Среда, февраля 28, 2024
Важное

Икелеяк савкшнось ардтнемс, нейгак а лотксян. А мерян, Россиянть педе-пев «онкстния». Ялатеке шнаса прям: ламо ошт-велеть ютынь, ламо таркасо ульнинь, ламо мезе неинь, ламо ломань марто вастневинь. Васняяк, кода журналист. Омбоцекс, кода ломань, кинь седейс овсе эйкакш пингестэ саезь пшти сардокс пезнась мелявксось, кода ванстомс весе се сюпавчинть, мейсэ казимизь покштянок-бабанок.

Эрзятнень оймес эрьва кода бажан сыремтемс тиринь келентень вечкемань сяткине. Ды, кемемизь, эйкакш ладсо кецнян, зярдо ким лангс понгонить ломанть, кить ванстызь эрзянь ойменть, мельспаросо аштить эсь раськенть кисэ, кить эзизь стувто тиринь келест.

Истят ломантнень юткс апак пеле совавтовлия эрзянь пек паро цёранть Сергей Михайлович Дёминэньгак. Кие сон ды мейсэ саизе мелем сёрмадомс эйстэдензэ? Сеске мерян, Сергей Михайлович аволь кодамояк наукань доктор, кинь лемензэ содасызь васолдояк-васолга. Ды аволь верце эземтнева озадо аштиця покш прявттнэнь ютксто, кинь икельга вечктяно «киштеме». Сон – велень ломань. Чачсь-кассь Ташто Дёмкина велесэ, конась Пенза ёнксонь Шемышейской буесэ.  Весе  эрямозо педе-пев сюлмавозь корьмай моданть марто, конань туртов путы весе виензэ, шумбрачинзэ. Модантень вечкемась, кода мерить, верьсэнзэ-сансонзо. Мезесь весемеде питней, истямо жо вечкемань сяткинеть Сергей Михайлович маштсь сыремтемс эсензэ эйкакштнень седейскак. Кавто цёранзо – Александр ды Валерий – тусть сонзэ киява. Седе вишкинетненьгак «тарги» покштнень мельга. Нурькинестэ, ули мезень кис шнамс эсензэяк, эйкакшонзояк. Теде домкасто ды келейстэ карматано ёвтнеме седе товгак.

Теке марто видькстан, те ломаненть лангс мель явомс кармавтымим аволь ансяк вере ёвтазесь. Васенцеде неемстэнзэ уш потсо вайгель мерсь тень: те цёрась, эрзянь сёрмадыцянть Артур Моронь валсо ёвтасынек, «прясто пильгес эрзя».  Истя улияк.

Веж-Няньге лей чиресэ касозь ломанть

Сергей Михайлович Дёмин марто васенцеде паро ладсо теевинек содавиксэкс «Эрзянь лисьмапря» фестивальсэ. Сон ютавтневи эрьва иестэ Обран ёнксонь Лукоянова буесэ Кельмелисьмалей лисьмапрянть вакссо. Самай те таркасонть 2011 иестэ саезь ашти эрзянь культурань этнопаркось.

(Ледстясынек, Этнопаркось панжозель эрзянь раськень ине цёранть Николай Иванович Аношкинэнь (эрзякс Аношонь Тумаень) ушодксонзо коряс, кинь паро тевдензэ минек раськенть лезэс содыть весе масторонок келес ды сонзэ томбалеяк. Те ломанесь пек ламо тейсь эрзянь койтнень-кирдатнень ванстомга. «Эрзянь культурань музейденть» башка, конась пурназель Н.И. Аношкинэнь вийсэ ды  панжозель 1992 иестэ. Зярыя иень ютазь (2011 иестэ) путозель васенце кевесь эрзянь культурань Этнопарконтень, конась совась «Этнопарки России» каталогсо уликс 36 объекттнэнь юткс).

Ней, кода уш меринек, те таркасонть эрьва иестэ кизна (мелят – 2023 иестэ – сон ульнесь кемголмовоцеде) ютавтневи «Эрзянь лисьмапря» фестивалесь. Тов сакшныть ломанть эрьва косто, косо эрить эрзят.

