Неть читнестэ минек республикасто кучозель гуманитарной лезкс специальной военной операциянь таркатнес. Сонзэ пурнызь МР-ва Народной фронтось, предпринимательтне ды зярыя покш предприятиятне.

– Минь пурнынек ярсамопельть, гигиенань средстват, надобият ды, нама, радиоэлектронной средстват, конат ванстыть дронтнэде. Весементь тейтяно командиртнэнь вешемаст коряс. Мезе эряви – сень кучтанояк. Ней вана путынек куличтькак, эдь аволь умок ульнесь Инечись. Теде башка, цёратне бажить теемс Лисичанскоень эйкакштненень футболсо налксемань пакся, эряви видемс газононь тикше, – кортась МР-ва Народной фронтонь сопредседателесь Игорь Еремкин.
Эряви меремс, аволь васенцеде лезкс макссть МР-ва Специальной связень управлениянь важодицятнеяк. Кода тешкстызе Управлениянь прявтось Николай Живайкин, сынь сеедьстэ ардтнить СВО-нь зонав ды од регионтнэс.
– Арсетяно минек цёратненень шумбрачи ды седе куроксто велявтомс кудов изнямо марто! – кортась Николай Викторович.
Истя жо посылка пурнасть Рузаевкань 17 № школань 7 «А» классонь тонавтницятне. Те классонть тонавтни Рома Тимофеев. Мелят сон кучнесь фронтов сёрма, конась пек тусь мельс «Рубин» позывноенть марто полконь командирэнь полавтыцянтень. Сон сёрмадсь каршо вал ды кучсь цёрынентень казне – котелок. Рома пек кецнесь. Ней класснэк пурнасть медикаментт, Рома путсь ваксозост эсензэ пельде башка казне.
– Цёрам карми кецнеме, зярдо посылкась пачкоди тов, косо эйсэнзэ учить, – мерсь Романь авазо Ольга Тимофеева.