Зярдо костояк марясак писателенть Никул Эркаень лемензэ, сеске мелезэть леди сонзэ «Алешка» повестесь. Те произведениясь Детгизсэ лиссь 1962 иестэ ды пек тусь мельс вишка ды покш ловныцятненень. Вете иень ютазь нолдазель «Алешка интернатсо» повестень омбоце пельксэсь. Книгась ютавтозель СССР-нь республикатнень ламо кельтнес.
Маень 22-це чистэ топодсть 120 иеть Никул Эркаень чачома чистэнзэ саезь. Тень коряс лембе кенярксчи ютась Ромодановань райононь Культурань кудосо. Тосо мольсть Эркаень лемсэ ловномат. Сынь эрсить эрьва иестэ, тедеде, эряви меремс, ютасть келейстэ, мазыйстэ, парсте анокстазь. Тосо ульнесь минек редакцияськак.
Васняяк школань тонавтницятне ды инжетне путсть цецят Никул Эркайнень кеврунгонть ваксс. Сон ашти райононь библиотеканть икеле, конась кандтни писателенть лемензэ.
Никул Эркай (алкуксонь лемезэ Николай Лазаревич Иркаев) чачсь 1906 иестэ Ромодановань райононь Курилова эрзянь велесэ. Семиясост сон сисемеце эйкакшоль. Революциядо икеле прядсь колмо классонь школа. Мейле кучозель тонавтнеме Пензань васенце юронь совпартшколав. Седе тов прядызе омбоце юронь совпартшколанть. Тонавтнесь журналистикань Весесоюзонь коммунистической институтсо. Самай те шкастонть сон явсь покш мель сермадомантень. 1932 иестэ лиссь «Модась одкстомсь» поэзиянь васенце пусмозо.
Никул Эркай важодсь мокшэрзянь культурань НИИ-сэ, «Якстере теште», «Эрзянь коммуна», «Советский артист», «Полярная кочегарка» газетатнесэ, «Сурань толт» журналсо.
1934 иестэ ульнесь СССР-нь сермадыцятнень васенце съездсэ. Теке жо иестэнть сонзэ совавтызь те союзонь членэкс. Билетэнть тензэ сермадстызе сонсь Максим Горький.
Ине Отечественной войнанть ушодовомсто Н. Эркай эсь мельсэ тусь фронтов. Ансяк шумбрачинзэ кувалма мекев савсь велявтомс. Кармась важодеме «Эрзянь коммуна» (ней – «Эрзянь правда») газетасо. 1941–1943 иетнестэ ульнесь газетань ответственной секретарекс, редакторонь полавтыцякс, газетань ответственной редакторокс. Те шкане ды войнадо мейле сон нолдась произведениянь зярыя пусмот.
Эряви меремс, ламо книганзо авторонть нолдавсть Московонь издательстватнесэ. Произведениянзо сеедьстэ лиснесть центральной газетатнесэ ды журналтнэсэ, ютавтовсть эрьва кодамо кельс.
«Алешка» повестенть кисэ Никул Эркайнень максозель Мордовиянь Ленинской комсомолонь премия. Лия содавикс произведениянзо – «Килей ведь», «Од родня», «Митяевы мечтания» – нолдазельть тагояк Московсо. Сон ульнесь васенце, кинень максозель «Мордовиянь заслуженной поэт» лемесь.
Кенярксчисэнть Эркаень стихензэ ловность тонавтыцясь Николай Карпов, школань тонавтницятне ды Эрзянь ды мокшонь национальной драматической театрань артисттнэ.
– Никул Эркай ульнесь «Сятко» журналонь прявт редакторокс 1956–58 иетнестэ. Весе сермадовксонзо лиснесть журналсонок. «Алешка» повестезэ эри эрзянь эйкакштнень седейсэ, кода сехте вечкевикс произведения. Сонзэ пельде ули мезес тонавтнемс неень шкань сермадыцятненень. Кеман, сермадовксонзо кармить эрямо ды эрявомо сы шкань эрзятненень. Миньгак бажатано ванстомс лемензэ. Кецявты, Ромодановань районсо путыть питне сонзэ лементень, – кортась «Сятко» журналонь прявт редакторось Л.А. Ломшина.
– Минек библиотекасо ванстовить Никул Эркаень весе книганзо, васенцетнень эйстэ саезь. Улить вейсэнь пусмонзо, публицистикань материалонзо. Пек вечксынек творчестванзо. Апак кавтолдо мертяно, книганзо – настольной книгат. Творчествазо эри те шкас, – кортасть А.С. Пушкин лемсэ библиотекань национальной ды краеведениянь литературань отделсэ важодицятне Н.В. Бочканова ды В.Б. Бояркина.
