кировец» од тракторсонть, конантень понгавтозель истя жо изамонь од агрегат.

Од тракторось ды изамотне а стяко максозельть Валерий Борисовнень. Агрономонть валонзо коряс, те механизаторось – алкуксонь профессионал. Сон эрьва техникасо дока. Тунда паксят соки, кизна – валны, сюронь урядамсто, бути эряви, озы комбайнас, сёксня якстерькайть тарги. Ицялбуень Селища велень эрзянь цёрась механизаторокс важоди 1985 иестэ саезь, «Элекомов» сась 2002 иестэ. Истят ломантнеде мерить – оймсемань асодыцят, зярдояк каршо а моли, свал анок лисемс важодеме. Сон покш мельспаросо ёвтни од техниканть ланга, кодамо сон превей ды эряза.
Изамонь тевтнень прядозь, Валерий Валентинович карми топавтомо сюротнень видеманть. Сонзэ тракторонть туртов Horsch видемань комплексэсь уш анокстазь.

Кода тешкстыть предприятиясонть, паро, улить эштё минек велетнесэ алкуксонь цёрат, конатне а пелить роботадо. Истятнэнь лангсо, кода Борисов, Гогулин, Голубев ды ламот лиятне, кирдевитькак велень хозяйстватне. Сыненст меремс кавксть а эряви, весементь, мезес кундыть, тейсызь куроксто ды тевень содазь.
Истямо сынст агрономоськак. Кода велесэ чачозь ломань (ундоксонзо Ицялонь райононь Инелей велестэ), Виктор Паулкин а пели важодемадо. Сон овсе а аштекшни кабинетсэ. Свал чары лангсо, чинзэ перть пани зярыя сядот вайгельбеть, штобу ардомс-ванномс предприятиянь отделениятнень паксятнень. Ансяк стакачитнень ды весе асатыкстнэнь лангс апак вано, роботась тензэ сехте вечкевикс ды сехте вадря.

– Тундонь шкась велесэ шождакс а эрси ды, мерема, велень хозяйствасо стакачитнеде ды тевтнеде сатныть куш кодамо шкасто, – корты Виктор Паулкин. – Техниканть, видьмекстнэнь, ГСМ-нть анокстамат шкастонзо. Яровой сюронь культуратнень вадря урожаень саемань прявт ёнксокс ашти шкастонзо видемась. Тесэ мельсэ кирдема аволь ансяк моданть летькечинзэ, ванномат вегетациянь шкань кувалмонтькак, орматнень ды зыянонь кандыця унжатнень каршо сюротнень кемечист. Вана бажитькак хозяйстватне видеманть прядомс шкасто, эсь коряс содазь: тундонь чись ие анды.

Юлия Еремина
Фототне Эдуард Ретунскиень
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».