Пятница, марта 29, 2024
Важное
Июнень 23-це чистэ Ицялонь райононь «Алатырь» санаториянть юрсо панжовсь «Страна героев» военно-исторической лагерень омбоце сменась.
Ледстясынек, «Страна Героев» – те военно-исторической лагерень сетть, конатне пурназь-теезь «Культура» национальной проектэнть лувсо Российской военно-исторической обществанть вийсэ. 
Лагерень участниктне – Россиянь эйкакштне. Тосонь организатортнэ ды педагогтне весе ютасть профессиональной анокстамо. Сменанть панжомантень алтазь кенярксчисэнть ульнесть МР-нь Культурань, раськень политикань ды архивень тевень министрань полавтыцясь Николай Бычков, МР-нь Правительстванть юрсо гуманитарной наукатнень НИИ-нь прявтось, Россиянь Военно-исторической обществань региональной отделениянь председателесь Галина Куршева.

Кода тешкстызе Николай Бычков, «Страна Героев» военно-исторической лагерень программантень совавтовить ниле тематической ёнкст: «Защитники», «Хранители Истории», «Волонтёры Победы», «Медиа Победы». Теде башка, программантень совавтовить эрьва кодат курсат ды мероприятият. Курсатнень ютазь, сменанть прядовомадо мейле эйкакштне сынсь кармить тееме эсест патриотической проектт ды мик снимамо фильмат. Эряви тешкстамс, тематической ёнкстнэсэ важодеманть туртов весе эрявикс оборудованиянть организатортнэ ускизь мартост.

– Лагеренть важодемазо арсеви колмо сменань перть, конатнень шкасто оймсить тёжа эйкакшт кода эсенек республикасто, истя лия регионтнэстэяк. Васенцесь ульнесь июнень 6-19-це читнестэ, омбоцесь важоди июнень 22-це чистэ саезь июлень 5-це чис, колмоцесь карми июлень 8-21-це читнестэ, – мерсь Николай Бычков. – Омбоце сменась пурнась 334 эйкакшт. Сынст эйстэ 50 эйкакштне састь Московсто, лиятне жо – тескень, Мордовиянь. Невтемга, Елизавета Аброськова сась Москов ошсто, сон кочкизе «Медиа Победы» ёнксонть. Кода мерсь тейтересь, сынст школась изнясь пелькстамосо ды зярыя эйкакшт кучозельть лагерев.

– Мон кочкия «Медиа Победы» ёнксонть сень коряс, сон сюлмавозь кинонть, режиссуранть марто. Лагересь пек тусь мелезэнь, эдь тесэ башка мель явови патриотической воспитаниянтень. А те пек эрявикс ёнкс, – мерсь Елизавета.

А вана Лев Пужаев эсенек республикань, эри Саранск ошсо. Сон кочкизе «Волонтёры Победы» ёнксонть.
– Те ёнксонть кочкия секс, вечкан лездамо ломантненень ды ули мелем сы шкасто сёрмадстомс эсь прянть волонтёронь отрядс, – тешкстызе Лев. – А те лагерьсэнть ули тонавтнемань башка программа, конась лезды волонтёронь тевентень кундамс седе профессиональна.
Лев Пужаев те лагерентень понгсь пелькстамосо изнямодо мейле. Сменанть прядовомадо мейле сон бажи анокстамс проектт, косо невтьсынзе минек республикасо волонтёрствань ёнкссонть талновтыця кевкстематнень ды сынст топавтомань китнень.

Кода мерсь «Страна героев» военно-исторической лагерень программной директорось Игорь Гурьянов, васенце сменась ютась пек вадрясто. Ды тешкстызе, Мордовиясь кармась васенце регионокс вететнень эйстэ, косо те лагересь панжовсь тедеде ды косо теезь пек вадря условият. Лагеренть весе эрявикссэ топавтомасонть пек лездасть республикань Культурань, раськень политикань ды архивень тевень министерствась, Ицялонь райононь администрациясь.
Игорь Гурьянов сась Волгоградсто, «Страна героев» лагертнесэ важоди уш нилеце ие. Те шканть перть ульнесь зярыя регионсо, Мордовиясь жо мелезэнзэ тусь сехте пек.

Юлия Еремина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».