Пятница, февраля 03, 2023
Важное

Минек масторонь историясь пек сюпав иневанькс ломаньсэ, кить, покш стакачитнень лангс апак вано, кадовсть Пазонтень кемицякс ды весе виест ды содамочист максызь ломантненень лездамонтень, сынст эрямост ванстомантень. Истятнэнь юткс совавтовсь масторлангонь келес содавикс учёноесь, хирургиянь ды топографической анатомиянь коряс профессорось, Симферополень ды Крымень архиепископось Лука Войно-Ясенецкий (1877-1961). Мирсэ сонзэ лемезэ Валентин Феликсович.



Ламо эрьва кодат майсемат эрямосо савсь цидярдомс содавикс врачонтень ды седеймариця священнослужителентень. Мезеяк лангс апак вано, те ине ломанесь ванстызе ванькс кемеманзо ды мик тюрьмасо улемстэяк эзь лотка озномадо ды кажос понгозтненень лезксэнь максомадо.

Минек республикань эрицятне аштить покш мельспаросо васняяк сень кувалма, сы шкань Симферополень ды Крымень Лука Архиепископось медицинасо васенце покш важодевксэнть ушодызе Мордовиясо, Орданьбуень моданть лангсо.

Аволь умок Орданьбуень ды Отяжелень епископонть Вениамин владыканть ушодксонзо ды чанстямонзо коряс Орданьбуень Епархиянть юрсо ютавтовсть иневанькс Луканень алтазь ловноматне. Истямо покш мелень витемань тевентень минек республикань ды сонзэ томбальде сыця инжетне пурнавсть кеменцеде.

Юбилейной ловноматне ютавтовсть «1922-2022 гг. Уроки столетия. Новомученики и Исповедники земли Мордовской» лементь ало.
Валскень вейксэ чассто саезь эрьва ёндо сыця инжетнень ды ловноматнень участниктнень вастсть Орданьбуень Культурань кудосо. Миненек сакшность аволь ансяк те райононь ды республикань эрицятне, истя жо шабра регионтнэстэяк. Онлайн лувсо сюлмавкшность маласо омбо мастортнэстэ.
Те чистэнть ламот кирдевсть те зданиянть икеле, вансть ушосо понгавтозь покш экранонть лангс, косо невтевсь документальной фильма иневанькс Лука святителенть эрямодо. Истя жо сон невтевсь Культурань кудосо.

Научно-практической конференциянть панжизе сонзэ арсицясь-ушодыцясь – Орданьбуень ды Отяжелень епископось Вениамин. Сон пачтясь, кодамо покш таликазо минек эрямосо те конференциянть. Сонзэ анокстамосо ды ютавтомасо владыкантень покш лезкс макссь Мордовия Республикасо наукань заслуженной деятелесь, Раськеютконь патологиянь академиянь членэсь, медицинань наукань докторось, профессорось Надежда Алексеевна Плотникова. Те чистэнть Орданьбуень моданть лангс састь ламо инжеть. Эрьвась юткстост ёвтась лембе ды сюкпрянь валт паро тевенть анокстамонзо ды ютавтоманзо кис. Шумбракстнемань вал марто пурнавозтненень пшкалесть Ардатовань муниципальной райононь прявтось А. Н. Антипов, МР-нь Госсобраниянь Председателень полавтыцясь Н.В. Долматова, Н. П. Огарёв лемсэ Мордовской государственной университетэнь ректорось Д. Е. Глушко, МР-нь Здравоохранениянь министрань полавтыцясь С.В. Саушев, МР-нь Образованиянь министрань полавтыцясь И. К. Дугушкин, Культурань, национальной политикань ды архивень тевень министрань полавтыцясь – аволь коммерческой организациятнень марто важодемань отделэнь прявтось А. Б. Сявкаев, СПИДэнть каршо бороцямонь ды сонзэ а нолдамонь коряс Мордовской республиканской центрань главной врачось И. В. Доронина.