Эрзянь раськень ломанень коряс сюпав Пенза ёнксоськак. Тосо арась истямо буе (район), косо авольть эря эрзят ды мокшот. Весемеде ламо сындест, койсэнь, эрить Шемышейской ды Бессоновской буетнесэ. Теде кортыть велень лемтнеяк. Саемс Шемышейской буенть. Тосо, ловт, весе велетнень лемест эрзянь: Каргалейка, Яксярка, Армиёва, Наскафтым, Мачим, Каржимант, Ранго-Лисьма, Янго-Пря.

Ули таго вейке эрзянь веле. Сон ашти Веж-Няньге леенть чиресэ. Лемезэ Ташто Дёмкина. Лемдезь васенце эрицятнень ютксто вейке ломаненть лемсэ – Дёма, Дёмка. Васенцеде ледстяви кода Дёмина веле (1699 ие). А уш 1709 иестэ сёрмадовкстнэсэ сон теевсь Дёмкинакс ды совась Пензенской уездэнь Узинской станс.

Неть сёрмадовкстнэ кармавтыть самс истямо арсемас: ки соды, паряк, неть таркатнес васенце сыцятнень ютксоль С. М. Дёминэнь прапокштянзо покштяськак – Дёма, кинь эйстэ ушодовсь сынст кудораськест? Меремс, Сергей Михайлович сонськак истямо мельс пракшны. Лиякс сынст кудораськесь неть модатнень лангс аволь нолда истят домка ундокст, конатне ней идем вийсэяк а таргавить ды а керявить. Модась, корьмаесь, нейгак кирди эйсэст, а максы туемс ковгак лия таркав шожда эрямонь вешнеме.

Дёмань кудораськень поладыця

– Тесэ видезь товзюро, Захар веленть ёно – шуж. Орлейсэ колмодо ламо гектарт паксянок. Тосо – сякойть... Онцов паксясо виднян чиньжарамо. Эйстэнзэ ой лепштян... Икеле виднинь лияназгак. Ней кадыя... 

Те ёвтни сонсь Сергей Михайлович Дёмин. Ардтано мартонзо эсензэ машинасо сеть паксятнень чирева, конатнень сон кирди эсензэ кедь ало ды касты лангсост сень, мезесь пек эряви ломантненень: товзюро, шуж, чиньжарамо ды лия мезе. 

Ютазь кизна окойники пачколинь сеть таркатнес, косо чачсь ды косо нейгак эри алкуксонь эрзянь цёрась, кода сонсь ёвтызе лемензэ, Пимен Эфрем Минькань Серьга. Истят лемть кандтнесть сонзэ кудораськень кирдицятне. Сынст тевест ней полады сон – Серьга. Нежекс тензэ цёранзо. Кавтотне (Александр ды Валерий) покшт. Умок уш пурнасть-тейсть эсест кудот-ашкот, колмонь-колмонь эйкакшт кастыть. Вейке-вейкест эйстэ ялатеке эзть перьгеде. Нейгак вейсэ пиксить вете тёжадо ламо гектарт паксятнень видемстэ, нуемстэ-пивсэмстэ ды лия тевтнесэ.  Миша цёрынезэяк, кинень ансяк-ансяк топодсть кемень иеть, ёвтнить, аволь весть ойсесь сокамонь-изамонь тракторонь ветнеме. Велесэ истя: киненьгак а сави нузялгалемс. Весенень муеви тев. Седеяк пек «пси» шкасто, зярдо паксятне учить сокамо-видема, сёксня – кенерезенть нуема-пивсэма. Кото ломантненень, зяро важодить сонзэ прявтсо крестьянско-фермерской хозяйствасо, пек стака эрси кенеремс весе тевтнень топавтомо. Секс Сергей Михайлович Миша цёрынензэяк озавтнесы тракторс ды нейке уш тонавты эйсэнзэ паксянь изамо. Пейдезь ладсо мерсь, келя, Света козяйкамгак курок озавтса. Машинань ветнеме машты, кадык тракторонь штурвалонтькак варчасы.

