Четверг, мая 06, 2021
Важное


Аволь умок Саранск ошонь мэрэнть П.Н.Тултаевень кедьсэ ютавтозель промкс, козонь сакшность ошонь райононь администрациянь прявттнэ, жилищно-коммунальной хозяйствань, домоуправлениянь прявттнэ, сетне, кить вадрялгавтыть-шождалгавтыть ошонь ломантнень эрямост.
Промкссонть Саранск ошонь райононь администрациянь прявттнэ вейке омбоце мельга ёвтнесть седе, кода районтнэсэ важодить жилищно-коммунальной хозяйстватне, кода телентень анокстасть эрямо кудотнень мельга ваныцятне, весе-аволь кудотнес максозь лембесь, ды, нама, электричестванть кисэ долктнеде, весе-аволь эрицятнестэ пандыть максозь услугатнень кисэ, нурькинестэ, кодат тевть ютавтовить сетнень коряс, кинь покш долкост максовиця услугатнень кисэ.
Промкссонть пек шназельть «ЖЭК № 18» УК ООО-нь важодицятне, конатнень прявтсо С.А.СЮВАТКИН.



Сергей Александрович – коллективень алкуксонь прявт. Сон зярдояк кинь лангскак вайгель а кепси. Мекевлангт, лезды сыненст важодемань условияст вадрялгавтомасо. Сеть кудотнес, конатне кемекстазь «ЖЭК № 18» УК ООО-нть мельга, аравтозь неень шкань оборудования, кельме ды пси ведень трубатне кшнинсетнестэ полавтозь полипропиленовойс.
Тешкстасынек, С.А.Сюваткин жилищно-коммунальной отраслясонть важоди малав кемнилее иеть. Те шканть перть Сергей Александрович теевсь аволь ансяк коллективень паро азорокс, истя жо эрицятненень лездыцякс. Сон кинень алтась мезе теемс, сень топавтсы.

– Сергей Александрович коллективенть эли лезкс мельга тензэ пшкадицянть мелявксонзо ютавтсы седейганзо, – ёвтни «ЖЭК № 18» УК ООО-нь юристэсь И.С.Вачаева. – Невтемга, аволь умок сонензэ лезкс мельга пшкалесь Октябрянь 50 иетнень проспектсэ эрицясь. Сонзэ манизь кавто алюхатне. Мерсть, састь домоуправлениясто ведень счётчикень полавтомо. Лиссь истя: а ярмакт арасть, а счётчикть.
Теде мейле С.А.Сюваткин чинь перть апаро ёжосоль лисезь тевденть…
Сергей Александровичень ёвтнеманзо коряс, «ЖЭК № 18» хозяйствась теезель 2018 иень февралень 1-це чистэ. Тесэ важодить 18 инженерт, зярыя слесарть. Предприятиянть мельга кемекстазь Поповонь, Ульяновонь, Комаровонь, Титовонь, Щорсонь куротнень, Октябрянь 50 иетнень проспектэнь кудотне. Весемезэ 52 кудот.

– Минь весементь тейтяно, мельганок кемекстазь кудотнесэ эрицятне авольть сода кодаткак стакачить, – ёвтни «ЖЭК № 18» УК ООО-нь прявтось С.А.Сюваткин. – Сынст пельдеяк учотано паро тевть – шкастонзо пандовлизь ЖКУ-нь кисэ ярмактнень. А мезть сёпомс, улить истят, кить зярыя ковт а пандыть. Те монь пек ацирьгавты. Кудонь се квартирантень, косо азорось а панды эрямо тарканть кисэ, а максови электричества. Кучнетяно сёрмат, косо толковатано маласо шкасто канализациянть пекстамодо. Те тевенть теемстэ мельсэ кирдтяно РФ-нь Правительстванть «О предоставлении коммунальных услуг собственникам и пользователям помещений в многоквартирных домах и жилых домов» постановлениянть, косо кортави: се, кие шкастонзо а панды коммунальной услугатнень кис, корязонзо примавить эрьва кодат мерат.

Истя, эрицятнень пельде «ЖЭК № 18» ООО-нь долкось весемезэ малав колмо миллионт целковойть. Эсь олясо пандозь 315577 целковойть, судебной приставтнень вельде саезь 233035,56 целковойть.
Эрицятнень кедьстэ долконь саемасонть покш таликазо И.С.Вачаева юристэнть.

– Аволь ансяк мон те тевенть топавтынь, – ёвтни Ирина Сергеевна, – теньсэ весе коллективенть таликазо. Паро се, долкось аламодо киртявсь. Эдь минь ярмактнень варма мельга а ёртнетяно. Сынст лангс «Жилье и городская среда» национальной проектэнть коряс вадрялгавттано кудо вальмалкстнэнь, лия мезенть.
Тешкстасынек, «ЖЭК № 18» УК ООО-нь прявтонть С.А.Сюваткинэнь кеме нежензэ – прявт инженерэсь С.В.Мордасов, мастертнэ Н.Б.Роднова, Е.В.Беззубова, диспетчерэсь О.А.Андрияшкина, экономистэсь Е.В.Алимаева, энергонадзоронь прявтось Д.В.Власов, инженерэсь А.А.Усанов.

Вана диспетчерэсь О.А.Андрияшкина жилищно-коммунальной хозяйствасонть важоди аволь умок, малав колмо иеть. Коллективенть марто кель-вал мусь сеске.
– Мон тей важодеме сынь МВД-нь Нижегородской академиянть прядомадо мейле, – ёвтни Олеся Анатольевна. – Ды овсе а янксян. Тесэ важодицятне весе паро ломанть, прянь а покшкавтницят, вейке омбоценень лездыцят.

Слесартнень ютксто пек явовить Владимир Пиняскин, Александр Харчулин, Александр Митрашин.
– Содатано, течи слесартне аволь истят, кодат ульнесть икеле – «пиже гуень» вечкицят, мельде-валдо важодицят. Течи слесартне прянь а покшкавтницят, эсь тевень парсте содыцят ды вечкицят, – ёвтни С.А.Сюваткин.

…Октябрянь 50 иетнень проспектэнь 4 № кудонь эрицятне мельспаросот. Тезэнь строязь од турникет. Эрицятнень ёжонь витицятне – «ЖЭК № 18» УК ООО-нь важодицятне. Ульяновонь куронь 73 ды 73а кудотнес теезь од латот, Комаров лемсэ куронь 9 № кудонть вальмалов аравтозь муськемань костямо тарка.
Нурькинестэ меремс, «ЖЭК № 18» УК ООО-нь важодицятне бажить весе теемс эрицятнень лезэс. Сынь важодить вейке омбоценень лездазь, неень шкань вешематнень лувсо.

Пётр ЗИНОВЬЕВ
Фототне: Эдуард Ретунский

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».