Миненек кодаяк а эряви стувтомс сеть ломантнень, кить эсь эрямодост апак арсе казсть сонзэ лиятненень, кить лездасть ванстомс малавикс ды содавикс ломантнень кемемаст. А зяро сетнеде, кить а шкастонзо тусть эрямосто, стакачитнень лангс апак вано, кадовсть Пазонтень кемицякс. Теде пачтясь «Новомученики и исповедники земли Мордовской» докладсонзо Н. П. Огарёв лемсэ МГУ-нь исторической наукань кандидатось, экономической историянь ды информационной технологиятнень кафедрань доцентэсь Татьяна Анатольевна Першина.
«Декрет 1918 года об отделении церкви от государства как основа новых государственно-церковных отношений» пачтямо марто пурнавозтненень пшкадсь Н. П. Огарёв лемсэ МГУ-нь философиянь кафедрань доцентэсь, исторической наукань кандидатось Алексей Иванович Белкин.

Церьковань историясо ламо пингетнень перть кодат шкат ансяк арасельть. Зяро духовной питнейчить кольстязельть, зяро храмт калавтозельть ды тосо уликс сюпавчить салазельть…
Те теманть лангсо домкасто важодсь ды пачтясь научно-практической конференцияв сыцятненень Покш Игнатовань средней школань начальной классонь тонавтыцясь Елена Ивановна Аринина.
Научно-практической конференцияв сыцятне седейшкава кунсолызь Н. П. Огарёв лемсэ МГУ-нь тонавтыцянть, социологической наукань докторонть, социологиянь ды социальной роботань кафедрань профессоронть Татьяна Михайловна Дадаевань. Сонзэ докладонть лемезэ: «Молодежь в цифровом пространстве. Новые риски и угрозы».
Нама, теде кортамс неень шкане пек эряви ды, васняяк, од ломантнень марто. Тешкстасынек, те темантень покш мель яви Орданьбуень ды Отяжелень епископось Вениамин владыкась, сон сеедьстэ вастневи эйдень кужосо, школасо ды вузсо тонавтницятнень марто.
Эрьва научно-практической конференциянть ютавтомадо икеле школасо тонавтницятнень ютксо яволявтневи артовксонь коряс пелькстамо. Неень изницятненень казнеть явшесь сонсь Вениамин владыкась, вейсэ Ардатовань муниципальной райононь прявтонть Александр Антипов ды Н. П. Огарёв лемсэ МГУ-нь ректоронть Дмитрий Глушко марто. Эйкакштненень максозельть Почетонь грамотат ды питней казнеть. Кемеви, неть цёрынетне ды тейтерькатне, паряк, истя жо, кода Лука, эрямонь тевекс кочкасызь медицинанть ды кармить улеме Пазнэнь кемицякс, паро тевень тееме бажицякс!
Меельцекс Орданьбуень Культурань кудонь важодицятнень вийсэ невтезель концерт.
* * *
Теке жо чистэнть Орданьбуень ды Отяжелень епископось Вениамин владыкась Н. П. Огарёв лемсэ Мордовской государственной университетэнь ректоронтень Дмитрий Евгеньевич Глушконень ютавтсь экскурсия Епархиянь управлениянь зданияванть. Сынь ванкшнызь Епархиянь церковно-исторической музеенть, косо невтевить кавто экспозицият.

Васенцесэнть ёвтневи масторлангонь содавикс религиятнеде, омбоцесь жо алтавсь святителенть Лука Войно-Ясенецкиень эрямонтень ды медицинасо важодемантень.
Тешкстасынек, республикасонок васенцеде панжовсь истямо выставка, конась ютавтови «Религии мира» лем ало. Сон анокстазель вейсэ Н. П. Огарёв лемсэ Мордовской государственной университетэнь музейной комплексэнть марто. Арсемась ульнесь владыканть. Сонзэ эйсэ Лука Войно-Ясенецкий невтеви эрьва ёндо, домкасто панжови священнослужителенть валдо оймезэ, невтеви, кода тевензэ парсте содыця хирург, кинь важодевксэнзэ медицинасо тевс нолдавить те шкас.

Нать, а стяко Н. П. Огарёв лемсэ МГУ-нь ректорось Дмитрий Евгеньевич Глушко ёвтась истямо мель: кортамс ректоратсо, штобу теемс студенттнэнь туртов Лука святителенть лемсэ именной стипендият.
Те мероприятиясонть истя жо ульнесь Ардатовань медицинской колледжень директорось Галина Юрьевна Слугина.

Валентина Юдина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».