 – Лиякс а кода, – аламодо янксезь седе тов поладсь сон. – Ломаненек а сатныть. Тесэ шкаськак эйсэнек свал капшавты. Эряви кенеремс тевтнень тееме маней ды паро чистэ... Истя вана лакатано-пиксетяно иестэ иес… Кувсетяно-лажнотано… Ялатеке, теке айгорт усктано улавонть эйсэ.

Улавось, конань эйс Дёмин цёранзо марто кильдизе эсь прянзо 1996 иесэ саезь, алкукс аволь вишкинетнестэ ды шождатнестэ. Паксятнень, конатнень ютксто 2,5 тёжат гектартнэ эсест, 2,5 тёжат гектарт сайнить субарендас, коймесэ а чувносыть ды сянгосо                      а изасыть. Тень туртов эряви техника. Ды аволь кодамояк. Улезэ седе од ды неень шкантень ладиця.  Секс сеедьстэ савкшны полавтнемс трактортнэнь. Икеле паксятнень сокильть МТЗ-80 тракторсо. Сынст сеедьстэ эрявсть витнемс. Те тевенть топавтомс арасельть ломанест. Нижней Тагилстэ рамасть лия техника – РТМ-160. Сынь седе виевть. Мейле озасть Т-150 тракторс. Ней уш сокить-видить Кировецсэ.  Од техниканть мельгаяк эряви ваномс. Тапави мезеяк, витнемест кундыть сынсь. Паро, те тевсэнть улить  чарькодицят.

Сергей Михайлович сонськак профессиянь коряс механик. Тонавтнесь васня Мокшанской совхозсо-техникумсо (ней Мокшанской агротехнологической колледж), армиядо мейле прядсь Пензенской сельскохозяйственной институт (ней Пензенской государственной аграрной университет) «инженер-механик» специальностень коряс.  Тонавтнемстэ физиканть коряс экзаменэнть идекшнизе свал «ветес».  Таштазь содамочитне ней пек лездыть тензэ эрьва тевсэ. Маштовсть сынь зёрнань кирдема-ванстома тингень (зернохранилищань) теемстэяк. Мезе эрявсь тень туртов, весе сонсь арсинзе-теинзе. Проектэнтькак, чертёжентькак. Ней тосо малав весе тевтне прядозь. Тингесь (сон 53 метрат келес, 85 – кувалмос) ацазь асфальтсо, саезь лато алов. Чувсть латко, ков кармить нолдамо костязь зёрнанть.  Кадовсь аравтомс зёрнань костямо ды ванськавтома машинат, аэродинамической сепаратор, транспортёрт ды лият-мезть. Лиси цела комплекс.

Эсест хозяйствасо тевтнеде башка эсензэ лангс саинзе мелявкстнэнь велень китнень мельга ваноманть коряс. Кизна сынст лангс секе-тев эрявить ускомс чувар, кевть, лиякс китне тапавить ды ватирькадыть, лангаст машинатненень ардомс ули а кода. Тельня лов пры. Кие лиси ловонь шушмотнень эйстэ китнень ванськавтомо? Дёминдэ башка кияк а капши тень тееме. 

Паро, зярдо улить чарькодицят ды лездыцят. Седе сеедьстэ эрси мекевлангт.  Ульнесть истят тевть, зярдо саят мода, ванськавтсак чувтотнеде ды куракштнеде, сокасак, видят лангозонзо товзюро ды на теть – верде кучить директива, косо вешить неть модатнень велявтомс мекев тов, косто саезельть субарендас. Дёмин нейгак кодаяк а ойми сень кувалма, кода истямо ладсо саизь 546 гектарт моданзо.

– Паро улевель, поладовлизь неть модатнень лангсо сюронь кастоманть. Истя эрси малавгак аволь свал. Седе сеедьстэ одов велявтозь модатне кармить ёмамо тикше-куракш потс, – мартонзо весть кортамсто эзизе кекше ацирьгадоманзо Дёмин.

