Субутасто Сургут ошсо ютась «Соцветие» раськень культуратнень фестиваль, конань анокстыцякс кармась ошонь администрациясь. Эсь культураст невтизь эрьва кодамо раськень 22 вейсэндявкст. Истя жо тесэ мольсь «Шумбрат» кенярксчи. Сонзэ анокстыцятне – эрзянь ды мокшонь раськень «Масторава» НКЦ-нь общественной вейсэндявксонтень совицятне, прявтось Геннадий Наркаев.
Мордовиястояк тов пачколесть инжеть. Неть: МР-нь заслуженной артисткатне, «Келу» фольклорной ансамблянь морыцятне Любовь Князькова, Елена Воронина ды од морыцясь Артём Мамаев. Сынь кецявтызь весе ваныцятнень! Баян марто, гайгиця ды виев вайгельсэ морасть тиринь кельсэ морот. Ломантне цяпасть апак лотксе, эзть нолда сцена лангсто, энялдсть морамс эштё ды эштё. Инжетне натой лиснесть киштеме минек морыцятнень марто. Теде башка, варчизь минек раськень ярсамопельтнень – пачатнень, позанть, эрзянь икранть. Сынст теизь-анокстызь Мордовиянь морыцятне! Весе кадовсть мельспаросо!
– Фестивалень ютавтома шкастонть минек площадкантень сакшность инжеть Нефтеюганск, Нижневартовск оштнестэ, эсенек Сургутсто. Сынь ёвтнесть эрзянь ды мокшонь ундокстост, кие чачсь Мордовиясо, кинь роднянзо-раськензэ тосто, кие республикань томбалень. Бажасть совамс минек вейсэндявксос, мейсэяк лездамс эли сакшномс вастовоматнес. Эрзянь ды мокшонь кудонтень сакшность ваномонок Сургут ошонь прявтось А. С. Филатов, полавтыцянзо, депутаттнэ, – пачтясь Геннадий Наркаев.
– Сюкпря ёвтавлинек кенярксчинь весе ютавтыцятненень. Те – Геннадий Наркаевнень, Евгений Куприяновнень. Евгений чачсь Чаунзабуень Покш Маризь велесэ. Ламо лезды «Масторава» эрзянь-мокшонь вейсэндявксонтень. Весе кавто читнень перть, зярс тосолинек, ульнесь мартонок, невтинзе ошонь мазый ды содавикс таркатнень. Сон – алкуксонь ломань, сэтьме, аволь покшкавтниця, седеезэ пии-палы эсь раськензэ кисэ. Лезды тиринь велензэ туртовгак: максы ярмакт церьковань строямс, Культурань кудонь витнемс-петнемс ды зярдояк теде а ёвтни. Тесэяк, Сургутсо, саимизь инжекс кудозонзо, каванимизь-васькавтнимизь, покш сюкпря тензэ, – ёвтнесь Артём Мамаев.
Сургутсо минек морыцятне явшесть инжетненень эрзянь ды мокшонь кельсэ газетат, книгат ды журналт. Арсетяно, ней тосо кармить минек од сёрмадстыцянок.
Татьяна Маторкина