Пятница, марта 29, 2024
Важное

Россиянь Федерациянь Президентэнть  Владимир Путинэнь 647 № Указонть коряс сентябрянь 21-це чинь 9 чассто яволявтозель частичной военной мобилизациядо. Теке жо чистэнть МР-нь Пресс-центрасо пурназель брифинг. Журналисттнэнь марто вастовкшность МР-нь Правительствань Председателень полавтыцясь Александр Герасин ды республикань Военной комиссарось Игорь Тихомиров. Максовсть толковамот частичной военной мобилизациянь кевкстематнень коряс.

 

«Россиянь Федерациянь Президентэнть Указонзо коряс сентябрянь 21-це чистэ Мордовия Республикасо яволявтозель частичной мобилиациядо, – мерсь Игорь Тихомиров. – Максан приказ запассо весе офицертнэнень, прапорщиктненень, мичмантнэнень, сержанттнэнень, старшинатненень, солдаттнэнень ды матростнэнень, конатне свалшкане эрить Мордовия Республикасо ды конатнень ули мобилизациянь кармавтомаст эли састь тенст повесткат Мордовия Республикань муниципальной образованиятнень военной комиссариаттнэстэ, повесткасо кемекстазь шкастонть самс военкоматс. Бути кинень повесткат эзть са, мезеяк а учомс, теемс мобилизациянь кармавтоматнень коряс.

Запассо ломантненень, конатне Мордовия Республикасо нурька шкас, куроксто туема свалшкань эрямо таркатнес ды молема пункттнэс, конатне тешкстазь мобилизациянь кармавтоматнесэ, бути те а топавтови – воинской учётсо аштемань военной комиссариаттнэс.

Запассо аштиця офицертнэнень, прапорщиктненень, сержанттнэнень, солдаттнэнень ды матростнэнень, конатнень арась мобилизациянь кармавтомаст ды тенст эзть максово повесткат, воинской учётсо аштемань коряс военной комиссариатсо толковамс эрямо таркасто туемань кевкстематнень.

Запассо аштиця офицертнэнень, прапорщиктненень, мичмантнэнень, сержанттнэнень, солдаттнэнень ды матростнэнень, конатне тердевить мобилизациянь коряс, мартост эряви саемс документт ды повесткатнесэ тешкстазь эрявиксэнть».

Теке марто, сеть ломантненень, конатне ламо шкань перть командировкасот, эряви стямс воинской учётс неень улема таркасост. Роботань максыцясь жо, бути эряви, тердьсы важодицянть командировкасто, бути сонзэ шкась колмо ковдо седе ламо.

Мордовия Республикань Военной комиссаронь Приказсонть истя жо тешкстави, организациянь прявттнэнень организационно-правовой форматнень ды собственностень ёнкстнэнь лангс апак вано, эряви олякстомтомс тердевиця ломантнень важодемадонть, пандомс тенст целанек зарплатанть ды лездамс повесткатнесэ тешкстазенть топавтомасо. Истя жо организациятнень прявттнэнень улемс анококс максомс эрявикс автомобильной, кинь строямонь, сталмонь кепсемань ды лия техника военной комиссариатонь кемекстамонть коряс.

Ломантне, конатне повесткань коряс эзть са тешкстазь таркатнес, ды организациятнень прявттнэ, конатне эзизь топавто Приказсо тешкстазь кармавтоматнень, кармить кандомо ответственность Россиянь Федерациянь законодательстванть коряс.

Мордовия Республикань Военной комиссарось Игорь Тихомиров тешкстызе, мобилизациянь коряс военной службанть эйстэ отсрочка максови:

-Россиянь Федерациянь Правительстванть кемекстамонзо коряс бронь мартотненень;

-военной службань ютамонтень а нолдавить шумбрачинь коряс – 6 ковс;

-свалшкане якить тетяст, аваст, нист, мирдест, леляст, сазорост, покштяст, бабаст эли семияс саезенть мельга, конатнень лавшо шумбрачист ды Медико-социальной экспертизань федеральной учреждениянть кемекстамга сынст марто свал эряви аштиця;

-кемгавксово иеде седе вишкине ялаксонть эли сазоронть туртов ловови опекунокс эли попечителекс, бути арасть лия ломанть, конатне закононь коряс кармить кирдеме неть ломантнень;

-конатнень 16 иеде седе вишкине ниле ды седе ламо эйкакшост эли ававтомо трить 16 иеде седе вишкине вейке ды седе ламо эйкакшт;

-сеть, кинь аваст, сындест башка, эштё кавксо иеде седе вишкине ниле ды седе ламо эйкакшонзо ды три сынст мирдевтеме;

-Федерациянь Советэнь члентнэнень ды Госдумань депутаттнэнень.

-ВУЗ-со очна тонавтниця студенттнэнень.

Игорь Тихомиров истя жо тешкстызе, Россиянь Федерациянь Уголовной кодексс совавтозь «военное положение», «военное время» ды «мобилизация» ёвтамотне. Эсь мельсэ полонс прянть максомга арсеви олячинь саема 3-10 иес, саламонть-грабамонть кисэ – 6-15 иеть, эсь олясо частенть кадоманть эли повесткань коряс а самонть кисэ – 10 иеть.

Мобилизациянь коряс весе тердезетненень кармить пандовомо зняро ярмакт, зяро пандови контрактонь коряс военнослужащейтненень, конатне эсь службаст ютыть специальной военной операциянь таркатнесэ. Истя, рядовойтненень ды матростнэнень пандовить 200 тёжадо седе ламо целковойть, офицертнэнень ды «лейтенант» звания мартотненень – 234 тёжат целковойстэ саезь ды седе ламо. Теке марто, мобилизациянь коряс тердезетненень максови весе социальной лезксэсь, конась явови военнослужащейтненень-контрактниктненень.

Военной службадо ютамонь контрактонть, конань кемекстасы военнослужащеесь, карми важодеме частичной мобилизациянть прядовомс, РФ-нь Президентэнть Указсо кемекстазь зярыя ёнкстнэде башка.

Теке марто тешкстама, республикасонть ды весе масторонть келес важоди мобилизациянь коряс «пси линия». Телефононь номерэсь – 122. Сонзэ коряс мереви максомс талновтыця кевкстематнень.      

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».