Истя лиссь сестэяк. Секе иестэнть уш тердизь районов ды кармасть энялдомо икелест: «Цёрат, лездадо. Саинк мекев неть модатнень». Энялдсть саемс моданть, конань кис сынсь кармасть вешеме колмоксть седе питнейстэ. Теке мазысь бензинэнть, солярканть мартояк. Сынст кис питнесь касы-покшолгады чистэ чис. Тень кис тагояк кияк костояк а ёрты ве трёшникак.

Эрьва истямо «лезксэсь» – те таго вейке сыявкс Сергей Михайловичень седейсэ. Те, кода содазь, парс а пачти.

«Пуре латков» –

морамо...

Ардтано мартонзо вейке машинасо. Ветицясь сонсь Сергей Михайлович. Мон вакссонзо озадо аштян бояравакс. Зярдо таго сави ардтнемс паксява паро машинасо?!

Эряви ёвтамс, якинь аволь ськамон ды аволь, кода мерить, сельмень микшнеме. «Ламзурь» ансамблясо лия морыцятнень марто уцяска тенек пракшнось улемс ды морамс Пуре латкосо. Истямо лем кандтни Ташто Дёмкина веленть маласо таркась, ков эрьва иестэ пурнавкшныть вейсэнь покшчис тосонь эрицятне. Те покшчиськак кандтни истямо жо лем – Пуре латко. Умок уш мелем ульнесь тов понгомс. Ды кодаяк эзь лисне. Мелят Сергей Михайлович сонсь тердимизь. Садо, келя. Янксеме а карматадо. Васттадызьгак ды ильтятадызьгак, кода эряви.

Вастымизь алкукс седе а ков парсте. Натой лиснесть каршонок машинасо. А уш кода каванимизь, валом а сатыть ёвтамс. Саранскойстэ инжетнень туртов – илязтано пало чипаенть ало улемстэ – кепедезель эчке коцтонь латалкс (шатёр). Потсонзо ладсезельть моргат-эземть. Ярсамкатне-симемкатне – инязортнэяк, маряви, истят эзть варчне. Ды ялатеке весемеде пек мелезэнек тусь сывель марто ямось. Сон пидезель кшнинь каштомосо, конась теезель Сергей Михайловичень КФХ-нь (крестьянско-фермерской хозяйствань) мастерскойсэ.

Те карми мейле. Васня жо вастомат, кортнемат, морамот, киштемат,  налксемат, каванямот. Нурькинестэ, весе се, мезе эрси, зярдо ломантне пуромкшныть вейсэнь покшчис.

Истямо коесь, зярдо малава аштиця ниле велень (Ташто Дёмкинань, Ташто Захаркинань, Назимкинань, Наумкинань) эрицятне пурнавкшныть Пуре латков моросо-киштемасо седеень оймавтомо – тесэ эри умоктояк-умок. Виде, ве шкасто ломантне кармакшность  стувтомо те коенть. Ды ансяк 2015 иестэ сон вельмевтезель одов. Те тевенть сыргавтыцякс, Сергей Михайловичень валонзо коряс, ульнесь Николай Егорович Гудожников. Кавонест – вейке велень. Вишка пингестэ савкшнось натой вейсэ чийнемс ды хоккейсэ налксемс. Мейле эрямонь кист явовсь. Гудожников тусь ошов, теевсь покш ломанекс. Сон ней генерал. Эри Пензасо. Седеезэ ялатеке а максы стувтомс чачома таркатнень. Ёвтызе мелензэ Сергей Михайловичнень. Тонань, кода свал, сеске сыремсь потмозо. Кода а лездамс истямо тевсэнть? Савсь натой «тюремс» кой-кинь марто, кить арсесть эсь ладсо ютавтнемс те покшчинть. Эзизь максо тень теемс. Коенть кадызь истямокс, кодамокс ульнесь седикеле.

