МР-ва МВД-нь Уголовной розыскень управлениянь сотрудниктне ливтизь лангс зыянов тевень теицятнень.
Россиянь МВД-нь «Чамзинский» ММО-нь дежурной частев мельга-мельцек пшкадсть Комсомольский посёлкань кавто аватне, конатне пачтясть манямодост.

Пенсионеркатнень валост коряс, кудонь телефонозост гайневтсть тенст а содавикс ломанть, конатне ёвтызь пряст аватнень малавиксэкс ды мерсть, келя, сынст кувалма лиссь ДТП. Корязост уголовной тевень а сыргавтомга эрявсь пандомс ярмакт. Курьерэнтень, конась сась тенст кудов, аватне макссть 360000 ды 400000 целковойть.

Оперативной тевтнень ютавтомсто уголовной розыскень сотрудниктне ливтизь лангс курьерэнть – 15 иесэ цёрыненть, конань валонзо коряс, телеграм-каналсо сон мусь курьерэнь тевень топавтомга яволявтома. Тевесь мелезэнзэ тусь, ды сон кармась топавтомо тензэ мерезенть. Макссть адрес, конань коряс цёрынесь сась аватненень, саинзе кедьстэст ярмактнень ды кучинзе ёвтазь счётонтень, эрьва суммастонть вете проценттнэнь кадынзе эстензэ.

Эряви тешкстамс, теде икеле истямо жо зыянов тевень тееманть кис уш кундазельть кавто ломанть. Неень шкасто неть тевтнень ванкшномась поладови.