Неть читнестэ Республикань Культурань кудосо ютавтовсь Мордовия Республикань Государственной Собраниянь 17-це сессиясь. Сонзэ панжизе ды ветясь МР-нь Госсобраниянь Председателесь В. В. Чибиркин. Чинь повесткасонть ульнесь вейке кевкстема: Мордовия Республикань Прявтонть Артём Алексеевич Здуновонь МР-нь Госсобраниянь депутаттнэнень ды республикань весе эрицятненень эрьва иень Кучомазо.
Мордовиянь покш залонтень те чистэнть, депутаттнэде башка, пурнавкшность МР-нь Прявтонь ды Правительствань аппаратонь важодицят, республикань ошонь ды районтнэнь прявттнэ, силовой структурань руководительтне, культурасо, образованиясо важодицят, общественной вейсэндявкстнэс совицят ды лият. Мезесь каявсь сельмес, залсонть ульнесть ламо од ломанть.
Кучомасонть толковавсть эрямонь весе ёнкстнэ: экономиканть виевгавтомась, социальной сферась, од ломантнень марто важодемась, кадратнень анокстамось ды истя седе тов. Толковавсь улиця стакачитнеде ды сынст витемадост-изнямодост.
МР-нь Прявтось покш мель явсь раськень культурантень ды келентень. Покш мельспаросо вастозель Мордовиянь раськень (национальной) достояниядо премиянть кемекстамодо кулясь.
– Кельгома ялгат! Вечкевикс оят! Течи минь пурнавинек тей пек эрявикс тевде кортамо. Ули мелем ёвтнемс, кода эрятано ды важодтяно Мордовия Республикасонок. Кодат икеленек аштить путовкст, бажамот, мезе эряви седе паро эрямонть теемга. Мон бажан кортамс аволь ансяк паро тевденек ды изнявкстонок, истя жо мезе эряви сыця шкасто миненек, – истя эрзянь ванькс кельсэ ушодызе Кучоманзо Мордовия Республикань Прявтось Артём Алексеевич Здунов.
Лездатано минек боецтнэнень ды сынст семиятненень
– Тедеде минь карминек сеть событиятнень неицякс ды участникекс, конат тейсть покш путовкс масторлангсонть ды масторсонок молиця тевтнень лангс, – тешкстызе Артём Здунов. – Те специальной военной операциянь ушодовомась, частичной мобилизациянь ютавтомась, аволь ялгаксчинь мастортнэнь санкциятне, масторонь регионтнэсэ башка положениянь кемекстамось. Мордовиясь ве мельсэ кирдизе государствань Прявтонь решениянть масторонть ды минек соотечественниктнень ванстомадо. Ды течи минек боецтнэ поладыть улеме специальной военной операциясонть, честь марто топавтыть воинской долгост. Ризксэнтень, минек улить ёмавксонок. Ледстясынек маштовозь воинтнэнь чатьмонемань минутасо, – мерсь Артём Алексеевич. Неть валтнэнь марямсто залсо весе улезтне стясть…
Республикань Прявтось башка тешкстызе: «Минь алтынек лездамс солдаттнэнень ды сынст семиятненень. Республикань ламот предприятиятне, организациятне ды эрицятне кирдизь те меленть. Теезь гуманитарной лезксэнь пурнамонь пунктт, пурнавить ярмакт. Тейтяно весементь, штобу минек цёратненень куроксто пачтявозо весе эрявиксэсь. Лездатано минек боецтнэнень ды тейсынек весементь Изнямонть туртов!»
Мордовиянь социально-экономической виевгавтомань программась
совавтови эрямос
Ютазь иень декабрясто масторонь Президентэнть Владимир Путинэнь кармавтоманзо коряс кемекстазь республикань социально-экономической виевгавтомань программась. Сонзэ топавтомась лезды теемс 3 тёжат важодемань од таркат, малав 2 млрд целковойтнес кастомс бюджетэнь эсензэ доходтнэнь.
Программасонть башка мель явови «Лисма» заводонть юрсо республикань индустриальной васенце парконь теемантень, инновациянь ды социальной инфраструктурань виевгавтомантень, сеть проекттнэнень финансонь лезксэнь явомантень, конатнень топавты бизнесэсь, ванськавтомань сооружениятнень, ведень ливтемань сеттнень строямонтень ды сынст витнемантень.
