Маень 9-це чистэ весе Мордовиянть келес, эрьва велесэ, эрьва ошсо ютасть кенярксчинь мероприятият. Ине Изнямонь чись тешкстазель Отяжелень райононь Сабанцелесэяк.

Чавовозь солдаттнэнень кеврунгонть ваксс пурнавкшность велень эрицятне, школасо тонавтницятне, эйдень кужов якиця эйкакштне, «Сабанчеевское» ООО-нь прявтось Д.Н. Игушкин, велень администрациянь прявтось В. П. Сидоров, ветерантнэ-афганецтнэ, инжетне. Весень кедьсэ ульнесть тиринь ломанест фотографияст. «Бессмертный полк» акциясь ютавтозель валске рана, тонавтницятне покштяст фотографияст марто састь митингев, путсть кеврунгонть ваксс цецят ды каштазт, `евтнесть стихотвореният, морасть войнань морот.

Седе тов ютавтовсть спортивной налксемат, конатне алтазельть Сабанцелень воинэнтень, Ине Отечественной войнань героентень И. А. Гусевнень. Пелькстамотне мольсть футболонь, волейболонь, армспортонь, канатонь ускомань ды лия ёнксонь коряс. Теске жо панжозель паксянь кухня. Соревнованиятнеде мейле «Сабанчеевское» ООО-нть пельде изницятне тешкстазельть казнесэ. Седе тов Культурань кудосо невтезель И. А. Гусевде документальной фильма. Сонзэ арсицясь А.А.Учеваткин сонсь сакшнось ёвтнеме те фильманть снимамодо земляконзо туртов.