Мордовия Республикань умонь предприятиятнестэ вейкесь – «Комбинат теплоизоляционных изделий» ООО-сь. Тосо нолдавиця продукциясь микшневи аволь ансяк минек республикасо – масторонь келес.
Аволь пек умок савсь улемс те предприятиясонть ды кортамс генеральной директоронть Александр Леонидович Гурьянов марто. Сонзэ марто минек мельтне вейсэндявсть сень коряс, куш кодамо предприятиясо сехте питнеесь – тосо важодиця ломантне. Сынст ёжост эйстэ ашти васняяк се, кодамо лезэ кандыть коллективентень, паро-аволь качествань нолдыть продукция, ули-арась шкаст оймсемс ды витемс мелест. Течи ламо ёвтнетяно сеть ломантнеде, кить пингест алтызь тиринь предприятиянтень, кить эсь уцяскаст, эрий ялгаст вастызь эсест важодема таркасо.
Пингензэ перть вейке предприятиясо
«Комбинат теплоизоляционных изделий» ООО-нь сехте умонь важодицятнень юткс сови Михаил Иванович Давыдкин. Васень варштавкс лангс сонзэ эрямо кись аламо мейсэ явови лиятнеде. Мокшонь цёрась чачсь-кассь Ельникень райононь Молчанова велесэ ламо эйкакшонь триця семиясо.
Тетязо, Иван Никитович, ды авазо, Елена Яковлевна, трясть-кастсть кото эйкакшт. Эрьванть тонавтсть улемс алкуксонь ломанекс ды свал бажамс содамочитнес.
Те меленть алкукс топавтызе Михаил цёрынест, мезень коряс те шкас ашти каштанчисэ вейксэньгемень ниле иесэ авазо Елена Яковлевна. Тешкстасынек, тетязо ды авазо пингень перть важодсть тиринь велесэ.
Ледстясынек, Михаил Иванович школасо тонавтнемадо мейле васня прядызе Краснослободской велень хозяйствань техникумонть, мейле тусь масторонть икеле долгонзо топавтомо – армияв. Тосто самодо мейле сась важодеме Саранскоень «Комбинат теплоизоляционных изделий» предприятияв. Од специалистэнть васень шкасто ладизь мастерэкс, мейле ульнесь старшей мастерэкс, цехень прявтокс, главной механикекс, главной инженерэкс.
Меельце иетнестэ кармась важодеме те предприятиянь снабжениянь отделэнь прявтокс.
Кода вере ледстинек, Давыдкинэнь семиясо покш мель явить одонть тонавтнемантень, ламо содамо бажамонтень.
Истя, Михаил Иванович эрямонь перть снарты тонавтнемс. Пенсияв лисемадо мейлеяк эзизе ёмавто эрьва мезень содамо меленть.
Кодгемень иетнень топодемадо мейле тонавтнесь Н. П. Огарёв лемсэ Мордовской государственной университетэнь Аграрной институтонь велень хозяйствань механизациянь факультетсэ. Виде, ней уш сон те предприятиясонть ламо од важодицятнень туртов паро наставник. Теке шкасто эзть стувтово тензэ сеть ломантне, кить производствасо васень эскелькстнэнь теемстэ ульнесть сонзэ тонавтыцякс, превень максыцякс.
Те шкас лембе валсо ледстни наставникензэ Александр Харченконь, Александр Носовонь ды ламо лиятнень, кить свал анокт ульнесть тензэ лездамс.
Тешкстасынек, наставникень, лиякс меремс, одтнэнь тонавтыцянь тевесь меельце шкастонть таго кармась вельмеме минек республикасо. Эдь те коесь ульнесь пек паро советской шкастонть, мейле сон аламонь-аламонь кармась стувтовомо. Паро, ламот сонзэ ледстизь ды совавтыть эрямос.
Наставниктне сестэ пек ламос тонавтызь од специалистэнть. Ней, удалов варштазь, Михаил Иванович сонськак таштась покш опыт кода ломантнень марто кортамонть, истя продукциянть лезэвстэ ды парсте миеманть коряс. Нать, а стяко сонзэ казнетнень ютксо – Мордовия Республикань Почетонь грамотась, Саранск ошонь округонь Октябрьской райононь прявтонь Благодарностесь.
Эрьва ломаненть эсензэ эрямо кизэ, кинень, кинь марто вейсэндявомс ды пингенть ютавтомс, нать, сонсь Вере Пазось ладясы.
Сизьгеменце иетнестэ сестэ эштё Валентина Прокина (тейтерьксэнь фамилиязо), ней Давыдкина, Чаунзань райононь Комсомольской посёлкасо Индустриальной техникумонь прядомадо мейле кучомань (направлениянь) коряс сась важодеме «Комбинат теплоизоляционных изделий» предприятияв. Од тейтерентень тосо муевсь паро тев – важодемс лабораториясо, шкань ютазь тердизь вейке цехев мастерэкс.
Самай се шкастонть Валентина Прокина теевсь содавиксэкс од цёранть Михаил Давыдкин марто. Одтнэ аволь пек кувать вастневемадо мейле сайсть мель урьвакстомс-венчамс. Истя вейсэндявсть Давыдкинтнэнь ды Прокинтнэнь раськетне. Кавто иень ютазь чачсь Эдуард цёраст, 1982 иестэ – Александр. Од семиясь эрьва тевенть топавтсь вейсэ. Васень шкасто предприятиясь сыненст макссь вишка комната. Мейле – вейке комнатас квартира, седе тов – кавто комнатас. Мезть течи бу авольть корта эрямодонть, Давыдкинтнэнь семиянть варштавксонзо коряс, икеле ялатеке седе паро ульнесь. Сыненст предприятиясь питневтеме явсь мода модамарень путомс, макссть дача, ков семиянек яксесть оймсема читнестэ.
