Покш Березникбуень Тазина велесэ зярыя иеть важоди «Искра» ООО-сь. Маласо аштиця велень ломантненень ули косо важодемс, тей сынст усксить машинасо. Колмо иеде икеле предприятиянть прявтокс ладязель Геннадий Афанасьевич Беспалов. Сонзэ самонзо марто тесэ ламо мезесь полавтовсь паро енов. Важодицятненень шкастонзо пандыть зарплата. Сюракшов ракшатне парсте андозь-симдезь, скалтнэ потявтозь, алксост ванськавтозь. Ферматнень вакска теезь паро ки. Аволь умок минь пачколинек «Искрав», кортнинек важодицятнень марто, вастневинек прявтонть марто, кона евтнесь предприятиянь течинь тевтнеде ды мелявкстнэде.
– Неень шкасто витнетяно скалонь кавто ферматнень. Теле лангс улевельть анокт. Фермас совамо таркантень ладятано бетононь плитат, трактортнэ ардовольть седе малас. Полавтынек киякстнэнь. Симдемань системась одс полавтозь, анокстасынек теленень, илязо куваяк чуде. Стенатнень ванськавтсынек, ашолгавтсынек. Тейтяно дезинфекционной обработка. Тей кельгить 200 скалт, омбоце фермантень истя жо. Арсетяно рамамс 80 прят нетельть. Одтнэ вазыить, кармить максомо ламо ловсо. Сыре скалтнэнь полавтсынек.
Анокстатано теленень тикше, сенаж, теезь силосонь ды сенажонь зярыя латкот. Тикше ули – карми эрямо фермаськак, – корты «Искра» ООО-нь прявтось Геннадий Беспалов.
Предприятиянть улить малав 2 тежат гектарт моданзо. Лангсост видезь товзюро, силосокс кукуруза, соя ды ламо иень тикшеть. Модатнень сокамсто-видемстэ лезды «Птицефабрика «Атемарская» ОАО-сь, конань прявтокс важоди А.В. Щемеров. Самай сонзэ вановт ало важоди «Искрась». Маласо читнестэ тесэ ушодови сюротнень нуемась. Сюротне ванстовить птицефабрикасо.
Истя жо тесэ анокстыть видемс од паксят. Модатне кадозельть зярыя иеде икеле, лангсост кассть чувтот-мезть, зыянов тикшеть. Ней эйсэнзэ покш трактортнэ ванськавтыть, таргсить ундокстнэнь. Неть паксятнес видить товзюро ды лия культурат.
Минь ардынек ферматнень ваксс. Ней килангось валаня, витнезь-петнезь, ардовить машинатнеяк-трактортнэяк. Фермасто каршонок паро мельсэ шумбракстнеме лиссь цера. Те – Федор Петрович Бояркин. Сонсь Чугырвелень, колмоце ие важоди «Искрасо».
– Пингем перть роботан велень хозяйствасо. Школасо тонавтнемстэ уш макссть тень трактористэнь прават – сестэ школасо ютыльть истят курсат. Армиядо икеле, 1987 иестэ, карминь роботамо Чугырвелень Калинин лемсэ колхозсо трактористэкс. Ошовгак тукшнынь ды эзь туе мелезэнь тосонь эрямось, мекев велявтынь мода лангс. Свал роботынь тракторсо: сокинь-видинь, усксинь коромт, ульнинь фермасо скотникекс. Ней вана слесарень тевть топавтан. Витнетяно ферматнень. Паро, зярдо ули косо важодемс, а эряви ардтнемс Московга-кува, – мерсь Федор Петрович.
Седе тов сыргинек кизэнь калданть ваксс. Сон ашти Тазинадо аламодо ве ено. Скалтнэ апак капша порнить тикшеде. Ферматнень лангсо прявтокс важоди эряза авась Светлана Васильевна Абрамова.
