Четверг, марта 28, 2024
Важное


Ютазь иень февраль ковсто телевидениянь Васенце каналсо савсь ваномс «Доброе утро» программанть. Те разнэ сонзэ героекс ульнесь содавикс морыцясь-бардось Олег Митяев. Февралень 19-це чистэ ульнесь чачома чизэ.
Те кенярксчинтень алтазь, артистэсь невтнесь, кода теемс эрзянь тантей сывелень прякатнень. Масторонь келес морыцясь апак визде, мельспаросо ёвтнесь эрзянь эсь ундокстнэде. Тейнемстэ сон ёвтнесь, мейсэ лиятнеде явовить эрзянь сывелень прякатне. Сынь ниле уголс ды покшт. Эйсэст ламо сывель.
Передачанть ваномсто ледстия эштё вейкенть. 2013 иестэ Саранскоень «Столица С» газетасо печатазель Олег Митяев марто интервьюсь, конань сон макснизе Саранскойсэ гастрольтнень шкасто. Сестэ сон видькстась, ундоксонзо Мордовиясто ды умок уш снартни муемс аванзо ёндо раськеть.

Эряви меремс, аволь весе ломантнень ули истямо бажамост. Ламотне виздить эсь раськеденть ды курок стувтыть эсь ундокстнэде, теить пряст рузокс эли эштё кикс.
Ледстякшнынзе раськензэ Митяев Тамбов ошсо морамстояк. Вейке концертсэнть мик мерсь: «Тамбовонь эрицятнень лован эсь землякокс, эдь тестэ монь покштям Сурков Яков Дорофеевич».

Асодыцятненень ёвтаса, Олег Митяев чачсь 1956 иень февралень 19-це чистэ Челябинск ошсо, робочеень семиясо. Олег Григорьевич – ламо моронь автор ды морыця, актёр, Россиянь Писателень союзонь член, Российской Федерациянь заслуженной артист. Моротнень сёрмады 1978 иестэ саезь. Васенце стихензэ печатазельть «Смена» журналсо 1979 иестэ. Теде мейле од музыкантонть, поэтэнть килангсо вастовкшность пек содавикс творческой ломанть. Истямокс ульнесь Леонид Филатов актёрось, Булат Окуджава поэтэсь, бардось. Кода-бути телевидениясо невтезель передача, косо участникекс ульнесь Олег Митяев. Сонзэ ванызе Булат Окуджава. Зярыя шкань ютазь сон гайневтсь телевиденияв ды вешизе Митяевень адресэнзэ. Ульнесь мелезэ вастовомс. Истя лисськак. Теде мейле истят вастовоматне ульнесть сеедьстэнь. Эсензэ опытэнзэ содавикс поэтэсь снартнесь максомс од бардонтень.

Олег Митяев теинзе содавиксэкс Булат Окуджава марто эштё ламо од морыцятнень, конат мейле истя жо кармасть содавиксэкс. Ютксост Андрей Макаревичкак.
1986 иестэ саезь Олег тонавтнесь ГИТИС-сэ. Прядызе заочна. Сонзэ марто вейсэ тонавтнесть Лайма Вайкуле, Михаил Евдокимов. Меельценть марто эрясть кеме ояксчисэ. 90-це иетнестэ варчнизе виензэ киносо. Налксесь зярыя рольть. Курок чарькодизе, те аволь сонзэ. 1998 иестэ саезь кармась тейнеме выступленият Леонид Марголин музыкантонть-мультиинструменталистэнть марто. Митяев ютавтнесь гастрольть Россиянь келес ды границянь томбале: Германиясо, Италиясо, Франциясо, Израильсэ, ЮАР-со. Сонзэ моротне – «Крепитесь, люди! Скоро лето», «Соседка», «Лето – это маленькая жизнь» – токить кунсолыцятнень седеест.

Олег Митяевень ламо эрьва кодат казнензэ. Сон «Петрополь» Рузонь поэзиянь фондонь премиянь лауреат («Непраздничные вещи» книганть кис, 2001 ие); тензэ максозь «Овация» национальной премиясь (2001, 2008). 2003 иестэ казезь «Золотой Остап» премиясо.
Видькстан, передачанть ваномадо мейле прясон ульнесть эрьва кодат арсемат. Седе икелеяк марсинь лиятнень пельде артистэнть Мордовиянь ундокстонзо, ансяк тенень а пек кемилинь. Ней жо, ваномадонть мейле, арсинь монсь муемс неть ундокстнэнь, паро, ули Интернет. Мерян, артисттэнть тосо сёрмадозь эрьва мезе, ансяк эрявиксэсь, кода свал, а сеске муеви. Содылинь, эряви вешнемс аванзо ёндо. Зярыя вешнематнеде мейле тень понгсь Митяевтнень генеалогической чувтось. Эйсэнзэ пек ламо документт. Бути сынст ванномс весе, эряви пек ламо шка. Ёвтазь, Олег Митяевень генеалогической исследованиятне теезь ниле ёнкска. Тетянзо ёндо тонавтнезельть Митяевтнень ды Назаровтнень раськетне, аванзо ёндо – Жариновтнень ды Сурковтнень. Митяевтне эрясть Курской губерниянь Почепное велесэ, Назаровтне – Селина велесэ.

Сурковтне ды Жариновтне эрясть вейке велесэ: Тамбовской губерниянь Темниковской уездэнь Нароватовасо. Весе исследованиятне ютавтозельть Курской, Тамбовской областтнень ды Мордовиянь Центральной государственной архивтнень документтнэнь коряс. Тевесь сеньсэ, Нароватова велесь ней республикань Теньгушевань районсо. Википедиясо сёрмадозь, Теньгушевадо вете вайгельбеде ве ёно. Нароватова велень поселениянтень совить Вяжга вишка велинесь ды Шелубей посёлкась. Веленть лемезэ тусь Нароват христианствадо икелень лемденть. Зярдо-бути велесэнть ульнесть школа, библиотека, медпункт, связень отделения. Тесэнь тейтерь-авань фольклоронь ансамблясь весероссиянь ды республикань эрьва кодамо смотратнень лауреат. Эрицятнеде колмосядт ломанть. Национальностень коряс шокшат-эрзят. Содазь, Теньгушевань районсо седе ламо мокшонь велеть, улить шокшань велетькак. Шокшатне седе эрзят. Истямокс ульнесь Нароватоваськак. Тень кемексты эштё вейке тувталось. Википедиясо сёрмадозь: Нароватовасто туицятне-явицятне теизь Дракина веленть. Торбеевань райононь Дракинасо эрить шокшат. Нароватовань Сурковтнень раськесэ сёрмадозь Олегень аванзо Лидия Яковлевнань лемеськак. Лисни, Олег Митяевеньгак ава ёндо раськензэ ульнесть шокшат. Косо авазо вастовсь тетянзо марто, теде историясь чатьмони. Генеалогической книгань меельце страницасонть сёрмадозь: Григорий Степанович Митяев 1928-1982, козяйказо Лидия Яковлевна Суркова (Митяева) 1927-1994. Цёраст Олег Григорьевич Митяев 1956. Лисни, толтомо качамо а эрси. Олег Митяевень алкукс ундоксонзо шокшань. Паро, сонсь артистэсь теде а визди ды лови прянзо шокша-эрзянь раськекс.

Николай ЕВДОКИМОВ
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».