«Ледстясынек, васняяк те Программанть топавтомга федеральной бюджетстэ арсевсь явомс 5 млрд целковойть, – мерсь МР-нь Прявтось. – Ютавтозь домка важодема федеральной органтнэнь марто, ды Россиянь Правительстванть лезксэнзэ вельде тедеде финансированиясь покшолгавтозь 7 млрд целковойтнес. Те лезды строямс теплосетть ды кить Саранскойсэ ды Рузаевкасо, истя жо одкстомтомс пассажирэнь транспортонь автопарконть.
Теде башка, иенть прядовомс строяви Саранскоенть перька кись, конась лемдеви Пелевеёнксонь тупикекс, конадонть истя энялдсть минек эрицятне ды предприятиятнень руководительтне», – мерсь Артём Здунов.
Гражданской оборонань коряс мероприятиятнень
одкстомтомадо
Мордовиянь Прявтось тешкстызе республикасонть гражданской оборонань коряс мероприятиятнень ютавтомань эрявиксчинть. «Куватьс эзть ютавтово тонавтнемат, эзть ванкшново кекшемань таркатне, конат истя жо эрявить техногенной катастрофатнень пингстэ. Неть тевтнень эрявить витемс. Республикань эрицятне, предприятиятнень важодицятне содаст, косо улить кекшемань таркат, улест теезь невтемань тешкст, ютавтозь тренировкат, ветяма важодема управляющей компаниятнень марто. ЖКХ-нь министерствантень, Гражданской оборонань коряс комитетэнтень, ошонь ды районтнэнь администрациятненень эряви саемс те кевкстеманть вановт алов. Эрьвась содазо, мезе эряви теемс чрезвычайной ситуациятнень пингстэ. Икеле предприятиятнесэ пурнавкшновсть гражданской оборонань коряс специальной отрядт, свалшкане ютавтовсть тонавтнемат, мероприятиятнень вадряльть невтевкстнэ. Эряви вельмевтемс те практиканть», – мерсь Артём Алексеевич.
Мель – Госзаказонтень
Республикань Правительствантень Артём Здунов кармавтсь Минпромнауканть марто вейсэ прядомс ванноманть, мезе эряви оборонно-промышленной комплексэнь (ОПК) прявт концернатненень, КамАЗ-нь, АвтоВАЗ-нь предприятиятненень, Ростехень, Росатомонь ды Роскосмосонь корпорациятненень, ды вейсэндявомс сынст производственно-технологической рисьметнес. Россиянь Минпромторгонть марто вейсэ эряви ванномс кевкстематнень оборонань заказтнэнь туртов минек продуктатнень ды анокставкстнэнь-важодевкстнэнь шаштоманть коряс.
Зярыя компаниятне уш ладизь одс эсь виест. Военнослужащейтнень туртов ушодовсь ОПК-нь продукциянь нолдамось. Неть: удомань кескавт, лембе оршамопельть, бронежилетт, разгрузкат ды истя седе тов. Шожда промышленностень истят предприятиятне пештязь 100 %.
Ули возможность седе покш лезкс максомс Россиянь од регионтнэнень. Ламо строямонь материалт эрявить неть таркатнень одс строямонть ды виевгавтоманть туртов. Минек кемголмово предприятиятне уш совавтозь Россиянь Минстроень реестрантень неть тевтнень топавтомо.
Карминек эрязасто важодеме лия регионтнэнь марто. Ансяк Ульяновской областенть марто иенть перть продукциянь пачтямонь покшолматне кассть котоксть ды кармасть 16 млрд ламо целковойть. Теде башка, ламо иетнень перть Казахстанось ды Белоруссиясь аштить Мордовиянь микшнемань прявт партнёрокс. Экспортсонть покш пельксэнть саи минек прявт предприятиятнень продукциясь: «РМ-Рейл», «Оптикэнерго», «Сарансккабель», «Лидер-Компаунд», «Электровыпрямитель», «ЭПРОМЕТ», «Резинотехника» Саранскоень заводось, «Талина» компаниятнень группась, «Чамзинская» птицефабрикась. Ней Мордовиянь продуктатнень пачтить 21 масторс. Эряви эскелямс седе тов ды келейгавтомс вейсэнь важодеманть Китаенть, Индиянть, Иранонть, Киргизиянть, Армениянть, Узбекистанонть, Азербайджанонть марто, истя жо Юго-Восточной Азиянь, Африкань ды Латинской Американь лия мастортнэнь марто, поладомс бизнес-миссиятнень. Лезэвстэ нолдамс тевс раськеютконь покш форумтнень площадкатнень.
