Аволь умок минек республикасо ютась «Иень тонавтниця» пелькстамо школасо тонавтницятнень ютксо. «Патриоты года» номинациясонть изницякс лиссь Ромодановань 1 № средней общеобразовательной школань 10-це классонь тонавтницясь Дарья Гусева. Школасо тонавтницятнень туртов районтнэсэ, республикасо ды масторсо ютавтовиця олимпиадатнесэ, малав весе предметтнэнь коряс, сон аволь весть лиснесь призерокс ды изницякс.
Те ероков, ансяк «ветес» тонавтниця эрзянь тейтерькась ламо эйкакшонь триця семиясто. Сонзэ марто содавиксэкс теевемстэ, ульнинь покш мельспаросо.
Паро, минек Мордовиясо улить истят эйкакшт, конат аволь ансяк парсте тонавтнить, кенерить эрьва кодамо общественной тевень топавтомояк, бажить весенень лездамо ды теде марить седей витема.
Течи Дарья Гусева минек редакциянь инже. Васенце кевкстеманок ульнесь евтнемс малавикстэнзэ ды чачома таркадонзо.
– Монь тиринь енксом – Ромоданова поселкась. Тосонь эрицятне покш мель явить масторонь историянтень, путыть питне геройтнень ине тевтненень, ванстыть кезэрень койтнень-кирдатнень. Монень прась уцяска чачомс-касомс вечкиця, чарькодиця, вейкень-вейкень ломанькс путыця семиясо. Тетям-авам – Алексей Александрович ды Елена Владимировна – вейсэ комсь иеть.
Тетям ламо иеть важодсь правопорядкань органтнэсэ. Полициясто пенсияв туемадо мейле важодеманзо поладызе РЖД-нь подразделениясо. Миненек, эйкакштненень, ули кинь лангсто саемс пример: сон видечинь вечкиця, виев, свал соды кода изнямс стакачитнень.
Авам эрямонь тевекс кочкизе лиятнень кисэ, седе пек сыретнень ды сэредицятнень, мелявтоманть. Сон важоди эрицятнень социальной ванстомань енкссонть. Те тевесь тензэ пек лади, эдь сон чевте седей, ломантненень паронь арсиця ды превс путыця. Кодамо кевкстема марто тензэ иля пшкаде, свал муи оймавтыця валт.
Сынь невтить миненек, ниленест эйкакштненень, кода весе тевтнень теемс вейсэ, вейке-вейкенень мелень явозь, кода кенярдомс лиятнень изнявкстнэнень ды лездамс сетненень, кинень стака.
Нать, а стяко тетянь-авань улить ламо казнест эйкакштнень парсте трямонь-кастомань кисэ, ютксост Мордовия Республикань Прявтонь Почетной дипломось. Сынст валдо бажамост вельде панжовить минек ерокчитне. Невтемакс, Артем лелям вечксы спортонть. Сонзэ парт невтевксэнзэ хоккейсэ, волейболсо, футболсо. Елизавета сазоронок покш мель яви художественной гимнастикантень ды киштематненень, веженць ялаксонок Матвей ушодсь каратистэнь салавачитнень тонавтнеме. Весе кемтяно, сонензэ пек лади спортонь те видэсь.
– Евтнеде аламошка эседенк, кода эрямозонк совась музыкантень вечкемась?
– Вишка пингень ледстнематнестэ те шкас эзть стувтово эйдень кужось, спортонь ды музыкань коряс кружоктне. Виде, теньсэ покш путовксост тетянь-авань. Сынь редизь маштомачим ды зярдо тень ульнесть 7 иеть ветимизь тонавтнеме музыкальной школав. Истя, овсе вишка тейтерькинекс сынь васенцеде музыкальной школав гитарасо седямо тонавтнеме ды мелезэнь сеске пек тусь. Эрьва урокось – од содамочить, од ялгат ды сехте питнеесь – музыкань чарькодемась. Весе те шканть перть, зярс мон тосо тонавтнинь, аволь весть невтия ерокчим республикань, весероссиянь ды раськеютконь музыкальной пелькстамотнесэ. Аволь весть лиснинь изницякс истят пелькстамотнесэ, кода «Музыка звезд», «Глория Фактум», «Юный виртуоз», «Созвездие талантов», «Поющая струна», «Фольклорная мозаика» ды ламо лият. Лован покш изнявксокс «Гран-при Поволжья» казненть.
