Четверг, марта 28, 2024
Важное

Ютазь недлясто Авань чинь тешкстамонь торжественной промкссонть, конась ульнесь Республикань Кудосо, покш казнесэ тешкстазель Отяжелень райононь Аловелень Сорокинтнэнь кудораськесь. Сынь кармасть «2020 иень Семия» Весероссиянь пелькстамонь «Коень-кирдань ванстыця семия» номинациясонть изницякс!

Александр Анатольевичнень, Лариса Владимировнанень, сынст тейтерест Алёнанень ды Ульянанень казезельть Изницянь диплом, ноутбук ды Мордовиянь Прявтонь тевтнень топавтыцянть Артём Здуновонь пельде ламбамо казнеть. Те кудораськенть историязо ней сёрмадозь «Иень семия. Россия. 2020» Почетонь книгантень.
Минек ульнесь меленек вастовомс те эрзянь раськень семиянть марто ды кевкстнемс сынст кудораськест койтнеде-кирдатнеде, конатнень кисэ Сорокинтнэ кармасть покш лементь кандыцякс.
Уледе содавикст


Арсетядо, Иень семиякс кочкавить ансяк ламо эйкакшонь триця тетятне-аватне? Арась, те пелькстамонть арсицятне а путыть те ёнксонть аравтлувокс. Сорокинтнэнь семиясь а явови лиятнень эйстэ покшолмасо. Александр ды Лариса трить-кастыть кавто эйкакшт, сынь эрить эрзянь кезэрень велесэ, кавонест роботыть ды, а карми манчемакс, лововить Аловелень кирдицякс-ванстыцякс. Александр Анатольевич – велень прявт. Тешкстама, велень азорокс Сорокинэнь ладизь 2016 иестэ. Седе икеле сон тонавтсь школасо эйкакшт физикантень ды полады те вечкевикс тевензэ нейгак. Физикась цёранть туртов – умонь вечкема, тетязо колоньгемень иень перть роботась Аловасо физикань тонавтыцякс, школань прявтокс. Авазо ветясь омбо масторонь келень урокт ды начальной класст. Школань прядомадо мейле китне, нама, ветизь Саранскоень пединститутов, косо сон аволь ансяк, кода мерить, «порсь наукань гранитэнть», истя жо вастовсь вечкевиксэнзэ Лариса Олейник марто, кона ульнесь шабра Сабанцеле велень. Од ломантне понгсть вейке группас ды 1999 иестэ налксесть свадьба. Пединститутонть прядомадо мейле од семиясь велявтсь тиринь ёнксов ды ушодсь роботамо Аловелень школасо. Лариса кармась ветямо историянь ды обществознаниянь урокт. Кавто иень ютазь Сорокинтнэнь чачсь васенце тейтерькаст Алёна, 2012 иестэ омбоцесь – Ульяна. Ней, школасо важодемань иетнень ловозь, Сорокинтнэ абунгадсть – сынст тетяст-аваст марто тонавтыцянь вейсэнь стажост 100 иеде ламо!

Кудонь ды велень азор

Александр Анатольевич аволь ансяк профессиянь коряс тусь тетянзо, Анатолий Петровичень, киява. Тетязо максынзе тензэ весе содамочитнень, конатнень, арсетяно, эряви максомс весе тетятненень эсест эйкакшост, а мейле – нуцькаст туртов. Саша уш вишка шкасто кармась чарькодеме электроникас, строямонь тевтнес, тонадсь тетянзо пельде чувтосто тееме стольть, стулт. Ней ламо-мезе Сорокинтнэнь кудосо теезь семиянь прявтонть сырнень кедьсэнзэ. Александр Анатольевич «а визди» кудонь роботатнеде, сонзэ лангсо кудоюртонь тевтне-мелявкстнэ, путоматне-таргамотне, чувоматне, витнематне-петнематне. Кода кудазор ды вейкине цёра ломань, Александр Анатольевич вансты-васькавтни семиясонзо тейтертнень, а мери тенст теемс стака тевтнень, ялатеке велень тундонь-сёксень котьмамотнень сынь явить весень ланга. Сорокинтнэнь кудо икельксэст свал ванькс, пиретне мазылгавтозь эрьва кодамо цецясо, тингетне путозь. Те кудораськесэнть, кода Александр Анатольевичень тетянзо-аванзо кудосояк, ванстыть ды кемекстыть койтнень-кирдатнень. Тешкстыть семиянь чачома чист, Авань чинть, Вечкемань ды кемемань кенярксчинть ды свал бажить пурнавомс эйзэст весе покш семиянек: покштятнень-бабатнень, ялаксонзо Романонь семиянзо марто. Ансяк сынст кенярксчитнестэ а неят столь лангсто иредстиця симемапельть, мейсэ покштне максыть паро невтема вишкинетнень ды ялгаст-ояст туртов. А стяко, зярдо велесэнть кармасть пурнамо од прявт, малав весе максызь вайгелест Александр Анатольевичень кисэ, эдь истят ломантне аволь ансяк эсь кудосост кирдить, велентеньгак а максыть ёмамс-срадомс. Кадык велесь пек киртявсь (ютазь пингень 70-80-це иетнестэ сон ульнесь сехте покшокс Отяжелень районсо), ялатеке Аловасо ванстови эрявикс инфраструктурась: ули школа, эйдень кужо, медпункт, колмо лавкат, клуб, косо кезовонть самодо икеле ютавтневсть весе велень мероприятиятне. Сынст важодемась ламосо ашти велень алкуксонь, кеме прявтонть-азоронть эйстэ.