Ней Пуре латкодонть содыть аволь ансяк Пенза ёнкссо эрицятне, содыть лия таркаваяк. Сеедьстэнь инжекс теевсть Мордовиянь морыцятнеяк, конат эсест моросост паролгавтыть ломантнень ёжост, кепедить мелест ванстомс сень, мезесь сась тенст покштятнень-бабатнень пельде. Ютазь иестэнтькак пурнавозтнень туртов паро казнекс ульнесть моротне, конатнень серьгедизь «Ламзурень» аватне. А уш зярдо Пуре латконь кужосо аравтозь сцена лангс лиссь Андрей Бочканов, весе, мерят, иредсть «чапамодо» апак коршта: однэк-сыренек лиснесть киштеме.

Пуре латкосо улемстэ ламо ломань марто савсь теевемс содавиксэкс ды кортнемс. Ламотне эйстэст эзть лотксе ёвтамо шнамонь валт сеть ломантнень лемс, кинь вийсэ анокстави ды ютавтови те покшчись. Седе сеедьстэ ледстнесть Сергей Михайловичень лемензэ.  Келя, эрьва тевсэ васенце лездыцясь – те сон. Сонтемензэ, марят, истя парсте авольть юта Пуре латконь вастовоматнеяк. Весементь эйсэ, мезе теезь те таркасонть, сехте покш путовксозо, келя, сонзэ. Эйкакштнень туртов налксемань таркань теемс эрявсь чувар (песок). Ускицякс ульнесь апак ёвтаяк чарькодеви кие.  Эрявсь сцена путомс, эземть аравтнемс, морамо-киштема таркатнень анокстамс, тикшенть ледемс ды ванськавтомс. Сонтемензэ мезеяк а тееви. Нейке уш прязо сэреди сень кувалма, кода полавтомс  сценанть. Чувтонь лазтнэнь таркас ладямс кшнинь-кевень сэдявкст. Арси седе, кинь кармить тердеме ды мезде каванямо весе ломантнень.

А зяро сюконямот тензэ ульнесть, зярдо ванськавтызь калмазыренть. Пурнынзе-серьгединзе весень, кить понгонесть сельмензэ икеле ды кинзэ лангс. Ниле чить ливезькалесть, пурнасть-ёртнесть наксадозь тарадтнэнь-лопатнень. Вейке чистэ сакшность натой 28 ломанть. Калмазыресь ванськавтозель. Весе велесь ней а лоткси сюконямо тень кисэ.

Кинь эйсэ эрзянь ойме…

Кинь эйсэ эрзянь ойме, се а карми аштеме ве ёно сеть кевкстематнень эйстэ, конат токшить минек раськенть. Сергей Михайлович весе седейсэ мелявты эрзянь раськенть сы шкань уцясканзо кисэ. Кода ванстомс сонзэ, кода а максомс куломо тиринь келентень – неть кевкстематне умок уш а максыть тензэ оймамо. Ды свал анок венстямс лезксэнь кедь сетненень, кить бажить мезе-а мезе теемс эсь раськенть лезэс. Сень содазь, тиринь келесь ванстови ансяк сестэ, зярдо ушодыть сонзэ тонавтомо эйдень кужотнесэ ды школатнесэ, кармась якамо неть учреждениятнева, кевкстнеме, мезе эряви теемс тень туртов, кодат книгат рамамс. Малав эрьва косо вастсть эйсэнзэ «коськестэ» ды а чарькодезь. Тень лангс апак вано, Сергей Михайлович школатнева кармась кандтнеме эрзянь кельсэ книгат, сёрмадстнеме эрзянь журналт, газетат.

Эсензэ ярмак лангс ставтовтсь эрзянь оршамот Пенза ошсо «Умарина» ансамблясо (прявтось А.А. Суслов) морыцятнень туртов. Нейгак паро мельсэ ледстни, зярдо вейке концертсэ те ансамблясь лиссь сцена лангс морамо од оршамосо. Залоськак, мерят, седе валдомгадсь ды мазылгадсь сынст эйстэ.

– Эзинь цидярдо, лисинь монгак, – ёвтни Сергей Михайлович. – Пшкадинь залсо аштицятненень. Мерян, саты арсемс, буто эрзятне свал яксесть раужо ды раздезь нуласо. Ванодо, кодат ульнесть эрзянь оршамотне седикеле…

Неть валтнэде мейле весе залось, келя, кувать цяпась стядо.

