Иестэ иес Мордовиянь прявт ошось – Саранскоесь, тееви яла седе вадрякс, сельмень кенярдовтыцякс. Куротне шкастонзо ванськавтовить, сынст мазылгавтыть ламо цецят.
Умок уш эрямо кудотнень васенце этажтнесэ панжовсть микшнемань-рамамонь таркат, банконь филиалт ды лия социальной учрежденият. Те пек паро шумбра ломантненень. Стакачивтеме минь ютатано аволь пек сэрей кузтематнева ды соватано эрявикс таркас. А кода улемс стакасто сэредицятненень, сетненень, кинь апак учонь кажось сюлминзе инвалидэнь креслатнес, коляскасо вишка эйкакш марто тейтерь-аватненень?
Те стакачинть коряс тевтнень ванкшноманть саизь эсест лангс Мордовия Республикасо Общероссийской народонь фронтонь активисттнэ вейсэ Весероссиянь инвалидэнь обществань (ВОИ-нь) Мордовской республиканской организациянтень совицятнень марто.
Рейдэнь ютавтома таркакс кочказель Саранск ошонь Ленин лемсэ проспектэсь. Ды те а стяко. Эдь те куросонть пек ламо эрьва кодат социальной совамо таркат. Инвалидэнь коляскантень озакшнось ВОИ-нь Мордовской республиканской организациянь прявтось Дмитрий Александрович Орлов. Те чистэнть республикань ды Саранск ошонь журналисттнэнь марто ванкшнозельть малав 20 объектт. Сынст ютксольть эрьва кодат микшнема таркат, аптекат, банкт, туристэнь фирмат ды ламо лия эрявикс таркат. Виде, ламо истят зданиятнень эйсэ ульнесть тердемань кнопкат, ансяк сынст лангс лепштямодо мейле а свал учовсть те эли тона учреждениянь важодицятне, конат бу максовольть лезкс стакасто сэредицянтень.
Ванкшноматне невтизь, сеть кузтематне, конат улить коляскасо ардыцятнень туртов, ламот ютксост теезь мельде-валдо. Васенце стакачинть коляскасо аштицясь редизе Б.Хмельницкиень лемсэ ды Ленинэнь проспектэнь киулосонть. Кинть чиресэ пирявксось (бордюрось) истямо сэреель, ськамозонзо сэредиця ломанентень сон кодаяк эзь изняво… Седе тов сон снартсь совамс кшинь лавкас. Ансяк тень теемс тензэ истя жо эзь удала.
Седе тов рейдэнь группась снартсь совамс туристэнь фирмас. Ансяк теньгак теемс ульнесь а шожда, эдь маласонзо аравтозь рельсатнень ланга коляскась эзь пурдаво а вить, а керш ёнов. Содазь, инвалидтнэнень сеедьстэ савкшны якамс надобия мельга аптекав. Ансяк тосо сынст истя жо учость стакачить. Вейкенть маласо кнопканть лангс лепштямодо мейле савсь учомс кувать, зярс фармацевтэсь лиси тензэ лездамо.
Кода невтизь ванкшноматне, Саранск ошонь округсо улить ламо пандуст ды тердемань кнопкат. Тень лангс апак вано, ялатеке стакасто сэредицятне редить асатыкст. Эдь вейкеяк пандус ланга Д.А.Орлов ськамонзо эзь кузеве. Паро, маласонзо ульнесть лездыцят.
Дмитрий Александрович Орловонь валонзо коряс, неень шкане теевиця од объекттнэсэ, сехте пек спортивной комплекстнэсэ, течи ули весемесь стакасто сэредицятнень тов понгомаст коряс. А вана сеть зданиятнесэ, конат теезельть 10-20 иеде икеле, инвалидтнэнень ютавтома ламо вийть. Сыненст, кода свал, аволь ансяк арсема седе, кода совамс те эли тона таркантень.
Теке шкасто Д.А.Орлов ёвтась покш сюкпря Мордовия Республикань Прявтонтень В.Д.Волковнень ды МР-нь Правительствань Председателентень В.Ф.Сушковнень инвалидтнэнь ламо лия кевкстемаст ды энялдомаст топавтоманть кисэ.
Рейдэнь чистэнть ванкшновиця асатыкстнэде кортамсто сон тешкстась, те стакачись токи аволь ансяк сынст, истя жо вишка эйкакш марто аватнень, ды весе сеть ломантнень, кинень эряви максомс лезкс.
Мордовия Республикасо ОНФ-нь региононь исполкомонь прявтось Н.А.Сайгачёва истя жо вейсэндявсь неть арсематнес ды поладсь:
– Течи пшкадтяно республикань предпринимательтненень, штобу сынь явовольть мель пандустнэнень ды тердемань кнопкатненень. Те кевкстеманть коряс ютавтомс толковамот важодицяст марто, муемс ды кармавтомс ответственной ломань, кие бу куроксто вастовлизе инвалидэнть ды лездаволь теемс сонзэ тевенть. Истя жо пшти вановт ало кирдемат пандусонь теицятнень важодевксэст. Строямстост топавтомс весе норматнень ды вешематнень. Виде, зярс эште стакачить улить, ансяк сынь витевикст, – мерсь Наталья Алексеевна.
Валентина КЕЧАЙКИНА