Тиринь «Эрзянь правда» газетань лопатнесэ поладтано ёвтнеме республикасонок те иень сёксня ютавтовиця «Подвиги» проектэнь «Героень шка» («Время героев») народной омбоце премиянь лауреаттнэде. Течи минек редакциянь инженек – «Пиже мир» республикань эйкакшонь экологиянь организациянь прявтось, Саранск ошонь округонь Администрациянь Социальной политикань коряс департаментэнь прявтонь полавтыцясь Ольга Евгеньевна РУЧИНА.
Ледстясынек, сон лиссь изницякс «Герои экологии» номинациясонть. Республикань Культурань кудонь сценанть лангсо казненть тензэ максызе Нижегородской областень пожарноесь Сергей Дажинов. Те цёрась аволь пек умок эсензэ эрямодо апак арсе бензин марто пешксе цистернанть эйстэ тракторсо ве ёнов ускизе палыця локомотивенть.
Казненть максомсто мероприятиянть ветицятне ёвтнесть «Пиже мир» республикань эйкакшонь экологиянь организациянть тевдензэ. Сонзэ прявтсо Ольга Евгеньевна.
Ютазь иестэ «Пиже мир» республикань эйкакшонь организациянтень топодсть колоньгемень иеть. Вейксэньгеменце стака иетнестэ сонзэ теемадо арсемась сась Мордовиясо содавикс экологонтень, тонавтыцянтень Вячеслав Михайлович Смирновнень. Сонензэ алкуксонь лездыцякс се шкане ульнесть Саранск ошонь 7-це номер школань важодицятне ды тонавтницятне.
Кода пачтясь Ольга Евгеньевна, васень шкасто саезь Вячеслав Михайлович пек ламо тейсь «Пиже мир» ДЭО-нть содавиксэкс теемга. Республикасонок се шкане сон ульнесь васенце общественно-экологической организациякс, кинень максовсь государственной лезкс: МР-нь Пертьпельксэнь ванстомань ды экологиянь министерстванть (сестэ сон истя лемдевсь), МР-нь Образованиянь министерстванть, МР-нь Од ломантнень тевест коряс Госкомитетэнть ды Саранск ошонь Образованиянь управлениянть пельде.
Самай се шкастонть те организациянтень совасть кавто тёжадо ламо эйкакшт ды тонавтыцят. Ней эйстэдест колмо тёжадо ламо. Республикань ды Саранск ошонь школатнесэ теевсть филиалт. Сонензэ максозель республиканской статус ды, кода общественной вейсэндявкс, кемекстазель МР-нь Юстициянь министерствасо.
Вячеслав Михайлович комсь иень перть ульнесь школасо тонавтницятнень туртов экологиянь коряс конференциянь, промкстнэнь пурныцякс ды ютавтыцякс. Те сонзэ бажамонзо вельде нолдавсь МР-нь Якстере книгась, ков сон сёрмадсь ламо статьят ды макссь мазый фотографият. Весемезэ Вячеслав Смирнов нолдась 30 книгат ды статьят.
Сон сеедьстэ журналисттнэнь сайнесь Н.П. Огарёв лемсэ МГУ-нь биостанцияв, конась ашти Покш Березникень райононь Симкина веленть маласо. Пертьпельксэнть ванстомадо статьянзо сеедьстэ печатавсть республикань газетатнень лопатнесэ. Сонзэ ушодксонзо коряс телевидениясо ульнесь «Пиже мир» программась, радиосо «Пиже мирэнь уроктне» передачась, республиканской библиотекасо ютавтовсть «Пиже гостиной» вастовоматне. Инжекс тосо ульнесть сядот тейтерькат ды цёрынеть, кить прявт тевекс кочкизь пертьпельксэнь ванстоманть. Минь а стяко ледстинек Вячеслав Михайловичень, эдь те изнямосонть васняяк сонзэ покш путовксозо. Ней те тевенть полады Ольга Ручина.
Эсь шкастонзо Ольга Евгеньевна прядызе Мордовиянь М. Е. Евсевьев лемсэ государственной педагогической институтонть «Биолог, биологиянь ды химиянь тонавтыця» специальностенть коряс. Сонензэ парсте содавикст пертьпельксэнь стакачитне ды машты эйкакштнень марто важодеме.