Колмо раськень коень-кирдань ванстыця

Лариса Владимировна Сорокина – аволь ансяк школасо тонавтыця, сон краеведениянь музеень, «Добровольцы» волонтёронь отрядонь прявт. Кода корты авась, «мон бажан эйкакштненень максомс тиринь ёнксонтень вечкеманть, эдь ломаненть, конась а содасынзе эсь ундоксонзо, семиянзо, велензэ, масторонзо историяст, а карми сыця шказо». Лариса Владимировна тешксты, сынст покш семиясонть вейс пурнавсть рузонь, эрзянь ды украинецэнь койтне-кирдатне. Ларисань ававтозо – рузава, атявтозо ды тиринь авазо – эрзят, а вана тетязо сась Украинасто ды уш малав ведьгемень иеть эри Сабанцеле велесэ. Секскак вейсэнь столь лангсо сеедьстэ аштить шабрацек сюкоротне, каймактне ды тетянзо «фирменной» пампушка марто борщось. Ды аволь ансяк тантей ярсамопелень пидема-панема койтнень бажи максомс эсензэ тейтерензэ туртов кудазоравась. Сон тонавты эйсэст ванстомс семиянь койтнень-кирдатнень, эдь виев кудораськестэ лисезь эйкакштне, раськень ды покштятнень-бабатнень кемечист лангс нежедезь, касытькак седе шумбракс, ванькс оймекс, эсь вийтнес кемицякс, стакачитнень изницякс. Неть умок «путозь видьметне» уш максыть эсест касовксост. 19 иесэ Алёна сырнень медаль марто школань прядомадо мейле тонавтни Авиациянь главной Маршалонть Б.П. Бугаев лемсэ Ульяновскоень гражданской авиациянь институтсо, седе икеле а весть ульнесь райононь конкурсонь ды спортонь пелькстамотнесэ изницякс. Кавксо иесэ Ульяна терявтни прянзо шкинемасо. Тедеде сайсь омбоце тарка «Живи, народная душа!» райононь морамонь конкурссонть. Кода корты Лариса Владимировна, паро вайгелесь Ульянанень сась сырькаензэ ды покш патянзо пельде. Кие соды, паряк, Аловелесэ касы сыця шкань Зыкина?

Мейсэ эштё явови Сорокинтнэнь семиясь – те эсест панжадо седейсэст. Сынь вечкить вастомс-каванямс инжеть, роднят-раськеть, оят-ялгат. Неень шкане неть тешкстнэ мекс-бути ламова кармасть ёмамо. Ды тевесь овсе аволь коронавируссо. Лариса Владимировна – алкуксонь азорава, тантейстэ пидиця-паниця, сонзэ шожда обуцязо, ды секскак те ломанентень, теке толпандя ваксс, ливтить весе эжнеме-аштеме. Сорокинтнэ а пелить кортавтомадо, сынст арасть салавачист, сынь эрить ды важодить эсест ды тиринь ёнксост лезэс. Минь а карматано ёвтнеме сынст семиянь казнетнеде, кемемизь, эйстэст пек ламо. Ды аволь эйсэст питнейчись. Салаваксчись ды питнейчись те кудораськесэнть вейкине – тесэ эри вечкемась ды уцяскась! Кадык истя ули пингеде-пингес!

Марина Девятова
Фототне: МР-нь Прявтонть пресс-службась ды эсест Сорокинтнэнь семиянь архивстэ.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».