Эрзянь койсэ тейневтизе Ташто Дёмкина велень клубонь кшнинь пирявксонть.

Истямо мель превезэнь сась онстон, – чамдызе потмонзо Сергей Михайлович. – Арсян, те покштятне-бабатне кармавтыть эйсэнь. Эряви кунсоломс сынст.

Кунсолынзе. Ней клубонь пирявксось верьга мазылгавтозь кшнистэ тейнезь викшневкссэ. Лия пирявкс истямо а неят костояк. Тень кисэ, нама, савсь пандомс  ярмакт ды аволь аламо. Сергей Михайлович ялатеке а янкси. Кадык, келя, весе ваныть те мазычинть лангс ды дивсить. Паряк, эрзятнень эйстэ куш кой-кинь токави седеезэ, сокордави оймезэ ды те кармавтсы лиякс варштамо се раськенть лангс, кинь эйстэ лиссь.

Те аволь весе, мезе кенерсь тееме Сергей Михайлович. Ёвтнемс весе паро тевдензэ –  колмошка читнеяк а сатыть. Теке марто превсэнзэ-удемсэнзэ кирди седеяк ламо бажамот. Мелезэ ули ламо теемс. Ансяк вийтне, келя, аволь свал сатыть…

Кшнинь обуця…

Вишка порасто Сергей Михайлович вечксь ды маштсь эрьва мезень тееме. Тельня ялганзо марто кирякстнеме лисильть. Весе нурдынесэ (салазкесэ). Кинь чувтонь, кинь – натой кшнинь. Сон ськамонзо кирякстниль аволь нурдынесэ, озыль… танка лангс ды геверь-гуверь аловпандт. Танкась, нама, аволь алкуксонь. Теилизе сонсь. Саиль пекшень мукорь, керсилизе-лаксилизе кода эряви, теилизе танка ёнов молицякс. Эйсэнзэ ульнесь башня, ствол. Лисиль Т-34 танкань кондямокс. Кирякстнемстэ пандо прясто весе шожда нурдынесэ ардыльть, конанть аволь стакаль мекев кузтемс. Ансяк сонензэ савсь кандтнемс колмошка пондонь сталмосо те мукоренть ськамонзо. Оймезэяк лисиль тень пингстэ. Ялатеке кандыль танканть эйсэ пандо пряв.

Истя пек вечкиль танкат, мезе потсонзояк – нучк-пачк тонавтнизе. Онстонзояк ансяк танкат несь. Пек покшоль мелезэ ардтнемс. Ды теке сонсь Пазось маризе: армияв служамо понгсь танкистэкс. Те ульнесь Мокшанской совхоз-техникумонть прядомадо мейле, 1979 иестэ. Сядо сизьгемень вете мартонзо тонавтницятнень ютксто танкистэкс саезельть ансяк кемгавтово од цёратне. Сергей Михайлович нейгак покш мельсэ ледстни се шкадонть.

Кеме обуцязо нейгак ванстовсь. Бути мезе арси теемс, верть судостонзо – ялатеке а поты. Урлейка велесэ, косо ней эри Света козейканзо, Миша цёрынензэ ды Саша тейтернензэ марто, эйкакштненень ды од ломантненень тельня а косоль кирякстнемс ды налксемс хоккейсэ. «Те а тев»,- эстензэ мерсь Сергей Михайлович ды кундась эень катоконь  тееме.  Керсизь а эрявикс чувттнэнь, ванськавтызь тарканть, почодызь чуварсо ды кармасть аламонь-аламонь валномо ведьсэ. Пиризь ловонь шушмосо. Курок эень аренась ульнесь анок. Лангсонзо ютавтнить пелькстамот, од ломантне ды эйкакштне ардтнить-кирякстнить конькасо.

