Пятница, февраля 14, 2025
Важное

Неть читнестэ Покш Березникень куншкакуросо тешкставсть кавто кенярксчить. Покш Березник велентень топодсть 400 иеть, райононтень – 89. Неть покш читнень коряс поздоровонь ёвтамо сакшность ламо инжеть, кода эсенек республикань районтнэстэ, истя Мордовиянь томбальдеяк.

Инжетнень ютксольть  Мордовия Республикань Правительствань Председателесь Дмитрий Поздняков, Кронштадтонь епископось, Санкт-Петербургонь епархиянь викариесь, Свято – Троицкой Александро-Невской лаврань наместникесь Вениамин,  МР-нь Госсобраниянь Председателень полавтыцясь Евгений Тюрин ды  ламо лия содавикс ломанть, кить вечксызь тиринь райононть, кинь эрямост сюлмавсть неть мазый таркатнень марто!

Кезэрень шкадонть

Умонь шкасто саезь Покш Березникень районсо эрить тевест вечкиця, важодеме парсте маштыця ёроков ломанть. Кезэрень сёрмадовкстнэсэ, конат ванстовить И. Д. Воронин лемсэ краеведениянь музейсэ, пачтяви: Покш Березникесь теезель 1724 иестэ. Ниле пингеде икеле Карсунской сторожевой кикссэнть ульнесь ванстомань пост. Сура леенть малав эрицятне састь Иван Грозноень шкатнестэ. Самай сестэ неть таркатнесэ эриця эрзятне нолдызь малазост засечной линиянтень сыцятнень, ванстыцянь службань кандыцятнень. Те шкастонть саезь неть модатнень лангсо ояксчисэ эрить ды важодить эрзятне ды рузтнэ. 19-це пингестэ саезь Покш Березникень ёнкссо эрязасто кармасть тевс нолдавомо бондарень, кузнецень, кемень кевердемань ды стамонь тевтне. Истят велетнесэ, кода Софьино, Михайловка, Починки, Симкина, маштсть чувтосто эрьва мезень керсеме. Эрзянь Наймансо чувтонь коймень тееме, Шугуровань ды Симкинань ломантне важодсть пичеоень ды дёготень производствасо, Косогоронсетне эрьва мезть стасть-кодасть ревень кедьстэ ды понасто. Нурькинестэ, эрьва велесэ эрясть  ламо кедьчелькев ломанть, кить эзть нузялдо  виевстэ важодеме.

 

Кенярксчись ютавтовсь

одкстомтозь парксонть

Эрьва веленть ули мазый тарказо, ков оймсема читнестэ пурнавкшныть тосонь эрицятне. Покш Березникень ломантне ды сыненст сыця инжетне вечкить Ашо пандонть, Инерка ды Мацеень (Гусиное) эрьктнень, Сура леенть чирес якамо. Меельце шкасто мельспаросо пурнавкшныть Ю. А. Гагарин лемсэ парконтень. Эште советэнь шкатнестэ сонзэ туртов кочказель пек паро тарка, Кша леенть чирева улить оймсеманть туртов пек мазый кить-янт. Ледстневи, мезе тосо ансяк арасель: кизэнь кинотеатра, кафе, нурямот, бильярдной, фонтан! Истят скульптуратнень юткова, конат алтавсть пионертнэнень, гармонисттнэнень, горнисттнэнень, аравтозельть цеця марто мазый вазат. Ризксэнтень, 90-це иетне совавтсть аволь кенярдовтыця полавтомат…

2019 иестэ Ю. А. Гагарин лемсэ культурань ды оймсемань парконть витнемс «Формирование комфортной городской  среды» национальной проектэнть лувсо явозельть 8,5 млн. целковойть. Неть ярмактнень лангс витнезельть китне, тротуартнэ, сэдтне, мазылгавтозельть аллеятне, озавтсть туят. 2021 иестэ парконть одкстомтомс эште явозельть 7,9 млн. целковойть.

Нама, кенярксонь ютавтомань таркакс кочказель одкстомтозь паркось. Те чистэнть совамо таркасо эрьва сыцянтень максозель ледстневиця казне – ашо парсейне, конань лагсо пиже тюсонь сёрмадовкс: «Б.Березники – 400 лет». Кенярксчинь ютавтыцятне мезе ансяк эзть анокста тей сыцятненень! Выставканть куншкасо Эйкакшонь исскуствань школань, Эйкакшонь творчествань кудонь тонавтыцятне ды  тонавтницятне, ёроков башка  ломантне анокстасть декоративно-прикладной теевкст. Маласост микшнесть эрьва кодат сувенирт, конатне кармавтыть кувать ледстнеме те кенярксчиденть.

