Печатень кудосо ютавтовсь МР-нь военной комиссаронть Игорь Тихомировонь пресс-конференциязо. Сон ёвтнесь, кода ютась тундонь призывесь, ды «Сёксь – 2019» армияв саемань кампаниядонть.
Мордовиянь военной комиссаронть валонзо коряс, тунда медицинань комиссия ютасть малав 3500 од ломанть, сынст эйстэ 1006-тне саезь армияв, меельцетне олякстомтозь эли сыненст максозь отсрочка.
– Мордовиясь Центральной военной округсонть армияв саевицятнень кеме шумбрачист кувалма васенце. Тундонь призывенть коряс те невтевксэсь кармась 82%, – мерсь Игорь Тихомиров.
Ламолгадсть военнослужащейтне, кить прядсть профессияс тонавтомань учрежденият. 3% киртявсть од ломантне, кить армияв саемадо икеле косояк эзть важоде ды эзть тонавтне.
Республикань военной комиссариатось истя жо ютавтсь пшти кочкамо научной кавто ротатнес (С.М.Штеменко лемсэ Краснодарской высшей военной училищантень ды «ЭРА» военной инновациянь технополисэнтень). Тунда неть научной ротатнес Мордовиясто кучозь ниле ломанть.
Теде башка, ниле од цёрат кучозь служамо спортивной ротас. Васенцеде армияв саезь «Юнармия» научно-практической движениянтень совицятне.
Тешкстазель, покш мель явови од ломантнень научно-патриотической лувсо кастомантень. МР-ва Россиянь ДОСААФ-нть юрсо арсеви панжомс «Авангард» од ломантнень тонавтомань куншкакуро.
Кортамось истя жо мольсь сеть ломантнеде, кить «кекшнить» армиядо. Тунда «кекшсть» сисем ломанть, 500-тне – эзть пачтяво. 27 ломантнень коряс ушодозь административной тевть, вейкесь – судязь.
– Сёксень армияв саемась ушодовсь ожоковонь 1-це чистэ ды прядови ацамковонь 31-це чистэ. Мордовиясто армияв саевить малав 700 од ломанть. Сынь кармить служамо эрьва кодат войскатнесэ, – ёвтнесь МР-нь военной комиссарось Игорь Тихомиров. – Сынст эйстэ 200 цёратне тонавтнесть машинань ветницякс, парашютистэкс.
Истя жо ёвтазель од лувдонть. Истя, тонавтницятне кармить саевеме ансяк тунда: панжиковонь 1-це чистэнть саезь медьковонь 15-це чинть самс; цёратне, кить эрить велесэ ды важодить сюронь урядамсто, – ожоковонь 15-це чистэнть саезь ацамковонь 31-це чинть самс.
Татьяна АКСЕНОВА