Омбо масторонсетнень
таркас – седе ламо эсенек!
Питнетнень касоманть, поставкатнень полавтоманть ды лия киртямотнень лангс апак вано, лисезь пирявкстнэ панжсть возможность минек предприятиятненень саемс асатыця таркатнень. Ламот уш тонадсть од лувонтень.
«Тень туртов региононь Промышленностень виевгавтомань фондонть юрсо теезь Кооперациянь ды импортонь полавтомань куншкакуро. Минек предприятиятнень продукциясь топавты Россиянь компаниятнень вешемаст катанканть, конань икеле рамсесть Испаниясто, Голландиясто, Китайстэ (ЭМ-КАТ), кабелень продукциянть («Оптикэнерго», «Сарансккабель»), оптической прибортнэнь коряс («Кристаллическая Оптика»).
Теде башка, теезь оборудования ловсонь переработканть туртов, тевс нолдазь строямонь химикаттнэнь ды велень хозяйствань отраслянть туртов химической продуктатнень производствась, толдо а пелиця панельтнень производствась. Тевтнень ютксто вейкесь – седе эрязасто важодемс федеральной покш компаниятнень марто. Истя, вейксэ ковтнень перть Газпромонть туртов минек продукциянь пачтямонь покшолматне кармасть 850 млн целковойть, те кавксть седе ламо ютазь иень невтевкстнэнь коряс.
Седеяк редявикс касома ули республикань промышленной предприятиятнень строямонь секторонть марто вейсэнь важодемасонть. Сонзэ вешематнень топавтоманть туртов пачтямотнень покшолмась кассь ниледе седе ламос, те 1 млрд ламо целковойс», – пачтясь МР-нь Прявтось.
Кассть вузтнэнь прикладной исследованиятнень лангс вешематне
Кода мерсь Кучомасонзо МР-нь Прявтось, тедеде Н. П. Огарёв лемсэ МГУ-сь анокстась ды совавтсь эрямос научно-исследовательской ды опытно-конструкторской важодевкст Россиянь регионтнэнь 32 предприятиятнень ды Мордовиянь 120 ламо предприятиятнень туртов. Сынст ютксо «Рузхиммаш», «ЛАТО», «МПК «Атяшевский», «Мордовцемент» ды зярыя лият.
Медицинань институтось «Биохимикенть» марто вейсэ топавтыть препараттнэнь клинической ды доклинической ванноматнень.
Весе неть важодематне аравтозь импортонь полавтомантень ды минек предприятиятнень лиятнень эйстэ а аштемань топавтомантень.
«Поладови важодемась интеллектуальной ули-паронь ёнксонть виевгавтоманзо коряс. Н. П. Огарёв лемсэ госуниверситетэсь Промышленной ули-паронь федеральной институтонть марто вейсэ тейсть тонавтомань специализированной куншкакуро ды нолдасть тонавтомань од программат. Седе тов Мордовия Республикасо арсеви теемс федеральной институтонь представительства. Решениясь кемекстазь, энялдан Минпромнаукантень седе курок сонзэ топавтомс», – мерсь МР-нь Прявтось.
Паро полавтомат промышленностьсэ
Кувать шкань перть васенцеде явозь субсидият од оборудованиянь рамамс, максозь грантт промпредприятиятнень оборотонь средстватнень ламолгавтоманть туртов.