Эйкакштнень туртов явозель башка тарка, тосо ульнесть батут, нурямот, пандынеть ды тантей ярсамопельть. А пелицятне ардтнесть лишмесэ. Седе покштнень туртов – эрьва кодат налксемат ды пелькстамот, мастер-класст. Истя жо ютавтозель асфальт лангсо артовксонь конкурс.

Башка мель явозель патриотической куронтень. Неень шкасто те седеяк пек эрявикс тев, эдь юты специальной военной операциясь. Нать,  а стяко ламот юткстонок теевсть волонтёрокс. Те таркасонть ульнесть ломанть, кить ёвтнесть контрактонь коряс службадонть, макссть каршо валт весе кевкстематнень лангс. Истя жо весе, кинь мелезэль кодамс алтымат,  тень тейсть седейшкава.

Покш Березникень районось республикасонок ламотненень содавикс Сурань  ванстомань (оборонительной) рубеженть коряс, тесэ ули панжадо менель ало ледстнемань музей. МР-нь «Специальное управление гражданской защиты» ГКУ-нь коллективесь невтизе эсензэ интерактивной площадканть ды выставканть, конась алтавсь Сурань ванстомань рубежентень.

Казнетне –

трудонь коряс

Кенярксчинь торжественной пельксэнть панжизе МР-нь Правительствань Председателесь  Дмитрий Поздняков. Сон  Мордовия Республикань Прявтонть Артём Здуновонь, Мордовиянь Правительстванть  пельде ёвтась поздоровт ды паронь арсемат неть кавто кенярксчитнень кувалма. Истя жо тешкстынзе тесэнь эрицятнень путовксост Покш Березникень райононть виевгавтомасо. Кавто покш читнень коряс макссь ледстневиця казне. Истя жо Почетонь лемть ды казнеть явшезельть райононь эрицятненень.

МР-нь Прявтонть Указонзо коряс здравоохранениясо ламо иень перть парсте важодеманть кисэ «МР-нь заслуженной врач» почетонь лемесь максозь Покш Березникень Эйкакшонь кудонь врачонтень-педиатрантень Светлана Исайкинанень, Мордовия Республикань Почётонь грамотасо казезь Покш Березникень муниципальной райононь администрациянь финансонь управлениянь консультантось Валентина Казакова, «Социальная защита населения по Большеберезниковскому району Республики Мордовия» государственной казенной учреждениянь прявтонь полавтыцясь Елена Кузоваткина, Покш Березникень эйкакшонь туберкулезной санаториянь медсестрась Галина Сарайкина.

МР-нь Госсобраниянть пельде Покш Березникень эрицятненень поздоровт ёвтась МР-нь Госсобраниянь Председателень полавтыцясь Евгений Тюрин. Сон истя жо макссь казнеть те райононь парсте важодицятненень. Сынст ютксо «Теремок» тонавтыцясь-логопедэсь Людмила Кузоваткина, «СтройТеплоДом» ООО-нь продавецэсь-кассирэсь Ирина Шаруева.

Седе тов пурнавозтненень поздоров марто пшкадсь Покш Березникень райононь администрациянь прявтось Иван Игонов. Иван Иванович седейшкава пачтясь райононть сехте покш питнейчиденть – ломантнеде. Сехте партнэнень макссь казнеть. Истя жо ламо лембе валт те райононь эрицятненень ёвтась райононь Депутатонь советэнь прявтось Александр Топорков.

Те кенярксчисэнть Кронштадтонь епископонтень, Санкт-Петербургонь епархиянь викариентень, Свято – Троицкой Александро-Невской лаврань наместникентень Вениаминнэнь райононть виевгавтомасо покш путовксонть кисэ максозь «Почётный гражданин Большеберезниковского района» лемесь.

Вана истя киштезь-моразь ды паро тевень топавтозь мазыйстэ ютавтовсь тиринь районсонок покш чись. Кемеви, икелепелев весень учи виев важодема, вейке-вейкенень лездамо ды валдо менель!

Валентина Юдина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».