Теде башка, сынь кенерильть содавтомо тетятнень-аватнень кода Ельникень районсто, истя Чаунзань ёнксонь Покш Эрьмезенка велестэ.
Тешкстасынек, ней, зярдо Давыдкинтнэ лиссть пенсияс, сынь витнизь-петнизь Покш Эрьмезенкасо уликс тетяст-аваст кудонть, косо ламо эйкакшонь семиясо чачсь-кассь Валентина Архиповна. Тетязо, Архип Кириллович, ды авазо, Анна Константиновна, истя жо трясть-кастсть кото эйкакшт ды эрьвантень макссть вийть ды превс путомат эрямос алкукс ды видестэ совамонтень.
Давыдкинтнэнь кавонест цёратне тонавтнесть вузсо, ней эрьванть ули семиязо. Покшось, Эдуард Михайлович, кармась улеме строителекс, важоди тевень содазь ды весть кочказь профессиянь вечкезь. Нинзэ марто трить-кастыть колмо эйкакшт: Мишань, Андреень, Левень. Омбоце цёраст, Александр Михайлович, важоди Н. П. Огарёв лемсэ Мордовской государственной университетсэ наукань коряс проректорокс. Сонзэ истя жо колмо эйкакшонзо: Владислав, Анна ды Злата.
Весе те покш семиясь вечки кенярксчитнестэ пурнавомо вейсэ тетяст-аваст кудосо, тосо, косто амольдить вийть икелев эскельдямонтень, кеместэ ваномс вандынь чинтень. Истя тейсть сынст покштяст-бабаст, истя теи ояксчисэ эриця Давыдкинтнэнь семиясь.
Эрьва тевсэ вейсэть
«Комбинат теплоизоляционных изделий» ООО-со газооборудованиянь коряс слесарекс ламо иень перть важоди Михаил Никитин. Михаил Алексеевичень чачома ёнксозо – Дубёнкань райононь Кендя (руз. Чиндяново) велесь. Сонзэ эйкакшпингезэ ютась покш семиясо, косо эрьвась содылизе кшинть питнензэ. Ледстнеманзо коряс, кудоютконь тевтнень топавтсть весе вейсэ. Тетязо-авазо, Алексей Степанович ды Татьяна Егоровна, трясть-кастсть вете эйкакшт. Михаил ульнесь веженсекс. Школанзо прядомадо мейле сон тусь Саранскоев, тонавтнеманзо поладызе васенце номер профессиональной училищасо. Трудовой пингезэ ушодовсь «Комбинат теплоизоляционных изделий» предприятиясонть. Се шкане тосо прявтокс ульнесь Рюрик Громов. Рюрик Павлович покш питне путсь эрьва важодиця ломанентень. Зярдо од цёрась урьвакстомадо мейле тукшнось лия предприятияв, прявтось эзь сода, кодамо тувталонь коряс. Тевесь ульнесь эрямо таркань аулемасо. Сон тердизе одов важодеме теке предприятиянтень ды саизе переводонь коряс.
Тешкстасынек, нинзэ Михаил Алексеевич вастызе теке комбинатсонть. Полина Васильевнань чачома ёнксось – Горьковской областень (ней Нижегородской) Вознесенской районось. Мирдть-нить, ловт, пингест перть важодсть вейсэ тиринь предприятиясонть, Михаил Алексеевич полады тевензэ те шкас.
Оймсема читнестэ ды отпусконть ютавтомсто сынь свал вейсэть: якить Саранск ошонть эйстэ аволь васоло уликс дачазост ды Дубенкань райононь Кендя велев. Тосо, тиринь велесэ, вельмевтизь тетяст-аваст кудонть, парсте витнизь сонзэ ды секе-тев тов ардтнить эмежень-мезень кастомо.
Истя, вейсэ важодезь ды оймсезь, сынь тризь-кастызь тейтерест Юлиянь, ней жо покш мельспаросот кавто нуцькаст Ульянань ды Аленань кувалма. Те ли аволь уцяска?!
Уцяскав семиясо – уцяскав важодема таркасо
Николай Николаевич Афонькин марто «Комбинат теплоизоляционных изделий» ООО-со улемстэ вастовинек сонзэ важодема таркасонзо. Те предприятиянтень сон сась 2002 иестэ, сеске кармавтызь улеме васенце цехень электромонтёрокс. Кода мерсть те предприятиянь прявттнэ, тевензэ содасы парсте ды топавты шкастонзо.
Сонзэ чачома ёнксось – Сыре Шайговань Од Фёдоровкась. Истя жо ялгатнень ладсо чачсь-кассь ламо эйкакшонь триця семиясо. Валонзо коряс, трудовой пингензэ ушодызе Литейной заводсо, мейле тусь армияв, служась Дальней Востоксо Уссурийск ошсо. Вейксэньгеменце иетнестэ важодсь НИИ-нь Вычислительной центрасо, ульнесь КПП-нь слесарекс. Самай се шкане сонензэ прась уцяска молемс тонавтнеме Рига ошов. Тосо уликс Вычислительной центрасо пурнась содамочить велень хозяйствань техникань коряс. Кода кортыть, кепедсь квалификациянзо. Неть содамочитне маштовить тензэ те шкас, нолды тевс эрьва чинь важодемасо.
Эсь шкастонзо урьвакстсь. Вейсэ Светлана Николаевна нинзэ марто трясть кавто тейтерть. Ней уш Оксана ды Наталья лиссть мирденень ды казсть тенст кавто нуцькат. Николай Николаевич уцяскав кода важодема таркасо, истя семиясояк.
Валентина Юдина