– 2022 иестэ Промышленностень виевгавтомань федеральной фондсто явозь 3 млрд целковойть инвестициянь ниле проекттнэс. Те седе ламо меельце вете иетнень перть федеральной фондсто явозь вейсэнь ярмактнень коряс. Истя жо тедеде топавтозь промышленностень виевгавтомань республикань фондонь докапитализациясь – 500 млн целковойтнес.
2022-2023 иетнестэ арсеви тевс совавтомс 28 проектт вейсэнь питнесэ 30 млрд ламо целковойть, теевить 2 тёжадо ламо важодема таркат, – тешкстась Артём Здунов.
Промышленностень ёнкссо касомань точкатнестэ вейкесь – фармацевтикань отраслясь. «Биохимиксэ» уш топавтозь «Арепливир» препаратонь производствань пешксе циклань технологиясь, истя жо инъекциясо. Компаниясь вети ветеце поколениянь од антибиотиктнень анокстамонть-нолдамонть, госпиталень ламо препараттнэ ютыть регистрация. 2025 иентень заводонь виевгавтомантень арсеви путомс инвестицият 20 млрд целковоень покшолмасо, сынст эйстэ 8,5 млрд целковойтнень – тедеде.
Артём Здунов явсь мель «Оптиковолоконные Системы» предприятиянть важодемантень: «Сень лангс ванозь, оптической волокнась ды прявт материалтнэ, конатнестэ сонзэ теить, аштить санкциятнень ало, исполнительной властень федеральной органтнэнь марто вейсэ анокстазь заводонь омбоце очередень топавтомань аравтлув. Правительствантень эряви топавтомс Президентэнь кармавтоманть Саранскойсэ оптоволокнань пешксе циклань производствань тееманть коряс».
Мордовиянь Прявтось башка кортась «Лисманть» коряс. Предприятиянть мельга-мельцек банкротокс теемань шканть перть «соласть» государствань миллионт целковойтне, 2020 иенть прядовомс тевтне тосо допрок стакалгадсть, теевсть авитевицякс. Ансяк банкротстванть лангс путозель обеспечительной мера, республикань собственностес максозь модань 80 гектартнэстэ 60 гектартнэ, те 75%. Питнест 670 млн целковойть. Минпромнауканть тевезэ – сыця иенть прядовомс теемс индустриальной парконть ды ютавтомс аккредитациянть, пештямс площадканть резиденттнэде.
МР-нь Прявтось Кучомасонзо покш мель явсь тевест парсте содыцятнень анокстамонь кевкстематненень.
«Россия – страна возможностей» Президентэнь платформанть марто вейсэ туризмань сферасо ютавтозель «Мастера гостеприимства» платформань коряс чемпионат. Мордовиясо теезь «Профессионалитет» федеральной проектэнь ушодксось, панжозь неень шкантень ладиця 35 мастерскойть ды истя седе тов.
Робочей профессиятнень коряс од ломантнень анокстамодо кортамсто МР-нь Прявтось ледстизе «Молодые профессионалы» Национальной чемпионатонь X финалонть, конась те иестэ ютавтовсь минек республикасо. Тей сакшность од ломанть 69 регионтнэстэ ды 14 мастортнэстэ. Кода паро ёнкс, тешкстазель, республикань тонавтнемань заведениятнесэ панжовить од специальностть.
Меельцекс, МР-нь Прявтонть Кучоманзо коряс мелензэ-арсеманзо ёвтынзе МР-нь Госсобраниянь Председателесь Владимир Чибиркин. Сон тешкстась, Мордовия Республикань Прявтонть Кучомазо домка ды чарькодевикс эйсэнзэ аравтозь кевкстематнень коряс.
– Минь неинек, Мордовиянь Прявтось соды, косто ды мезе вешнемс, муемс, саемс ды нолдамс тевс республиканть социально-экономической ёнкстнэнь виевгавтомга. Виде, те важодемань анок документ, конань видестэ тевс нолдамодонть ашти региононть вандынь чизэ, ломантнень паро эрямост. Неень шкане те пек эрявикс, зярдо весе масторось бороци олячинть кисэ, штобу, кода мерсь Россиянь Президентэсь В. В. Путин, киньгак пряс зярдояк аволь са, што минек масторонть, минек раськенть, минек келенть ды культуранть можна нардамс историясто!
Валентина ЮДИНА