Аволь умок ансяк «ветес» прядыя музыкальной школань народной инструментэнь отделениянть. Койсэнь, те монень маштови эрямосонть.
Музыкадонть башка монень пек малавикст искусствась ды шкинемань лия енкстнэ. Вечкан артомо, исследовательской роботань сермадомо ды варчнеме виень эрьва кодамо пелькстамосо.
– Дарья, тон ветят общественной важодема кода школасо, истя целанек Ромодановань районсо. Покш мель яват патриотической темантень, евтнек теде минек ловныцятненень.
– Алкукскак, монь мельс пек тукшныть истят мероприятиятне, конат алтавить патриотической темантень. Невтемакс, вете иень перть сован «Поиск» республикань патриотической вейсэндявксонтень. Те шканть перть аволь весть ульнинь минек республикань ды весероссиянь истят мероприятиятнесэ, кода «По следам 326 стрелковой дивизии» ледстнемань маршось, «Сурский рубеж» военно-исторической реконструкциясь, «Герои рядом» марафонось, патриотической эрьва кодат слеттнэ. Мелезэнь пек тукшныть Мужествань уроктне, конат ютавтовить Мордовиянь школатнесэ.
Минек прявтонть Иван Алексеевич Селеверстов марто пештяно «Книга Памяти» электронной книганть, явтано покш мель Ине Отечественной войнань участниктненень – якатано сынст калмотнень мельга.
Тешкстаса, военно-исторической лагерев молемадо икеле ютавтовить конкурсонь коряс ванкшномат. Ансяк теде мейле сайнимизь «Страна Героев», «Встреча поколений» лагертнес, нилексть ульнинь «Орленок» ВДЦ-со школань поисковой отрядтнэнь Весероссиянь слетсонть.
2023 иестэ минек школасо панжовсь «Движение Первых» вейсэндявксонь первичной отделениясь. Прявтонок мереманзо коряс варчия ерокчим «Достоин и ты» премиясонть ды лисинь изницякс. Кочкамотнеде мейле аравтымизь Ромодановань районсо местной отделениянь советэнь прявтокс.
Теде мейле общественной тевтне ков седе ламолгадсть: эрьва кодат фестивальть, квестт, налксемат, пелькстамот ды истя седе тов. Эште мелезэнь пек тукшны волонтеронь тевесь, зярдо седейшкава лездат ломантненень. Минь ялагатнень марто ютавттано социальной проектнэнь коряс пелькстамот, кодатано кекшемань алтымат, тейтяно окопонь штатолт ды истя седе тов.
– Дарья, мезе бу тынь арсевлиде неень шкань од ломантненень?
– Неень шкане од ломантне сеедьстэ кочкить эстест уцяскав эрямо стакачивтеме. Те аламодо а виде. Од порась – истямо шка, зярдо тон эсь прят теят тонсь, зярдо ули мелеть арсемс вадрядо, тешкстамс од аравтлувт ды сынст топавтомс. Косо а лиси, а максомс прянть ды молемс икелев. Одсто пек покш мель седе ламо содамс, неемс, ардомс ды редямс республикань ды масторонь мазычитнень.
Весе од ломантненень арсян эрямс сехте паро эрямо, эдь сон минек вейке. Уледе вейсэ вечкевикс ломантнень ды ялгатнень марто, илядо нолда пря ды уледе уцяскавокс. Кеман, бути вейке ломанесь тейсы уцяскавокс лиянть, мастор лангсо карми улеме ков седе вадря!
Валентина Юдина