Ицялонь районсо ули Калыж (Калыша) веле, конась ашти вирьсэ, мазыйдеяк мазый таркасо. Те веленть теицякс кармасть Ламбаськестэ сазь ломантне, ульнесь те 1914 иестэ. Неень шкасто эрицятнеде тесэ аволь ламо, пельсядояк а пурнавить, ансяк улить ероков ды мелявтыця ломанть, конатне а максыть те велинентень емамс. Самай сынст вийсэ ды лезксэст вельде эрияк Калыж велесь.
Овсе неть читнестэ те эрзянь велесэнть прядозель эрявикс ды покш тев – Калыж велень калмолангсо – мелень явомань ды ледстнемань таркасонть – прядозель од часовнянть стявтомась. Те тевесь тесэнь эрицятнень туртов кармась духовной одкстомтомань тешксэкс.
Икеле велень калмолангсонть аштесь чувтонь часовня, конась ульнесь седеень оймавтомань ды ознома таркакс ламот поколениятнень туртов. Ансяк шкась ды пертьпельксэнь зыянтнэ эзизь вансто чувтосто теевксэнть, сон таштомсь ды савсь калавтомс. Тевенть чарькодезь ды Саранскоень епархиянть чанстямонзо вельде кемекстазель стявтомс од часовня, ней уш кирьпецьстэ, штобу аштевель ламо пингеть.
Тедедень мартонь 30-це чистэ Ицялонь Михаило-Архангельской храмонь настоятелесь протоиереесь Сергей Сакович, конась истя жо топавты духовной попечениянть Калыж велень приходсонть, ютавтсь часовнянть тееманзо ушодомга молебен.
Часовнянть строямонзо ушодомга молебенэсь ютавтовсь Иоанн Лествичник иневаньксэнть ледстнема чистэ – Ине постонь ветеце недлянть ушодовомсто. Те тевесь строямонть ушодомантень макссь башка енкс, ды тешкстызе од храмонть ды сонзэ менелень ванстыцянть ютксо духовной сюлмонть.
Ды вана колмо ковонь ютазь весе тевтне топавтовсть. Од часовнясь анок. Неть читнестэ Ицялонь Михаило-Архангельской храмонь настоятелесь протоиереесь Сергей Сакович ютавтсь благодарственной молебен, козо пурнавкшность Калыж велень эрицятне, тесэ чачозтне ды сеть, кить макссть лезкс часовнянть теемасо.
Кода евтынек вере, од часовнясь светяви Иоанн Лествичник преподобноенть лемсэ, конась содавикс эсь духовной подвигтнесэ ды чудотворениятнесэ. Иневаньксэсь Иоанн Лествичник (эрясь VI-VII пингетнестэ) ловови «Лествица» аскетической содавикс руководствань авторокс, конасонть максови Пазонтень духовной куземась. Сонзэ тонавтомазо ды эрямонь примерэзэ максыть вийть Пазнэнь кемицятненень ламот пингетнень перть.
Благодарственной молебенэнть ютавтомадо мейле протоиереесь Сергей Сакович пшкадсь пурнавозтненень:
– Весе минь, православной ломантне, а стувтнетяно эсь покштятнень-бабатнень. Эсь Тиринь масторонтень, раськентень, малавикстнэнень, покштятнень калмотненень вечкемась ды мелень явомась максовить авань ловсо марто. Минек жо тевенек – максомс те вечкеманть эсь эйкакштненень, нуцькатненень, правнуцькатненень. Эдь зярдо миньгак карматано те калмолангсонть, истя жо улевель кинень самс калмонок лангс, ловномс молитват, озномс. Часовнясь теезь вадрясто, кеместэ. Бути а лисить кодаткак зыянт, сон карми аштеме сядот иеть.
Часовнянть тееманть кис жо сюкпря эряви евтамс Ицялонь райононь «Инсаровское» велень хозяйствань предприятиянь прявтонтень Валентин Иванович Юрченковнень. Самай сонзэ мелензэ, лезксэнзэ ды важодеманзо вельде весемесь топавтовськак.
Кода евтнесь Валентин Иванович, Калыж велесь сонзэ туртов малавикс. Тесэнь калмолангсонть калмазь сонзэ тетязо-авазо ды малавиксэнзэ. Самай сынст ледстнемга теезьгак од часовнясь.
– Весе тевтнень ушодынек тедедень апрельстэ. Покш сюкпря евтан строительтненень Александр Николаевич Чернобровкиннэнь ды Алексей Михайлович Бабушкиннэнь, конатне путызь аволь ансяк весе маштомачист, часовнянть теемантень сынь путызь оймест. Арсян, сон лиссь вадря, – мерсь Валентин Юрченков.
– Пек паро, улить истят ломанть, кода Валентин Иванович, конат арсить эсь тиринь енкстост, малавикстэст, – тешкстызе протоиереесь Сергей Сакович. – Те калмолангсонть калмазь Валентин Ивановичень тетязо-авазо – Иван ды Анастасия Юрченковтне. Секскак маласо шкастонть часовнясонть путовить эште кавто пазават – иневанькстнэнь Иоаннонь ды Анастасиянь.
Покш сюкпря Валентин Иванович Юрченковонь лемс евтыть Калыж велень весе эрицятне. Эдь од часовнянь теемась – те аволь ансяк зданиянь стявтома, те тиринь енксонь духовной тевкадовксонтень путовкс, Калыж велень ды весе Ицялонь райононть туртов кемемань тешкс. Часовнясь карми таркакс, косо эрьвась муи седеень оймавтома, косо молитва марто пшкади Пазонтень, кемекстасы эсь кемеманть ды ледстясынзе кулозтнень. Те пек покш ды эрявикс тев.
Юлия Еремина
Фототне Егор Горинэнь