Мельвановикс ялгат!
Пшкадян тенк явомс мель Эрицятнень весероссиянь сёрмадстомантень, конась ютавтови 2021 иень октябрянь 15-це чистэ саезь ноябрянь 14-це чис.
Мекс тень эряви теемс течи ды кодамо ответственность кандтано минек эйкакштнень икеле?
Россиясь свал шнавсь сеньсэ, раськетнень ламочинть лангс апак вано, эрьва народось явсь мель шабранстэнь. Минь весе аштетяно вейке-вейкень кис!
Эрзятне ды мокшотне инязоронь шкатнестэ саезь лововсть паро раськекс. Мекс жо течи весе содыть лия раськетнеде седе ламо минексенть коряс? Мон аволь Мордовиянь эриця, ансяк невтян минек раськенть лия регионсо. Лиясто эрси пек апаро сень кувалма, ламот раськеденек а содыть. Седеяк апаро, улить истят, кить виздить ёвтамс эсь эрзянь эли мокшонь ундокстнэде.
Миненек эряви ванстомс эсь каштанчинть, эсь раськенть эйкакшонок туртов! Сень туртов, штобу максомс сыненст сюпав культуранок, минек койтнень-кирдатнень.
Яводо аламошка шка Госуслугань сайтсэ анкетань тешкстамонтень эли кортадо сетнень марто, кить ютавтыть сёрмадстоманть. Илядо кекшне! Максодо минек раськентень вандынь шка!
Максодо каршо валт кевкстематненень: Кие тон? Костонь тонь ундоксот? Кодамо кельсэ кортат?
Сась шка кортамс эсь прядонок – 2021 иень Эрицятнень весероссиянь сёрмадстомасо тешкстык эсь раськенть: мордвин-эрзя, мордовка-эрзя.
Эрзят ды мокшот, уледе панжадокс! А макссынек ёмамс минек раськетненень!
Ольга Лысенко,
Уралонь эрзянь ды мокшонь раськень автономиянь прявт.
Челяба ош