Газетасо-косо а лотксить шнамонзо. А вана ломантнень ютксо эрьва кодат эрсить. Вастневить истяткак, кить (нама, сельмень сявадомадонть) пейть порить лангозонзо, пильгеть путнить. Ульнесть истят тевтькак: вешильть кедьстэнзэ зёрна эли лия-мезе, алтыльть велявтомс эли пандомс ярмаксо, – сынсь ёмильть. Азё вешнек ды вешик кедьстэст максозенть! Сергей Михайлович а вечки судга-кудга якамо. Ацирьгали-абунгали аламос, эсь пачканзо крои-теи, кежень пачк сельги ды весе. Седейсэнзэ сыремезь апарось шкань ютазь, паряк, мади-лепами. Кежть ялатеке а карми кирдеме кувать. Цёрантень, келя, эряви улемс кемекс ды нардевекс. А стяко кой-кить лемдить эйсэнзэ «кшнинь обуця» ломанекс.

Кодамо чувтось,

истят тарадтнэ

Кикс сон тусь? Сонсь Сергей Михайлович тень коряс корты истя: кодамо чувтось, истят тарадтнэ. Ды ушоды ёвтнеме тетядонзо-авадонзо, покштядонзо-бабадонзо. Ушоды васолдо. Кие ульнесь Пимон прапокштязо, зяро эйкакшт мастор лангс нолдась Эфрем покштязо. Мейле туить тетянзо-аванзо лелятне-ялакстнэ, патятне-сазортнэ. Сындест аволь аламо. Ловомстост натой тапавинек. А стувтни лембе валсо ледстнемс аванзо ёндо Евдокия Павловна сырькаензэ. Авазо чачомань коряс Мачкасы велестэль. Эйкакшпорава сеедьстэ каднылизе сырькаенстэнь. Те шкас Сергей Михайлович эзизе стувто, кода сырькаензэ   мельга пулопекс яксиль. Вечкиль кунсоломо, зярдо ёвтниль тензэ мезеяк.

Сонсь Сергей Михайловичкак кассь аволь ськамонзо. Михаил Ефремович тетянзо ды Раиса Ермолаевна аванзо сындест ульнесть  ветенест. Ды весе кассть шумбракс, тукшность паро киява.   

– Монь родсо арасельть лавшо обуця ды нузякс ломанть, – корты сон ды полады: – Те, паряк, секс, трямстонок-кастомстонок эзть кольневте  эйсэнек.

Эсензэ эйкакштненьгак Сергей Михайлович кирди, кода кортыть, коморо потсо. Ваны мельгаст, иляст понго апаро тевс. Лиясто эрси, мурнемскак ды парынестэ «судрямскак» савкшныть. Весть неизе васенце цёранзо иредезь. Ветизе кудов. Мерсь озамс столь экшс. Икелензэ путсь тетрадь, макссь ручка. Ды рисовазь буквасо кармавтызе сёрмадомо истят валт: «Монень симемс а эряви». Истямо ладсо эрявсь пештямс весе тетраденть. Чумонь нолдыцянть виезэ сатотсь пачкодемс тетрадень пелевидьс – прась ёжовтомо.

Мертядо, сон тейсь пек казямосто. Паряк, истяяк. Ансяк седе мейле цёразо кургос эзь сайне «чапамодонть» ды ней сон – Сергей Михайловичень сехте кеме нежезэ.

Молемс ансяк

икелев

…Сергей Михайлович эйкакш пингестэ саезь прянзо мари ансяк эрзянь ломанекс. Зярдояк тень эйстэ эзь визде ды эзь кекшне. Мекевлангт, свал аштесь ды ашти тень кувалма покш каштанчисэ.  Истямокс касты эйкакшонзояк. Эрзянь раськень покш чис яки аволь ськамонзо, сайсынзе эйкакшонзояк, нуцьканзояк. Ды весе сынст лангс, кода эстензэяк,  ставтовтсь эрзянь оршамот.

Седе, кодамо уцяска сатотсь эрзянь раськентень, кодамо сюпав ды кувака эрямо пинге печтясь сон, теде Сергей Михайлович соды, маряви,  сехте превей историктнедеяк парсте. Марявсь тень, арась истямо сёрмадовкс, косо ёвтнемась молевель эрзятнеде, конань бу сон аволизе ловно. Сонсь Сергей Михайлович а вечки шнамо прянзо.

