Четверг, марта 28, 2024
Важное

Ламоксть тень савкшнось якамс Вирь Тавлав, конадо паро кулясь срадсь аволь ансяк весе Мордовиянть келес, васолга сонзэ томбальгаяк ды натой ламо омбо мастортнэва. Седе сеедьстэ, нама, эрсинь Йовлань Олонь лемсэ «Этно-кудо» музейсэ.

Те музеенть марто ламо паро тевть топавтынек Рав чирень финнэнь-угрань раськетнень культурань куншкакуросо важодема шкастон. Тесэ ютавтозель «Кулдор-Калдор» финнэнь-угрань раськень юморонь васенце фестивалеськак, ков тердекшнинек ки соды зяро инжеть ды эрьва ёндо. Ломантне сестэ эзть пеле пуромкшновомс вейс. «Этно-кудонть» перька таркась сестэ неявсь коткудавонь пизэкс.

Эряви меремс, музеесь нейгак а эрси чаво. Тесэ эрьва иестэ ютавтнить эрьва кодат вастовомат, пелькстамот. Экскурсиятнеде кортамскак а сави. Ломантнень покш мелест самс тей, седе ламо содамс В. И. Ромашкинэнь эрямодонзо ды шкинемадонзо, варштамс чувтосто керсезь скульптуратнень лангс, конатне кадовсть «Вейсэнь ундокст» чувто ланга керсицянь фестивальтнеде мейле ды стявтнезь ушосо музеенть перька. Натой оймсема читнестэяк тей ардыть эрьва ёндо. Нама, музеень азортнэ инжетнень вастыть пандемиянь шкасто кардамонь койтнень мельсэ кирдезь. Весе, мезе эряви тень пингстэ теемс, топавтыть педе-пев.

Сеедьстэнь инжекс тесэ кармасть спортсментнэяк. Ледстясынек, тедеде тосо ульнесть ламо вастовомат, сынст ютксо «TAVLA TRAIL» васенце этно-чийнемась, ков сакшность малав 40 спортсмент аволь ансяк Мордовиясто, шабра областтнестэяк.

Вирь Тавлась вечкема велекс теевсь «Тюштя» финнэнь-угрань налксематнень вельмевтема клубонь прявтонть П. В. Мигуновонь туртовгак. Павел Валерьевич, кода сонсь видькстась, тосто а лиснияк. Сеедьстэ сакшны аволь ськамонзо. Сайни мартонзо од ломанть ды аволь ансяк. Ютазь субутасто тердимим моньгак. Васня паро ладсо эзь ёвтаяк, мезекс тов эряван. Мерсь ансяк, келя, пек покш ды эрявикс тев ютавттано. Кода а молят «покш тевс»? Мартон тердинь ялгат. Виде, юткстост аволь весе сайсть мель молемс: оймсема шкасто весень учить кудоютконь тевть. Монсеньгак сайнимизь кавтолдомат: молемс-а молемс. Тесэ муевсть эсень кондят ялгат, кить вечкить улемс ки лангсо, бажить ламо неемс ды ламо содамс. Паро, вейке ялганть эсензэ машиназо. Ульнесь мейсэ пачкодемс.

Вирь Тавлав ардомс аволь кувать. Саранскоенть эйстэ сон ашти малав комсьветее вайгельбень тарка. Тосо эйсэнек уш учость. Ютксост П. В. Мигунов. Сон, окойники, ёвтызе, мезекс тердимизь. Арсинь, келя, невтемс тенк, косо Тюштянь пандозо. Сон, марят, ашти Ромашкинэнь янонзо лангсо. Истя мерськак: «Тюштянь пандось Ромашкинэнь янонзо лангсо». Ды тердимизь ютамс те янонть ланга ды куземс Тюштянь пандонть пряс. Эзинек кола Павел Валерьевичень мелензэ, сыргинек.

ЯЛГО РОМАШКИНЭНЬ ЯНОНТЬ ЭЗГА

Ки лангов сыргамодо икеле – физзарядка, конань ютавтызе П. В. Мигунов. Сондензэ мейле седе эжинек, рунгонок ливчакадсть, вересь сантнэва кармась якамо седе эрязасто. Тюштянь пандонть вешнеме сыргинек котоненек. Ниле ават, вейке цёраэйкакш ды сонсь П. В. Мигунов.

