Неть читнестэ тешкставсь Финнэнь-угрань раськетнень чись. Те кенярксчинть кувалма октябрянь 26-це чистэ Марий Элэнь национальной художественной галереясо ютась «Краски и ритмы финно-угории» выставкась-концертэсь.
Пачколесть тов инжеть Мордовиястояк, неть: Рав чирень раськетнень культуратнень куншкакуронь отделэнь прявтось Валентина Дыдыкина, Покш Березникень райононь Парынзэлень «Парынза» фольклорной ансамблясь ды викшницясь Вера Ковалева. Сынь вейсэ невтизь тосо «Этношкола «Кой» проектэнть. «Парынзась» дивавтсь эрзянь ламо вайгельсэ морамосонть, невтсь, кода эрзятне киштить ды чавить пильгесэст, а вана Вера Ковалева макссь ваныцятненень мастер-класс, кода викшнемс эрзянь тешкст ды кодамс мазый каркс.
Этношколась ваксозонзо сеске пурнась моронь ды викшнемань вечкицят. Весе бажасть теемс фотографият эрзянь ды мокшонь мазый оршамопельтнень марто, токшемс викшневкстнэнь, саемс интервью минек делегациянть пельде. А вейсэнь концертэнть шкасто минек аватне эзть кирдеве ды ушодсть морамо-киштеме марийканть Эльвира Петровань «Кавто цёрат тикше ледить» моронть гармошкасо седямонзо мельга. Тень кисэ раськень политикань министранть пельде Сюкпрянь конёвгак тенст максозель.
Выставкадонть-концерттэнть башка, Этношколань участниктне мельспаросо яксесть Йошкар-Ола ошканть. Сон туристтнэнь туртов пек вечкевикс тарка. Нама, пароль бу тей самс кизна, зярдо ошось весе мазычисэнзэ. Сонзэ куншкакуросо 15–20 иетнень перть кассть-стясть пряникень кудынеть, покш башнят, замокт, сэднеть, кеврунгот ды сынь весе аштить Вишка Кокшага леенть чиресэ. Мезе ансяк аштить «12 апостолт» ошонь частнэ, конатнень эрьва колмо чассто панжовить кенкштне ды ортатнестэ лисить Иисусонь ды 12 апостолонзо марто кеврунгинетне. Тынь содатадо, тосо улить Кремля, Изнямонь площадь, Амстердамонь ульцине? Те ошонть эряви неемс! А зяро тосо музейть! Краеведениянь, раськень ёвксонь, сельмукшонь, вирень, сырань, Йошкань каткиненть ды лият. Те каткась – ошонть тешкс. Ашти сон эземне лангсо, весе инжетне бажить ёзамс судынензэ-лапинензэ ды ускомс кувака пулынензэ. Ней содадо, «Йошкань каткась!» – аволь ансяк мурнемань вал, сон ули, ды, атяка каткантень кеврунгодонть башка, ашти тосо памятник авака каткантеньгак. Ошсонть алкукскак пек ламо вишка ды покш кеврунгот.
Эштё мейсэ дивавтымизь маритне, те раськень ярсамопельтнесэ. Ули сынст минек «Подворьянть» ёнов молиця «Мари» рестораносткак. Зярс учат каванямкат, мереви ванкшномс ресторанонть нупалензэ, конатне теезь маринь койтнень коряс. Ламо ярсамопельтне пидевить-паневить алкуксонь каштомосо. Невтемакс, сывель ды сала марто ямось, конась пидеви 12 част. Сон моли минек каштом ямонть ёнов. «Коман-мелна» – те ламо слойсэ пачалксеть, «подкогыльё» – модамарь ды сывель марто сыргавтнезь прякинеть. Тесэ весе вечкить медь, сонзэ марто теевить «уячатне» – чапаксонь шариктне. А кодамо тесэ тантей сырась, сурпрят нолсесыть! А карман седе тов лангсонк «нарьгамо», пачкодтядо тынсь, весементь варчасынк ды эштё «тау!» маринь кельсэ тень ёвтатадо, те эрзянь кельсэ – «сюкпря!».
Валентина Дыдыкина