Саранскойсэ моли «Театральная осень» Россиянь раськень театратнень 5-це фестивалесь. Недлянь перть сон карми молеме Эрзянь ды мокшонь драматической театрасо. Фестивалень ютавтыцясь – РФ-нь Культурань министерствась. Васенцеде раськень театратне пурнавкшность 2019 иестэ Крымсэ, мелят – Владикавказсо. 2023 иесь Мордовиясо яволявтозь Раськетнень вейсэндявомань иекс, секскак ютавтомань таркакс кочказель минек регионось.
Фестиваленть панжомадо икеле журналисттнэнь марто вастневсть Санкт-Петербургонь «Балтийский дом» театранть-фестиваленть прявтось С. Г. Шуб, МР-нь Культурань, национальной политикань ды архивень тевень министрань васенце полавтыцясь А.И. Карьгин, Эрзянь ды мокшонь драмтеатрань прявтось С. И. Дорогайкина, театрань критикесь А.Оганесян.
– Мон ледстнян, кодамо спектакля марто сакшность Мордовиянь Нацтеатрань артисттнэ васенце фестивалентень, мезе невтсть ды кода морасть тейтерь-аватне! Минек весень дивавты ды кецявты раськень театратнень культурась. Сынь – Россиянь койтнень-кирдатнень ванстыцят, секс пек эрявить тенек. Мелят «Театральная осень» фестивальсэнть ламо ульнесть национальной регионтнэнь рузонь театратне, сынсткак а стувтнемат. Невтезель рузонь литературань классикась раськень кельтнесэ. Тедеде покш мель явови эрьва кодамо кельсэ ютыця спектаклятненень. Фестивалесь – алкуксонь кенярксчи ваныцятненень, артисттнэнень. Самай тесэ редяви, кода эри келесь, кодат улить койть-кирдат ды раськень культурат, – пачтясь «Балтийский дом» театранть-фестиваленть прявтось С. Г. Шуб.
Сонзэ валонзо поладынзе Эрзянь ды мокшонь драмтеатрань прявтось С. И. Дорогайкина:
– Сюкпря минек региононть кочкамонзо кис. Эрьва театрась уски мартонзо эсензэ цецянзо. Весе неть цецятнестэ пурнави раськень театратнень пусмо. Эрьванть эсензэ келезэ, культурань сюпавчинзэ, башкачинзэ, се, мезде явови лиятнень эйстэ. Мезть кортамс, минь зярдояк а пачкодтяно спектаклянь ваномо Бурятияв эли Чечняв. Васоло ёнксонь театратне сынсь састь тенек. Ды кода а молемс ваномост? Минек туртов те покш кеняркс.
Эряви меремс, артисттнэнь туртов ютавтовить сценической кортамонь коряс мастер-класст, лекцият.
«Театральная осень» фестиваленть панжомо сакшнось МР-нь Прявтось Артём Здунов.
– Минек эйсэ учить пек мельстуиця путовкст. Национальной театратне невтьсызь эсь мазычист. Сюкпря ёвтавлинь РФ-нь Культурань министерствантень, конась лезды пурнавомс раськень театратненень. Минь мольтяно икелев ансяк сестэ, зярдо ютксонок улить вейсэнь важодема, вейсэнь тевть. Те фестивалесь самай лезды тенень, – кортась МР-нь Прявтось.
Фестивалень васенце чистэнть ваныцятненень невтезель В. Мишанинань «Куйгорож» спектаклясь (реж. Б. Манджиев). Те путовксось 2019 иестэ саезь кармась театранть визитной карточкакс. Сон аволь весть тешкстазель театрань регионъютконь пелькстамотнесэ. Истямо фестивальсэ невтеви васенцеде. Пьесанть юрсо – мокшонь кезэрень ёвксось. Спектаклясонть налксить МР-нь заслуженной артисттнэ Дмитрий Мишечкин, Елена Гудожникова, Тимофей Чудаев, Ольга Надорова ды лиятне. Ламот сонзэ ванкшнызь натой аволь весть. Ды сон свал мейсэ-бути одс дивавты.
Неть читнень перть спектаклят невтсть Санкт-Петербургонь «На Литейном» драматической театрась, Дагестанонь Э. Капиев лемсэ Лакской государственной музыкально-драматической театрась, Татарстанонь Г. Камал лемсэ государственной академической театрась, Башкортостанонь М.Гафури лемсэ драмань академической театрась.
Капшадо, билеттнэде кадовсть пек аламо. Весе спектаклятне ютыть синхронной ютавтома марто.
Татьяна Маторкина
Сентябрянь 11-це чистэ И. М. Яушев лемсэ музыкальной театрань конференц-залсо ютавтовсь Россиянь раськень театратнень конференциясь. Мордовия Республикань Прявтонть пельде поздоровт ды паронь арсемат ёвтась МР-нь Правительствань Председателень васенце полавтыцясь Галина Лотванова.
Пурнавозтненень видеоприветствия марто пшкадсь Федерациянь Советэнь Наукань, образованиянь ды культурань коряс комитетэнь прявтось Лилия Гумерова. «Национальная театральная школа» весероссиянь просветительской проектэнь васенце сезононть важодемадо пачтясь Россиянь Национальной драматической театрань (Александрийской театрань) прявтось Сергей Емельянов. Седе тов невтевсь тенень алтазь итоговой роликесь. Россиянь Раськень театратнень ассоциациянь вейсэнь проекттнэде пачтясь Россиянь Раськень драмань театрань «Ассоциация национальных театров» АНО-нь исполнительной директорось Игорь Троилин. Конференциясонть ламо кортавсь Россиянь раськень театратнень вейсэнь проекттнэде. Кода те кевкстеманть коряс ветявить тевтне Северной Кавказсо, пурнавозтненень пачтясь Советской Союзонь Героенть Ханпаша Нурадиловонь лемсэ Чеченской государственной театрань прявтось – художественной руководителесь Хава Ахмадова.
Россиянь раськень театратнесэ неень шкане уликс стакачитнеде, кадратнень анокстамодо, эрямос од ёнкстнэнь совавтомадо ды ламо лия талновтыця кевкстематнеде ёвтызь мелест конференцияв лия сыцятне.
Теде мейле журналисттнэнь кевкстемаст лангс толковамот макссть МР-нь Правительствань Председателень васенце полавтыцясь Галина Лотванова, Россиянь Национальной драматической театрань (Александрийской театрань) прявтось Сергей Емельянов ды Советской Союзонь Героенть Ханпаша Нурадиловонь лемсэ Чеченской государственной театрань прявтось – художественной руководителесь Хава Ахмадова.
Валентина Юдина