Зярыя тарка ютынек велеванть. Кинек лангс понгонесть кудот, конатнень эйстэ ламотне чавот. Сынь пешкелить, келя, ансяк кизна, зярдо ошсо эрицятне кармить само пирень путомо, оймсеме ды шумбрачинь кемекстамо. Тесэнь таркатнень лемест ды эрицятнень весемеде парсте содасынзе В. И. Ромашкин лемсэ «Этно-кудо» музеень азоравась Раиса Васильевна Водясова. Сон кармась тенек «гидэкс». Кинь перть ёвтнесь, ков мольтяно ды кие косо эри.

– Мольтяно Ромашкинэнь яннэванть. Пачкодинек меельце куринкантень. Сонензэ мерить Ночка. Седе тов тутано Угол прянть ёнов, – ёвтнесь Раиса Васильевна. – Ютынек Киушкин Николай Николаевичень кудонзо вакска. Пек ёроков алясь. Кудосо паро азор. Теде башка, пек парсте моры. Курок пачкодтяно ялаксонзо Киушкин Анатолий Николаевичень кудонзо видьс. Минь тензэ мертяно Кеша. Сон – вирень ванстыця. Одсто служась Мурманскойсэ, Северной флотсо. Сисем иень перть яксесь иневедьга. Ней велявтсь. Цёрась пек вадря, шумбрачинзэ лангс а пеняци. А уш кодамо Люда козяйказо – валсо а ёвтави. Тейтерькс Чекайкиналь. Тетязо ульнесь предэкс. Райка патям ульнесь авазо. Трясть-кастсть ламо эйкакшт. Пек вадряльть ломантне. Люда истямо морыця, истямо мазый вайгелезэ!
Раиса Васильевна эрьва ломанденть аноколь ёвтнемс ды ансяк паро валсо. Ледстизе Киушкин Иван Степановичень. Сон, келя, пек паро врач. Кандтни Мордовия Республикань заслуженной врачонь лементь. Весе неть ломантне лиссть вейке кудораськестэ.

Вана пачкодинек Кешань кудонзо ваксс. Каршонок лиссь сонсь кудазорось. Аламос лоткинек мартонзо кортнеме. Кеша мельспаросо вастызе кулянть «Ромашкинэнь янонть» панжомадо. Келя, те тевесь аволь берянь. Бути эряви кодамояк лезкс, цёрась анок максомс сонзэ нейке. Неявсь, сон тесэнь таркатнень содасынзе, кода эсензэ кедьсуртнэнь.

– Оно тува юты Лёва янось. Сон ветятадызь Кевге прянтень. Эйстэнзэ аволь васоло, косо сокссо ардтнемань базась, – Татар пандось. Тов сакшныть сокссо кирякстнеме, икеленек аштиця пандо чаматнень лангс невтнезь, – ёвтнесь Кеша. – Эйстэнзэ аволь васоло Татаронь калмазыресь.

Эрить-арась виртнесэ кодаткак ракшат, тень каршо Кеша мерсь истя:
– Эрить. Кода а эрить? Нумолот, ривезть, идем тувот, сярдот. Улить верьгизткак. Монсь неинь эйстэст кавто.

Видькстан, марязесь аламодо тандавтымим. Теке марто мекев мурдамо эзинь карма. Весень марто поладыя кинть седе тов.
«Ромашкинэнь янось» ушодови эсензэ лемень кандтниця музеенть вакссто ды таргави зярыя вайгельбень тарка. Сеске мерян, кись аволь шождатнестэ. Молемс сави аволь виде ды аволь тапазь-валакавтозь киява. Пильге алов понгонить эрьва кодат губорькст, порксазь кевть. Сонсь кись секе-тев менчеви. Ламо таркава вастневить латкот-луткот, пандопрят. Сынст ютамс аволь шожда, седеяк стака – покш сталмо марто ломантненень. Моньгак сталмом аволь вишкине, секс секе-тев кадовкшнынь лия молицятнень эйстэ. Теке марто савсь лотксемс мазый таркатнень снимсеме.
Тесэ ульнесь мезе лангс каямс сельме. Ков иля варшта – пандо чамат. Лангсост касы вирь. Васолдо виресь неяви пандопрянь вельтявксокс.

