Ютазь субутасто А. С. Пушкин лемсэ Нацбиблиотекасо пурнавкшнось Эрзянь ды мокшонь раськень регионъютконь общественной вейсэндявксонь исполкомонь те иень цётамонь промксось. Ветясть сонзэ Вейсэндявксонь прявтось Юрий Мишанин ды Исполкомонь прявтось Татьяна Ларина.
Вастовомантень сакшность МР-нь Прявтонь Администрациянь руководителесь Булат Хайрутдинов, РФ-нь Федерациянь Советэнь сенаторось, Россиянь Финнэнь-угрань раськетнень ассоциациянь прявтось Пётр Тултаев, МР-нь Прявтонь Администрациянь Внутренней политикань управлениянь прявтось Александр Ратников, МР-нь культурань, раськень политикань ды архивень тевень министрань васенце полавтыцясь Александр Карьгин ды ламот лият.
Вастовомантень сакшность исполкомонь члентнэ аволь ансяк Саранскойстэ ды республикань районтнэстэ, истя жо маласо регионтнэстэ ды оштнестэ эрзянь ды мокшонь автономиятнестэ представительтне: Саратовасто (В.И. Кривошеева), Нижней Новгородсто, Ульяновскойстэ (В. А. Сафонов), Димитровградсто, Московсто ды Московонь областьстэ (А. И. Макайкин), Челябасто (О. А. Лысенко), Чувашиясто (В. П. Седойкин), Пензасто…
Юрий Мишанин эсь кортамосонзо ёвтнесь сеть тевтнеде, конатне топавтозельть 2023 иестэ, ды сыця иентень арсезтнеде. Республикасонть ды регионтнэсэ ютавтозельть ламо мероприятият: «Россия» выставкась-форумось, «Ладья», «Шумбрат», «Шумбрат, Мордовия!» фестивальтне, «Марса-вейсэ!» од ломанень форумось, косо эсь пряст невтизь эрзянь ды мокшонь раськень вейсэндявксонтень совицятне. Исполкомонь промкстнэ ютасть Отяжелень ды Темниковань районтнэсэ. Юрий Александрович тешкстызе Мордовиянь Прявтонть Артём Здуновонь раськень тевтненень мельявоманзо. Аволь умок МР-нь Госсобраниянтень Кучомасонзо сон пурнавозтненень сисемксть пшкалесь тиринь эрзянь кельсэ, мейсэ эштё весть невтсь пример весень туртов. Иенть перть Исполкомонь прявтось Татьяна Ларина ды Вейсэндявксонь прявтось Юрий Мишанин вастовкшность МР-нь Правительствань Председателенть Дмитрий Поздняков, МР-нь Прявтонь Администрациянь руководителенть Булат Хайрутдинов марто ды мусть вейке-вейкень чарькодема мелявкстнэнь изнямга.
Сыця иесь канды од вешемат ды од тевть Исполкомонть туртов. Уш ней сон ушоды анокстамот Эрзянь-мокшонь раськень 8-це Съездэнтень, конанть арсеви ютавтомс 2024 иень октябрясто. Сонзэ темакс кармить этнокультурань свалшкань питнейчитнень ванстомась ды неень а шожда шкатнестэ раськетнень вейсэндявомась. Истя жо а стувтови Кудораськень иеськак (Год семьи), конанть кувалма башка темакс карми эрзянь ды мокшонь семиятнесэ койтнень-кирдатнень ванстомась. Регионтнэяк а кадовить ве ёнов. Сыця иестэ «Шумбрат» кенярксчинть васенцеде арсить ютавтомс Челябань областень Варненской районсо.
Юрий Мишанин тешкстынзе РФ-нь Президентэнь сыця иень кочкамотненьгак ды кемевтизе: В. В. Путиндэ башка лия кандидатура а неи.
Мейле кортась Булат Хайрутдинов, кона пачтясь шумбракстнемань валт Мордовиянь Прявтонть Артём Здуновонь пельде ды ёвтызе эсь мелензэ республикань эрицятнеде, конатнень ютксто сон мусь паро ялгат-оят, ды мерсь, келя, кирди каштанчи минек ломантнень кувалма. Сон тешкстынзе од задачатнень, конатне аштить минек икеле неень шкане ды конатнень эрявить стявтомс Съездэнть шкасто: «Несмотря на исторические коллизии и демографические проблемы, мордовский народ сумел сохранить богатую национальную культуру и единое национальное самосознание… Одна из задач, которая стоит перед нами, это усилить общегражданскую российскую идентичность. Российское этническое многообразие – это огромное богатство, приносящее благодатные плоды». Ансяк кой-кона апаро вийтне бажить тень яжамс-калавтомс, секскак эряви ветямс вейсэнь важодемат истямо тевтнень а нолдамга ды киртямга.
Пётр Тултаев истя жо тердсь кемекстамс вейсэнь ялгаксчинть, а нолдамс вейке-вейкень ютксо сёвноматнень-аладямотнень, эдь те вети лавшомгадомантень, миненек жо неень шкасто эряви улемс седеяк виевекс. Пётр Николаевич истя жо тердсь а кадномс ве ёнов раськень СМИ-тнень мелявкстнэнь, од кадратнень асатноманть ды эштё весть ёвтась мель Образованиянь министерствасо этнокультурной тонавтомань отделэнь панжомадо. Сонзэ валонзо коряс, республикань министратненень эряви саемс пример Артём Здуновонь пельде ды тонавтнемс кортамо эрзянь эли мокшонь кельтнесэ.
Исполкомонь прявтось Татьяна Ларина кортамосонзо тердсь виевгавтомс важодеманть Интернетсэ, ваномс пштистэ тиринь келенть ваньксчинзэ мельга.
Промксонть шкасто кунсолозельть республикань ды регионтнэнь исполкомтнес совицятнень кортамост. Ламо кевкстемат стявтозельть «Легенда о Нарчатке» спектаклядонть – эряви-а эряви истямо проекттнэс совавтнемс «Келу» фольклорной ансамблянть, ды «Варма» этно-арт-театрадонть, конась эсензэ койсэ невти эрзянь-мокшонь раськень оршамопельтнень ды койтнень-кирдатнень.
Вастовомасонть явшезельть покш наградаткак. Мордовиянь Госсобраниянть пельде Почетонь грамотасо казезель Челяба ёнксонь «Иненармунь» НКЦ-нь прявтось Ольга Лысенко. Ёвтазельть Од ломанень форумонть информационной невтемань пелькстамонь цётамотне. Изницякс кармасть минек республикань М. Е. Евсевьев лемсэ педуниверситетэнь ды Н. П. Огарёв лемсэ госуниверситетэнь студенттнэ, конатнень туртов явшезельть ярмаконь казнеть спонсоронть «Атемарская» нармунень фабриканть пельде.
Промксонть прядовомадо мейле весе пуромозтне якасть ваномо «Шумбрат, Мордовия!» фестиваленть.
Марина Девятова