Пятница, февраля 07, 2025
Важное

Январень 7-це чистэ Отяжелень райононь Кулязбуе велень эень кортонть лангсо тагояк ютавтовсь «Роштовань понань кем» хоккейсэ налксемась. Истят пелькстамотне Кулязбуесэ ютавтневить эрьва иестэ.

 

Те налксеманть арсицякс-пурныцякс кармась велень школань физкультурань ды ОБЖ-нь тонавтыцясь, спортсменэсь-сокссо ардтницясь Е. А. Модин.

Те течи райононь посёлкасонть ули Эень дворец, конась теезь «Благоустройство сельских территорий» национальной проектэнть вельде ды косо иень куш кодамо шкасто мереви налксемс хоккейсэ ды кирякстнемс конькасо, икеле жо теде савсь ансяк арсемс. 

Дворецэнть кенкшензэ панжозь эрьва чи. Тесэ эрьва сыцясь муи эстензэ мельстуиця тев – кие ардтни конькасо, кие налкси хоккейсэ. Ансяк Кулязбуень эрицятне ванстыть коест: эрьва теле ютавтнить хоккейсэ налксемат ушосо.

Те налксемасонть самай эрявикс элементтнэ – понань кемтне ды фуфайкась, конасонть шождыне чийнемс ды пек а псилгадат. Тешкстама, ломантнень туртов пелькстамось канды вадря ёжо. Койсэнь, истят пелькстамотнень ков седе вадря ютавтнемс ушосо, эдь телень экше коштсонть налксицятнень ёжосткак седе вадрят,  – корты Отяжелень ошонь поселениянь прявтось Александр Серов.

Эряви меремс, истямо хоккеесь тусь мельс аволь ансяк Кулязбуень эрицятненень, истя жо райононь весе велетнень ломантнененьгак.  Хоккеесь пурнынзе налксеме кода од ломантнень, истя сыре спортсментнэньгак. Тедеде налксицятнень ютксо ульнесть Отяжелень муниципальной райононь прявтось Константин Николаев, кона сакшнось Влад цёранзо марто, ды Отяжелень ошонь поселениянь прявтось Александр Серов.

Эряви ёвтнемс седеяк, кодамо казнесэ казевсть турнирэнь изницятне. Вана уш зяроце ие хоккейсэ налксицятнень ванстови кедьстэ-кедьс якиця Кубокось – чувтонь путома лангсо раськень тешкссэ викшнезь понань кемесь ды шайба марто чувтонь клюшкась. Казненть сталмозо – 7 килограммат. Теицязо – турнирэнь свалшкань налксицясь ды чувто ланга керсицясь Михаил Трофимов. Истя жо изницятне казевить лия ёнов а молиця медальсэ – понань кендестэ (войлоксто) теезь кемнесэ.

Кулязбуень эрицятне явить покш мель те налксемантень, секскак тедеде райононь прявттнэ алтасть теемс тенст эень од корт. Неть валтнэнь марто кенярксчинь инжетненень пшкадсь Отяжелень муниципальной райононь прявтось Константин Николаев.

Минь приминек решения те таркасонть теемс хоккеень од корт. Секскак сы иестэ «Роштовань понань кем» турнирэсь юты неень шкань корт лангсо, – алтась Константин Николаевич.

Тедедень турнирсэнть эсь ёрокчист невтизь «Ветераны», «Молодежь», «Медведь» командатне ды райононь келес содавикс «ЯНСКАТ» тейтерень дружинась. Эенть лангсо пек псиль. Тынсь арседе, кода а шожда чийнемс понань кемсэ ды эштё эй ланга. Чийнемадонть башка эряви панемс шайбанть соперниктнень ортатнес. Ансяк налксицятне, мерят, эзть маря кодаткак стакачить. Теньсэ тенст пек лездасть болельщиктне, конатне, летьке ды якшамо пертьпельксэнть лангс апак вано, пуромкшность эень кортонть перька. Инжетнень туртов анокстазель сюпав программа. Матчтнень ютксо оймсема шкастонть сынст каванясть пси чайде ды сывелень ямдо (шурпадо). Истя жо кенярксчинть теицятне эзизь стувто рузонь раськень коенть – орта велькска понань кемень ёртнеманть. Од тейтертне лиснесть хоккеень ортатнень малас ды лавтовонь трокс ёртнесть эень кортонть лангс кемть. Мероприятиянть самай учовикс ды мельстуиця инжекс кармась Якшаматясь, конась киньгак эзизе кадо казневтеме.

Истя, болельщиктнень лембе валост ды сееремаст марто васенце налксемасонть «Медведь» командась 7:4 счёт марто изнизе «Молодежь» команданть. Омбоцесэнть жо, «Ветерантнэ» 6:4 счёт марто изнизь «ЯНСКАТ» тейтерень дружинанть. Уцяскась, мерят, сеске велявтсь тейтертнень эйстэ, ды колмоце налксемасонтькак, «Молодежь» команданть марто пелькстамосо, сынь тагояк кадовсть чавонь кедть. Стака тюремат мольсть, зярдо эенть лангсо вастовсть «Ветераны» ды «Медведь» командатне. Налксеманть ваныцятне малав прядовомс эзть сода, кие жо лиси изницякс. Эдь кавонест командатне пек виевть. Ансяк меельце пелев «Ветераны» командась истя кежейстэ ушодсь ёртнеме шайбанть каршо командань ортатнес, ваныцятненень сеске чарькодевсь, кие ули Кубоконь инязорокс. Истя, «Ветераны» командась изнизе «Медведь» команданть 9:4 счёт марто. Коень коряс изницятненень макссть Кубок ды васенце таркань кисэ медальть. Эряви меремс, те командась вана уш колмоце ие саи «сырненть». «Медведи» команданть жо казизь «сиясо», а вана «бронзанть» максызь «Молодежь» командантень, «ЯНСКАТ» тейтерень дружинась тедеде кармась ансяк нилецекс.

Эряви меремс, те этноспортось вейсэнди поколениятнень. Тынсь арседе, кодамо те азарт, зярдо эй лангсо карадо-каршо вастовить тетят-цёрат,  кодамо эрьванть седейс чачи мельстуиця ёжо!

Отяжелень ошонь поселениянь администрациясь ёвты покш сюкпря спортонь те налксеманть анокстамонзо ды ютавтоманзо кисэ Андрей Николаевич Вдовиннэнь, Александр Николаевич Тикшайкиннэнь, Василий Иванович Татаркиннэнь, Сергей Александрович Лашмановнень ды Михаил Николаевич Трофимовнень.

Кенярдовты, минек эрзянь велетнесэ эштё улить истят чевте седей ды дока ломанть, конатне тонавтыть од ломантнень эрямонь шумбра лувонь кирдемантень ды  лездыть ванстомс раськень койтнень-кирдатнень. 

Икелепелев турнирэнь ютавтыцятне арсить ладсемс хоккеень гимна рузонь ды эрзянь кельтнесэ. Арсетяно, истямо арсевксэсь лиси пек мельстуицякс.

 

Текстэсь ды фототне саезь Отяжелень райононь «Вперед» газетасто.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».