– Арась, – корты, – мон аламо мезе ловнынь. Гумилёвонь эзия ловно. Мельниковонь-Печерскиень истя жо. Тень таркас лопань пес «изынь» «Мордва Российской империи» ды «Мордовия в составе России» книгатнень. Сынь нолдазельть Россиянь государствас эрзятнень-мокшотнень совамонь шкасто саезь тёжа иетнень топодемантень.

Те таркасонть сон лотказевсь. Аламос арсемадо мейле, теке мерят, юксевсь валонь паргозо, ушодсь кортамо. Кодат, келя, тёжа иеть? Кие ды косто саинзе сынст?  Россиянь империяс эрзятне, келя, бути совастькак, ансяк Иван Грозноень шкадонть мейле, косояк 1500 иетнестэ. Натой 600 иетькак эзть топоде теде мейле.

Седе тов седеяк кармась историянть эйсэ «сокарямо», таргсеме эйстэнзэ ютазь шкань суреть-суринеть. Ды истя превейстэ, кунсоловлить эйсэнзэ ды аволить пешкеде. Косо валтнэнь эйсэ керьксазь керьксась, косо цифрат таргсесь. Азё мук истямо удемев ломань, кона маштоволь кирдеме превсэ-мельсэ весе сень, мезенть ловнызе ки соды зярдо. Шныксэлия ламо содамочинзэ кисэ, Сергей Михайлович сеске каршон:

– Содыцясь мон берянян. А вана ялаксом Саша, се – алкукс ламо соды. Книгат ловны улавонь улав. Ды весементь кирди превсэнзэ-удемсэнзэ… Сонсь эрьва мейсэ чарькоди. Мейсэ сэреди ормалгадозь ломанесь, врачнень апак яка ёвтасы.

Монень аволь весть савкшнось некшнемс Саша ялаксонзо. Иень коряс сон седе од. Ансяк ялатеке а ловсак цёрынекс. Ведьгемень иетнень, арсян, эскельдинзе. Сергей Михайловичень туртов ялатеке кадови вишка ялаксокс, секс лемдияк эйсэнзэ Сашакс. Обуцянь коряс сон, келя, лелядонзо кеме ды нардев. Истя жо, кода Сергей Михайлович, вечки якамо покш таркава, ков пурнавкшныть эрзят: «Раськень озкс» (Мордовия), «Эрзянь лисьмапря» (Обран ёнкс), «Эрзянь Покш чи» (Пазялго) ды истя седе тов. 

Лелянть ды ялаксонть Пазось вейкетьстэ казинзе мазычисэяк, виевчисэяк. Кавонест мейсэ-бути молить Кузьма Абрамовонь «Пургаз» романсо невтезь Обранонь ёнов.  «Ломанесь сон виев ойме. Рунгозояк виев. Иетнень лангс апак вано, ашти видестэ. Мезненьгак сон эзь мендяво – а тюремасо, а важодемасо. Од шкастонзо, ёвтнить, ськамонзо сявордиль лишмешка сярдо. Кундылизе сюродо, пурдылизе прянзо ды рестедилизе масторов. Кедь виензэ нейгак эзть машто. Кепедемстэ чочко пентень, конанень кундамаль колмонень, сон кунды ськамонзо. Мокшнасо вачкодезь синди лаз пе».

Истят жо виевть ды нардевть лелят-ялакстнэ Дёминтнэ. Кавонест прок кавто тумот, кеместэ аштить пильге лангсо. Сень лангс апак вано, мезть ансяк пряваст эзть юта. Вармат-даволт, пиземеть-цярахмант, ормат-тармот. Виест сатстневтить пря а максомс кодамояк зыянтнэнь ды стакачитнень каршо, весементь цидярдомс ды молемс, молемс ансяк икелев. Мельгаст ветить эйкакшосткак. Истямо виевекс ды нардевекс, Сергей Михайловичень валонзо коряс, сынст эйсэ теи тиринь модась…

Раиса Щанкина,

Россиянь Журналистэнь союзс совиця.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».