Четверг, марта 28, 2024
Важное

Субутасто Саранск ошсо ютась покш кенярксчи – «Шумбрат, Мордовия!» XXVI-це республикань раськень творчествань фестиваленть-конкурсонть Гала-концертэсь. Сондензэ икеле фойетнесэ невтевсь кедьчелькев ломантнень шкинемань выставка. Инжетне мельспаросо аволь ансяк ванность, истя жо рамсесть мастертнэнь кедьсэ теезь мазый сюлгамотнень, налкшкетнень, артовкстнэнь. А мейле ушодовсь сонсь концертэсь.

Васенце пелькссэнть невтезельть 23 номерт, конатнень ютксто тешкставлинек бу Покш Игнатбуестэ Наталья Темасовань, Ковылкинасто нурька морынензэ марто Валентина Сурняевань, Теньгушевасто Дмитрий Деминэнь. Ламо ульнесть раськень кельсэ мороткак-киштематкак: Дубёнкань райононь «Морамо» народной ансамблясь ды «Морыне» эйкакшонь коллективесь гайгстызь «Вирев моли Машура» моронть, Орданьбуень Чукало велень «Эрзянь аватне» весень токизь седейс «Яик масторов» эрзянь кезэрень моросонть.

Омбоце пельксэсь ушодовсь Мордовиянь Прявтонть Артём Здуновонь поздоровсто. Сон тешкстызе, 26 иетнень перть фестивалесь кармась республикань культурань брендэкс, республикань эрицятнень вечкевикс кенярксчикс.

Пелькстамонь весе участниктненень Мордовиянь руководителесь пшкадсь васняяк эрзякс ды мокшокс ды мейле поладызе кортамонзо рузонь кельсэ. «Мельвановикс ялгат, вечкевикс оят, вечкевикс землякт! Минь одс печтятано ойменек, седеенек туртов талновтыця минутат. Мон содан, ламот учить те фестиваленть. Кеняркс марто тешкстаса – эйсэнзэ невтизь ёрокчист 3,5 тёжат артистт. Ды пелест эйстэст – од ломанть. Те корты: фестивалесь карми эрямо ламо ды ламо иеть. Минь тень туртов тейтяно весе эрявиксэнть. Те кода спортсонть. Бути улить эйкакшт, од ломанень организацият – сестэ ули покш вандынь чи. Нама, мельспаро, 500 ламо номерт невтезельть. Зяро шкинема ды ойме путозь! Сы иестэ, зярдо минь тердтяно инжеть лия регионтнэстэ (минек тесэ РФ-нь Культурань министерстванть лезксэнзэ вельде ютавтовить покш мероприятият), эряви невтемс прянок весе мазычисэнть, штобу инжетне покш мельсэ велявтовольть Мордовияв. Течинь чись пек сюпаволь. Минь панжинек фармацевтикань покш производства, минек ламо инженек. Ды текень марто весе бажить понгомс фестивалентень, покш мель марто ваномс раськень шкинеманть лангс, конась чачсь ды эри Мордовиясо. Кенярксчи марто! Пазось максозо весенень шумбрачи!»

Республикань Прявтось истя жо явшесь казнеть самодеятельной артисттнэнень, конатнень ютксо ульнесть ламо эйкакшт ды од ломанть.

«Открытие фестиваля» номинациясонть фестивалень диплом ды ледстнемань казне максозь Чаунзань районсто колмоце классо тонавтницянтень Кира Глухованень ды Инсаронь районсто нилеце классо тонавтницянтень Матвей Матвеевнень.
«Хранители традиций» номинациясонть диплом ды ледстнемань казнеть – павлопосадской пацят – Артём Здунов казсь Ташто Шайговань райононь Сыре Теризморгань раськень хоронь артисткатненень.

«Лучший патриотический номер» номинациясонть изнясть Ковылкинань районсто Игорь Глушичкин ды Игорь Канищев, «Душа фестиваля» номинациясонть – Лямбирень районсто Артём Мамаев ды Сергей Фудин.

«Национальная песня в новом прочтении» номинациясонть сехте вадрякс кармасть «Мерема» раськень фольклоронь ансамблясь ды «Варма» этно-арт-театрась.

«25 лет на фестивале» номинациясонть диплом ды ледстнемань казне максозь Ельникень районсто Анатолий Чумаковнень.
Муниципалитеттнэнь ютксо, косо эрить 10 тёжадо седе аламо ломанть, фестивалень изницякс кармась Ицялонь районось, омбоце тарканть саизе Кочкурбуесь, колмоценть – Дубёнкань районось.

Муниципалитеттнэнь ютксо, косо эрить 10 тёжадо седе ламо ломанть, фестивалень изницякс кармась Рузаевкань районось, «сиянть» саизе Ковылкинань районось, «бронзанть» – Лямбирень районось.
«За творчество и профессионализм» специальной дипломось максозь Саранск ошонь округонь шкинемань коллективтненень. «Выставочный проект «Мордовия мастеровая» номинациясонть тешкстазь Краснослободскоень, Темниковань ды Орданьбуень районтнэ.
Концертэнь омбоце пельксэсь кенярдовтынзе ваныцятнень сехте виев комсь номертнэсэ (кой-кинь сельведесткак эзть кирдевть), гайтев вайгельтнесэ ды мазый оршамопельтнесэ.

Седейс токизь весень Саранскойстэ Маруся Фомина ды «Карусельки» эйкакшонь вокальной студиясь, «Норовава» Кочкурбуень Ташто Мурзань авань ансамблясь, Лямбирень районсто Артём Мамаев ды Сергей Фудин, Чаунзасто Кира Глухова, Атюрьевасто Евгений Шумкин, Ковылкинасто Ирина Кудашкина ды Игорь Глушичкин, Ельникстэ Анатолий Чумаков, Саранскойстэ «Мерема» ансамблясь.

Марина Девятова
Фототне Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».