Пятница, марта 29, 2024
Важное

Улить ломанть, кить эсь вечкевикс тевезэст молить ламо иень перть. Вана Алексей Катаев тевензэ кочкизе эйкакш порасто, сестэ, зярдо тонавтнесь тиринь велень средней школасо.
Эзь нолдтне физкультурань вейкеяк урок. Тонавтыцясь Мария Петровна Катаева покш мель явсь спортонтень. Алексей Катаев школадо мейлеяк эзизе кадно физкультуранть ды спортонть. Кудо вакссо турниксэнть, конань сонсь аравтызе-путызе, кепсесь сэрензэ. Тетязо, Михаил Васильевич, яла цёранстэнь кортыль: «Мезть яжат ловажат, адя вейке чи мартон паксянь сокамо, вансак кода важодить сюронь кастыцятне». Алексей якась. Ды аволь весть.

Сась 2003 иесь. Алексей Катаев прядызе Орданьбуень средней школасо тонавтнеманзо. Зярдо максызь тензэ средней образованиядо аттестатонть, сон кувать апак арсе сыргась документэнзэ марто Россиянь МВД-нь Саратовань юридической институтов.
Алексей Катаев тонавтнесь вадрясто. Пек вечкелинзе институтонь ректоронть, полициянь генерал-майоронть, юридической наукань докторонть В.Н.Синюковонь лекциянзо.

– Владимир Николаевич тонавтсь «Теория государства и права» предметэнть вечкеме, – ледстни А.М.Катаев. – Сонзэ лекциятнесэ мельде-валдо кунсолыцят арасельть. Курсанттнэнь марто ютавтнесь вастовомат, косо ёвтнесь правоохранительной органтнэсэ важодицятнеде.

Институтсо тонавтнемань иетне ливтязь ливтясть. Алексей Катаевень кучизь следователекс Дубенкань районов. Тонавтнинзе райононь велетнень, сонзэ эрицятнень. Велень ломантнень марто ютавтнесь вастовомат, косо ёвтнесь правоохранительной органтнэсэ важодицятнеде, кода а теевемс уголовникекс.

А.М.Катаев лангс ливтнесь сетнень, кить колсесть уголовной законодательствань норматнень. Нейгак мельсэнзэ вейке тевесь. Те кажось лиссь 2009 иень февральстэ. Красное Польцо велесэ, кона ашти Ульяновской областенть маласо. Велесэнть 7 эрицят ды сад-пирень кирдицят. Тюрьмасто лиссь вейке алюха. Зепсэнзэ ярмакт арасельть. Ардыль Татарстанов. Сон лоткась Красное Польцо велес. Совась 75 иесэ бабинентень. Вешсь кедьстэнзэ ярмакт. Кудазоравась, нама, эзь максо. Тень кувалма преступникесь седеяк азаргадсь. Сон бабиненть чавизе ды нарьгизе. Нурькинестэ меремс, пек тандавтнизе. Туемстэ керсинзе телефононь уськтнень, лия проводтнэнь.

– Дубенкань РОВД-в пачтясть шабратне ансяк кавто чинь ютазь, – ёвтни А.М.Катаев. – Минь сеске карминек содамо, кие теизе те преступлениянть. Велесэ ванкшнынек кудонть, сонзэ потмонзо. Мартон сакшность эксперттнэяк. Вешнинек алюханть, те ульнесь Глазков Александр Петрович. Преступлениянь теицянть муинек ансяк кавто иень ютазь. Аволь Татарстансто, ков ардыль сон, Самарань областьстэ. Ускинек сонзэ Дубенкав ды пекстынек судонть самс. Судизь ды макссть 8 иеть тюрьмасо аштемас. Бабантень максозельть весе ярмактне, конатнень нельгекшнынзе алюхась.
Дубенкань районсо А.М.Катаев следователекс важодсь кото иеть. Мейле, 2014 иестэ, сон ютась важодеме Россиянь МВД-нь «Лямбирский» отделэв. Тесэ Алексей Михайловичень мельга кемекстазельть Кочкуровань районоськак. Ванкшновсть эрьва кодат тевть: экономикань, коррупциянь.

Кочкуровань райононь Сурвелесэ ульнесь «Сура» предприятия. Сонзэ прявтось манчесь аволь ансяк эсь козейканзо, мартонзо важодицятненьгак. Ансяк эсензэ зепензэ пештсь ярмакто. 2015 иестэ тенень путозель пе. Теньсэ, нама, покш таликазо следователенть Алексей Михайлович Катаевень.

А мезть сёпомс, эрьванть ули ломанезэ, кие тонавтызе парсте важодеме. Истямо ломанезэ ули А.М.Катаевеньгак.
– Мон покш сюкпря ёвтан юстициянь подполковникентень Михаил Владимирович Афроськиннэнь, – видькстась Алексей Михайлович. – Сон тонавтымим кода важодемс эрицятнень марто, кодамо тевентень явома покш мель ды истя седе тов. Мон нейгак мельсэнь кирдян сонзэ арсематнень.

А.М.Катаевень зярдо пры ютко шказо, оянзо марто налкси футболсо, кепси 16 ды 32 килограммань гирят. Эли эсь автомашинасо нинзэ Нина Александровнань ды цёранзо Левань марто ардыть тиринь Дубенка ёнксонь Орданьбуе велев. Тесэ сынь кудосот, тесэ амольдить вандынь чинтень вийть.
«Тиринь ёнксось монь эжди, максы вийть», – видькстась А.М.Катаев.

Петр Зиновьев
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».