Пятница, марта 29, 2024
Важное

А стяко валмеревксэсь «Мезесь тееви течи, вандыс иляк кадо» сеедьстэ нолдави тевс эрямосонок. Сон пек лади течинь а шожда шкантень, зярдо масторлангсо ломантне куродовсть апак учонь орманть марто.
Ине Отечественной войнасо изнямонь 75 иетненень алтазь покшчинтень медальтнень шкастонзо явшинзе Покш Березникень Симкина велень поселениянь прявтось Любовь Ивановна Астайкина.

Неть читнестэ мартонзо телефон вельде кортамсто, карминек содамо, те велесэнть трудонь ветерантнэде 58, юткстост – тылэнь тружениктнеде кемень ломанть. Невтемакс, Елизавета Федоровна Астайкинань чачсь 1929 иестэ, сон колмо эйкакшонь триця ава, пингень перть важодсь тиринь велесэ. Нейгак арась мелезэ туемс ошов, куш эйкакштне мельспаросо бу саевлизь малазост. Текенень поладсынек, тейтерь-авась тевтеме а аштеви, котьми кудоютксо ды эмежпиресэ, куш истя кенярдовты свалшкане тензэ сакшныця, эрьва тевсэ лездыця эйкакшонзо-нуцьканзо.

Теке жо иестэнть чачицясь, Мария Алексеевна Наумкина, пек вечксы тиринь велензэ, истя уш лиссь эрямосонзо, мирденень эзь лисне, ансяк эрямонзо лангс а пеняци. Сон ламо иеть ульнесь велень школасо шлицякс-нардыцякс. Ледстнеманзо коряс, сестэ тонавтницятнеде пек ламольть, школась эрясь эрьва чинь мельспаросо, домка содамочинь пурнамо бажамосо. Мария Алексеевнань кудось ашти мазый таркасо, лей чиресэ, пандо ало. Сон Алексей племянникензэ марто кирди мекшть, пиресэнзэ касты эмежть.

Евдокия Ивановна Кармайкина марто кенярксов тевень, медалень каземань коряс, Л.И.Астайкина вастовсь Саранскойсэ. Сёксестэ тундос сон эри тейтерензэ,Татьяна Александровнань кедьсэ, а тундосто сёксес тиринь велесэ, эсензэ кудосо. Эште вейке тейтерезэ, Антонина Александровна эри Москов ало. Вастовомантень пек кенярдсь, секе тев кевкстнесь, кода ютыть тевтне тиринь велесэнзэ. Эдь тейтерь-авась пингензэ алтызе чачома ёнксонтень, пенсияв туемадо икеле ды теде мейлеяк важодсь Культурань кудосо.

Мирдесь ды нись Анна Андреевна Яськина ды Сергей Григорьевич Тетюшкин эрить тиринь велесэ. Тешкстасынек, Анна Андреевна, кинень ульнесь максозь питней казнесь, ламо иень перть важодсь фермасо, эсест кардазсояк свал кирдсть ракшат. Эште аволь умок хозяйствасост ульнесть кемень прят сеят ды реветь. Мирдесь-нись тевень вечкицят ды стакачиде а пелицят. Те ояксчисэ эриця семиясь учи Изнямонь кенярксчинть.

Сазортнэ, Анна Яковлевна ды Мария Яковлевна Тетюшкинатне эрить вейсэ. Кавонест сазортнэнь эрямост прась а шожда, войнадо икелень ды мейлень стака иетнес. Мария Яковлевна, кинь чачома иесь – 1923, мирденень эзь лисне, свал лездась малавиксэнзэ туртов, сыредезь, сонзэяк вановтомо а кадныть. Покш мель тенст яви Анна Яковлевнань тейтерезэ ды нуцьказо, конат эрить Самарасо.