Кода вере пачтинек, экологиянь общественной «Пиже мир» эйкакшонь организациянтень ушодксось путовсь Саранск ошонь округонь школасонть тонавтницятнень ды тосонь тонавтыцянь коллективенть вийсэ. Васень шкасто эйкакштне явовсть колмо пелькска. Васенцесь – «Войди в зелёный мир», тов совить 1–4-це класстнэсэ тонавтницятне, кить бажить эсь сельмесэ путомс питне пертьпельксэнь мазычитненень. Омбоцесь – «Познай зелёный мир». Сон вейсэнди 5–8-це класстнэсэ тонавтницятнень. Сыненст содамочитне максовить практической занятиятнень, экскурсиятнень, экспедициятнень ды пертьпельксэнтень лезксэнь максоманть вельде. Колмоцесь алтави седе покштненень, 9–11-це класстнэсэ тонавтницятненень, кить виевстэ важодить пертьпельксэнь ванстомань ды исследовательской тевтнесэ, невтить ёрокчист научно-практической конференциятнесэ.
«Пиже мир» эйкакшонь экологиянь организацияс совицятне сеедьстэ невтить ёрокчист школань, республикань, весероссиянь олимпиадатнесэ.
Кода тенек пачтясь Ольга Евгеньевна, вана уш кемень иень перть Саранск ошонь округсо ютавтовить истят пелькстамот-акцият, кода «Сохраним мордовские леса», «Посади дерево», «На пороге Рождества». Сынст вельде пурнавить макулатура, а маштовикс батарейкат.
Од иеде мейле ёртозь пичинетненень ды кузнэтненень максови омбоце эрямо – эйстэст теевить налкшкеть-мезть. Тонавтницятне невтить содамочить регионъютконь «Дерево Земли, на которой я живу» научно-практической конференциясо. Сынст марто ютавтовить экологической промкст ды экспедицият пертьпельксэнь ванстомань башка таркатнесэ.
– «Пиже мир» ДЭО-нть вийсэ тевс нолдазь 21 проект, сынь топавтовить Президентэнь Грантонь фондонть, РФ-нь Правительстванть, РФ-нь Общественной палатанть, «Знание» Общероссийской обществанть ды лия ведомстватнень лезксэст вельде, – мерсь Ольга Евгеньевна.
2017 иестэ од ломантне лиссть изницякс «Сделаем вместе» Весероссиянь акциясонть, «Экология России» ды «Здоровое будущее» федеральной партийной проекттнэсэ. Те акциянть ютавтомадо мейле сядодо ламо активисттнэ ульнесть «Артек» МДЦ-со ды «Орлёнок» ВДЦ-со.
Колмо иеде икеле эрямос совавтовсь «Познай зеленый мир Мордовии» проектэсь, конась идезель Президентэнь Грантонь фондонть вельде. Ютазь иестэ тевс нолдазельть «Город Экологической Безопасности» ды «Город экологической безопасности. Новые возможности» кавто проекттнэ.
Эйкакштнень ды од ломантнень шумбрачист, пертьпельксэнь мазычитнень, ваньксчинть ванстомга «Экошколанть» юрсо ютавтовсь «Друг природы» акциясь.
Ошонь эрицятнень мельс истя жо тукшнось «Экосумка – 30 пакетов» акциясь, ламот юткстост кандокшность пластикень пакетт, конатнень полавтызь од экосумканть лангс, 5000 пакетт максозельть REMONDIS компаниянтень, сынст тевс нолдамга.
«Город Экологической Безопасности» проектэнть ды эйкакшонь налксема площадканть теемась кадовсь Саранск ошонь Экопарксо сехте ледстневицякс. Экояннэсь тов сыцятненень максы содамочить пертьпельксэнть коряс. Экологиянть апак кола эйкакштнень туртов теезь оймсема паро тарка. Истя жо ошонь эрицятнень туртов ютавтозь практической занятият, кить юткошкасто сакшность те таркантень оймсеме.
Экотаркасонть понгавтозь ламо стендт, конат пачтить ломантненень, кода эряви ветямс прянть пертьпельксэнть ванстомга ды шукштнеде олякстомга. Тоско жо аравтозельть контейнерт, ков пурнавсть а маштовикс батарейкат-мезть. Ансяк истя, пертьпелькстэнть седе ламо содазь ды сонзэ вечкезь, ванстови минек шумбрачись ды эрямось.
Валентина ЮДИНА