Лембе ледстнемат Никул Эркайде евтнесь роднязо-раськезэ – МР-нь СМИ-нь заслуженной важодицясь Николай Николаевич Иркаев (рузкс меремс, внучатой племянникезэ):
«Мон чачинь ды эринь Куриловасо, се кудосонть, косо чачсь Эркай, ды мейле сон сеедьстэ сакшнось миненек. Инжекс самозо ульнесь алкуксонь кенярксчикс. Чаво кедть а сыль, свал казне марто. Весть, усксь тенек, эйкакштненень, калонь кундыцянь наборт. Саимизь мартонзо вирев ды лей лангов калонь кундамо. Пидесь тенек штюрьба. Тосто ютамсто пештень чувтосто весенень тейнесь вешкемкат. Кудов ютынек вешкезь-моразь!
1950-це иетнестэ Иркаевтнень кудос инжекс сакшность Артур Моро поэтэсь, Илларион Яушев содавикс морыцясь. Сынь невтсть клубсо велень эрицятненень концерт.
Никул лелясь паро мельсэ кортыль велень ломантнень марто, ламотне кармасть сонзэ произведениянь персонажокс. Кирдсь ялгат, весенень бажась мейсэяк лездамс. Куриловасо Ине Отечественной войнань шкане панжозель уроз эйкакштнень туртов приют. Те темаськак кармась евтнеманзо ды повестензэ юрокс. Пек лембестэ поэтэсь сермадсь тетядонзо-авадонзо, тиринь веледензэ, косо тунда ашолдыльть садпиретне, сермадсь ванькс лисьмапрятнеде, тесэнь ломантнеде. Сон ульнесь тиринь масторонь алкуксонь вечкицякс.
1986 иестэ, писателенть чачома чистэнзэ саезь 80 иетненень, Саранскойсэ вейке куронтень максозель Никул Эркаень лемесь. Ромоданова поселкань вейке курось истя жо кандтни лемензэ. Сюкпря весенень, кить анокстызь Эркай лемсэ ловноматнень. Мон аштян каштанчисэ сонзэ кувалма».
Ольга Михайловна Томилина важоди Ромодановань райононь Никул Эркай лемсэ библиотекасо. Сон чачсь Ицялбуень Селища велесэ. Школань прядомадо мейле тонавтнесь Н.П. Огарев лемсэ МГУ-нь Историко-социологической институтсо. 11 ие роботась райононь Соцзащитасо клиентэнь службань специалистэкс. Библиотекасонть жо важодсь авазо Т.В. Киселева. Аванзо куломадо мейле, шкань ютазь, Ольгаяк сась роботамо библиотекав. Ней сон искусствань ды краеведениянь секторсо библиотекарь. Васты ловныцятнень, ютавты школань тонавтницятнень марто эрьва кодат вастовомат ды кенярксчить, экскурсият. Мезе парось, библиотекасонть ули эсест музеест, конась пек тукшны мельс эйкакштненень.
– Библиотекасо важодемась седеяк вечкевсь тень. Тесэ муинь эстень ламо творческой тевть. Карминь содамо сень, мезде икеле а содылиньгак. Кодамо сюпав минек райононь историясь, а кодат лия енов а молиця покш ломанть тесэ чачсть! Варчинь виень сценариень сермадомасо, те тевеськак оймень коряс. Зярдо эйкакштненень туи весемесь мельс – седеяк бажат теемс мезеяк од. Минь умок ушодынек анокстамо ютавтомс Эркай лемсэ ловноматнень. Сонзэ лемензэ а стувтнетяно. Мезесь дивавты ды кецявты – Курилова эрзянь велесэнть чачсть аволь аламо содавикс ломанть: Никул Эркайде башка, РСФСР-нь ды МАССР-нь заслуженной артистэсь Д.И. Еремеев, РСФСР-нь ды МАССР-нь народной артисткась Р.М. Беспалова, покш ученойть, тонавтыцят. Сы иестэ топодить Д.И. Еремеевень чачома чистэнзэ саезь 100 иеть. Карматано келейстэ тешкстамо, – евтнесь Ольга Михайловна.
Неень шкане Ромодановань райононь библиотекань зданиясь каладома лангсо. Зярс важодицятне книгань фондост марто ютасть банконь зданияс, конась пек вишкине. Сынь пек учить парос полавтовомат: од здания эли лия таркас ютамо. Никул Эркай лемсэ библиотеканть улезэ эсензэ кудозо – валдо, покш, мазый, ков бу паро мельсэ сакшновольть вишка ды покш ловныцятне.
Татьяна Маторкина
Фототне авторонть ды И.Д. Воронин лемсэ Краеведениянь музеень