– Минек скалонок 360 прят. Андтано эрьва мезде: силосто, сенаждо, фураждо, олгодо, кукурузадо, шротто. Шрот – те грануласо чиньжарамо. Сон лезды ламолгавтомс ловсонть. Атемаронь птицефабрикасто сакшны зоотехник, кона евтасы тень рациононть, ды сонзэ коряс андтано. Валске марто сатано – ушодтано андомост обедэнть самс. Мейле чинь перть скотниктне кайсить тенст ярсамкадонть, ветькак андтано. Важодить скалонь вете потявтыцят, вейке полавтницяст ули. Потявтомась ушодови валскень 5 чассто ды чокшнень 17:00 чассто. Ловсонть эрьва чи ускить. Минь кирдтяно сонзэ башка таркасо, косо ладязь экшендевтемань оборудования. Истя жо улить кото скотникть. Роботыть вейке-вейкень полавтнезь. Важодицятнень усксить Чугырвелестэ, Рузонь ды Эрзянь Наймантнэстэ, Симкинасто, Судосевасто. Улить техник-осеменатор, кавто ветврачт. Скалтнэ свал вановт ало. Вазыямодо мейле 40 чинь ютазь скалтнэнень тееви узи. Осеменениядо икеле тагояк парсте ванкшновить, вазовт эли аволь. Бути сэредить, эрявить лецямс. Сюкпря Геннадий Афанасьевичнень, кона сась тенек важодеме, кундась аволь шожда тевентень. Сон видечинь кисэ аштиця, ризны-мелявты тевензэ кувалма. Ней эрьва ковсто пандови зарплата. Ферматнес теезь кить. Миньгак паро мельсэ роботатано, кемтяно, хозяйствась седе товгак карми важодеме, – кортась Светлана Васильевна.
Сон сась «Искрав» вейксэ иеде икеле. Васня роботась осеменаторокс, учетчикекс, мейле ладизь фермань прявтокс. Те аванть марто минек редакциянь важодицятне вастневсть уш аволь весть. Сон свал паро ежосо, чамасонзо мизолкс, мазыйстэ-парсте оршнезь.
Аволь умок «Искра» ООО-в сась важодеме прявт ветврач. Кода пачтясь Г.А. Беспалов, неень шкасто сехте покш мелявксозо – косто саемс важодицят, велетне чамить. Аволь шожда муемс вадря специалист, колхозт-мезть умок арасть, велень хозяйствань предприятиятнеде аволь ламо.
Николай Николаевич Лугаськов чачсь теке районсонть, Покш Березниксэ. Школанть прядомадо мейле тонавтнесь Н.П. Огарев лемсэ МГУ-нь Аграрной институтсо «ветеринария» специальностенть коряс. Се шкастонть, зярдо мольсь тов тонавтнеме, ветеринаронь профессиясь престижноель, сестэ эште ульнесть колхозт, ульнесь косо роботамс. Валонзо коряс, тонавтнемась тукшнось мелезэнзэ. 1998 иестэ, вузонть прядомадо мейле, роботась велень хозяйствань предприятиясо.
– Минь ютавттано профилактической весе тевтнень. Вишка вазтнэнень тееви вакцинация. Скалтнэнень – вазыямодо икеле. Вантано, илязо уле мастит. Сеедьстэ сынст сэредить пильгест, кромождыть, вейке-вейкень томбить сюросост. Тесэ скалтнэ голштинской породань, якстере-ашот, ламо ловсонь максыцят. Паро тенст кизэнь калдасо, – кортась Н.Н. Лугаськов.
Кизэнь калданть вакссо ули вазонь кирдема таркаяк. Вишка вазтнэнь тей ютавтыть сеске вазыямодо мейле. Совинек варштамост – весе теке вейке хорсо моразевсть-паразевсть. Арсесть, нать, кармить мездеяк тантейнеде андомост-симдемест. Тесэ валдо, алксост урядазь, ванькст. Фермань важодицятне бажить теемс тевест парсте. Косо ули алкуксонь азор, тосо тевтнеяк молить вадрясто.
Татьяна Маторкина
Фототне авторонть.