АННУШКАНЬ ЛАТКО

Вейке латконть чиресэ таго лоткавинек. Сонензэ мерить Аннушкань латко. Мекс латкось кандтни истямо лем, карминек содамо таго Раиса Васильевнань пельде. Келя, умоконь шкасто вейке ава, лемезэль Аннушка, сась пенге мельга. Сестэ, марят, эзть мере косо понгсь керямс чувтот. Вирьванысь неизе ды ледсь лангозонзо. Авась ранязель ды кулось. Секс те латконть лемдизь Аннушкань латкокс. Велень эрицятне тей сакшныть пор, сёвонь, порксазь кев мельга. Икеле сынь эрявсть кудонь стявтомс. Вирь Тавласо нейгак ламо таркава ванстовсть саманкань кудотне. Кадык сынь аволь истят мазыйть, кода кирьпецень ды чувтонь кудотне, тень таркас сынь, келя, тельня седе пек кирдить лембенть, кизна, мекевлангт, сынст эйсэ эрси седе экше лия кудотнень коряс.

Латкось ашти виренть маласо, кона кандтни лем – Мазый. Ве ёндо неезь, виресь а явови лиятнень эйстэ.
Мазычизэ, келя, седе парсте панжови кизна. А стяко тозонь ломантне пурнавкшныть Троицясто ды лия покш читнестэ.

ТАТАР ПАНДО

Вирь Тавлась – кезэрень веле. Зярдо тезэнь састь васенце эрицятне, видестэ а ёвтасызь историктнеяк. Кортыть, васня тесэ эрясть татарт. Теде кортыть ламо лемтне. Эсензэ веленть лемезэяк сась татаронь кельстэ.
Веленть перька аштить ламо пандот. Секс лемгак тесэ таго-зярдо эрицятне (татартнэ) макссть истямо – Тавла. Татаронь кельстэ те валось ютавтови кода «пандов тарка».

Сехте покш пандокс тесэ ловови Татар пандось. Сонзэ чиресэ латко, козонь, келя, седикеле татартнэ калмасть кулыцятнень. Секс те латконтень нейгак мерить Татаронь калмазырь.
Зярдо ды мекс татартнэ кадызь неть таркатнень, кияк а соды. П. В. Мигунов лови, те ульнесь колмосядт иеде икеле. Татартнэ тусть эрямо Атемар ёнов таркатнес. Ламот тейсть од веле – Татаронь Тавла. Кой-кить кадовсть эрямо Вирь Тавласо. Нейгак тосо вастневить татаронь раськень лем марто ломанть.

ТЮШТЯНЬ ПАНДО

Пачкодинек се таркантень, косо П. В. Мигунов од ломантнень марто ютавтни Тюштянь пелькстамот. Кезэрень шкасто Тюштя инязорось ушмонзо пурнамсто кочкась сехте виев цёратнень. Текень кисэ пурнылинзе весе од ломантнень сэрей пандо чирес ды кармавтылинзе, чиезь, куземе сонзэ пряс. Сеть цёратнень, кить васенцекс изнилизь пандонть, Тюштя теилинзе модань-масторонь ванстыцякс.

– Те пандось седе а ков лади истят пелькстамонь ютавтнемс, – ёвтызе мелензэ П. В. Мигунов. – Сонзэ сэрезэ 300 метрат. Мон уш сакшнынь тезэнь эйкакш марто, варчнинек куземс сонзэ пряс. Сеске мерян, тень теемс аволь шожда. Васня маряви аволь сэрей. Сонзэ тёкшс куземстэ пандось аволь весенень изняви.

Тердимизь минекак варчамс тень теемс. Нама, аволь чиезь, састо молезь. Сыргинь монгак. Вием сатотсть ютамс пелензэ. Седе тов куземстэ превень чаракадсть, савсь лоткамс ды велявтомс.
Мекев кись седе шождаль. Сиземат-мезть эзинек маря. Те, улема, секс: ванькс коштто лексезь, вийтне кавонзыть. Текень пес, чиськак понгсь седе а ков паро. Верде лангозонок пейдезь вансь чипаесь, сонзэ эйстэ молиця манеесь эзь максо якшамонтень кельмевтемс минек. Мекевлангт, молемстэ истя эжинек, анок ульнинек кайсемс телень оршамотнень ды чиезь ношкстамс мекев.

Ромашкинэнь янось косто ушодовсь, тозонь прядовськак. Музейсэ эйсэнек учось сонзэ прявтось П. В. Рябов. Тикше ведте каванямот, вейсэнь кортамот, эрзянь моронь морамот – весе те седеяк кепедизе меленек самс таго ды одов ютамс Ромашкинэнь яннэванть. Тердтяно мартонок тынкак!

Раиса ЩАНКИНА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».