Дмитрий Фёдорович ды Раиса Павловна Тетюшкинтнэнь семиясо ютазь иестэ лиссь покш кажо, палсь кудопотмост. Те тувталонть коряс мирдесь ды нись эрить Покш Березниксэ тейтерест кедьсэ. Ледстясынек, Дмитрий Федорович эйкакш пингстэ содасы кши кочомонть питнензэ, эдь эште одсто ушодсь важодеме строицянь бригадасо. Те сырнень кедь ломанесь ламо кудот чапсь, кардазт-мезть тейсь… Низэ Раиса Павловна истя жо важодсь паксясо, фермасо, мейле школасо шлицякс-нардыцякс. Виде, шумбрачист лавшомсь, неить беряньстэ, ялатеке покш мелест самс тиринь велев. Сынь покш мельспаросот мелень явоманть ды истямо покш казненть кисэ.
Анастасия Федоровна Кудряшовань Любовь Ивановна Астайкина содавтызе Чаунзасо. Те тейтерь-аванть тосо эрить цёразо ды тейтерезэ, мирдензэ марто сынь трясть-кастасть ниле эйкакшт. Тешкстасынек, Анастасия Федоровна пингень перть важодсь Алатырень Химлесхозонь филиалсонть, конась сестэ ульнесь Симкинасо. Виде, пичеоень пурнамось аволь шожда тевтнестэ ды сон тунь аволь весенень топавтови. Те тевсэнть эряви башка ёрокчи, сехте пек чувтованть тешксэнь теемстэ, косто мейле карми чудеме пичеоесь. Прявт тевесь – а кандомс зыян пичентень, конась кастови ламо иень перть.

Кенярксов сельведь марто саизе покш казненть Татьяна Михайловна Борискина, кие пингень перть эрясь ськамонзо. Войнань стака иетнеде мейле ламот цёратнестэ фронтсто эзть велявто, паряк, те тувталонть коряс сон мирденень эзь лисеяк. Пингень перть важодсь тиринь колхозонь фермасо, сыредезь пек мелявтсь, кие карми мельганзо ваномо-якамо? Паро, малавиксэнзэ эзизь кадо мельтеме, племянницазо саизе эстензэ Дубенкань райононь Свинсовхозов, косо сон эри семиянзо марто. Текенень поладсынек, малавиксэзэ три-касты колмо эйкакшт, тень лангс апак вано, сон эзизе кадо чаво кудос ськамонзо эриця малавикс раськензэ.

Мария Николаевна Наумкина истя жо пингень перть эрясь ськамонзо, виень апак вансто важодсь лесхозсо. Телень якшамо читнестэ эри вейсэ сазоронзо, Раиса Николаевна Адушкина, марто. Тундонь маней читнесэ саезь позда сёксес эри эсензэ кудосо. Виде, вановтомо эйсэнзэ а кадныть малавиксэнзэ. Нать, сонськак эсь шкасто лездась тенст.
Покш Березникень Культурань-досугонь од центрасонть аволь пек умок ютавтовсь торжественной промкс, ков тердевсть те ёнксонь трудонь ветерантнэ ды тылэнь тружениктне. Симкина велень эрицятнестэ тов якасть Мария Николаевна Наумкина ды Анна Яковлевна Тетюшкина. Тейтерь-аватне кадовсть покш мельспаросо тосо невтевиця концертэнть ды седейшкавань мелень явоманть кувалма.

Неть ломантне, кинь кедьсэ ульнесь инжекс Любовь Ивановна, весе ёвтасть покш сюкпря РФ-нь Президентэнть В.В.Путинэнь, МР-нь Прявтонть В.Д. Волковонь, Покш Березникень муниципальной райадминистрациянь прявтонть И.И.Игоновонь лемс, васняяк те паро казненть ды ярмаконь лезксэнть максоманзо кисэ.

Теке шкасто, сыре ломантнень марто вастовомсто лангс ливтевсть истят тевть, конат Л.И.Астайкинань валонзо коряс, ацирьгавтыть ёжомарямо, пшти сардокс кадовить седейс, зярдо вийтеме тетятне-аватне, седе сеедьстэ ськамост эрицятне а неить лезкс сехте малавикс ломанест-эйкакшост пельде… Кода а сыненст васняяк мелявтомаль бу кисэст ды теема всементь сыречист мазылгавтомга, эрямост шождалгавтомга.

Валентина Юдина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».