Саранскойсэ ютась Рузонь Православной Церьковань духовной тонавтнемань таркатнень регентской отделениятнень хоронь Весероссиянь II -це фестивалесь. Васенце чистэнть хортнэ моравтсть Иневанькс Феодор Ушаков лемсэ соборсо Пазонь литургиясо. Весемезэ ве шкасто моравтсть 250 ломанть.

Седе тов ушодовсь пелькстамось, хортнэнь кунсолось жюрись. «Сергей Рахманинов и его эпоха» гала-концертэсь ютась И. М. Яушев лемсэ музыкальной театрасо. Тесэ яволявтозельть изницятнень лемест. Истя, гран-принть изнизе Санкт-Петербургонь Духовной Академиясь. Васенце таркасот – Московонь Духовной Академиясь ды Екатеринбургонь Духовной Семинариясь. Омбоце таркась максозь Самарань ды Пензань духовной семинариятненень. Колмоцесь – Воронежень ды Ярославлянь семинариятненень. Ваныцятне эсь вайгелест максызь Донской духовной семинариянтень.

Лембе вал марто пурнавозтненень пшкадекшнесть Саранскоень ды Мордовиянь митрополитэсь, жюринь председателесь ды сопредседателесь Зиновий, фестивалень художественной руководителесь, Санкт-Петербургонь Духовной Академиянь Регентской отделениянь прявтось, Церковной искусствань факультетэнь деканось Елена Гундяева. Казнесэ ды дипломсо казевсть регентэнь отделениянь прявттнэ, хоронь ветицятне.

– Ломанесь, церьковав сазь, васенцекс, мезе мари – озномань моравтоманть. Сон чарькодеви весенень. Бути парсте гайги, токши ойменть – ломаненть чачи мелезэ самс тей эштё аволь весть. Те – миссионерэнь покш тев, – кортась Елена Гундяева.

Хоронь фестивалесь ютавтовсь культурань инициативань Президентэнь фондонть лезксэнзэ вельде.