Неть читнестэ Мордовия Республикань Пресс-центрасо ютась пресс-конференция, конасонть региононь СМИ-нь журналисттнэнень евтневсь минек республикасо миграциянь тевтнеде. Мероприятиянь спикерэкс ульнесь Мордовия Республикава внутренней тевень министрань полавтыцясь Борис Мандрус.
«Миграциянь тевтнень ванномась невти, сыця ды регионсонть улиця омбо масторонь эрицятне ютазь иенть коряс ламолгадсть малав 10 проценттс. Неень шкане республикасонть лововить малав 7,5 тежат омбо масторонь эрицят, – пачтясь Борис Мандрус. – Бути кортамс самонь бажамотнеде, нама, кавто сехте покш группатне – те омбо масторонь тонавтницят ды важодиця мигрантт».
Тедеде Мордовиясо максозь важодемань малав 3000 патентт. Текень пингстэ кассь сынст рамамонть кисэ налогонь покшолмась – бути мелят пачтязь 100 миллионт целковойть, ней уш малав 125 миллионт. Теке шкане кавксть ламолгадсть аволь планонь коряс ванкшноматне, конатне ютавтовить юридической лицятнень ды башка предпринимательтнень коряс. Те ветясь миграциянь законодательствань коламотнень кис малав колмоксть штрафтнень касомантень. Тедеде истят штрафтне уш путозь 23 миллионт целковойтнес, пеледест ламотне уш саезь.
Республикасонть контролень-профилактикань тевтнень ютавтоманть лувсо редязь 1,5-ксть седе ламо административной правань коламот миграциянь линиянть коряс – 1600 седе ламо. 20% седе ламо кармасть омбо масторонь эрицят, конатненень эрьва кодамо тувталонь коряс киртязельть РФ-со улемань шкатне. Те малав 500 ломанть. Теде башка, омбо масторонь 220 эрицят кадызь минек масторонть административной ды лия правань коламотнень коряс, истя жо тусть икеле судязтне. Депортировазь 140 омбо масторонь ломанть, сермадстозь 500 ламо амеремат Россиянь Федерациянь территорияс а нолдамодонть.
Тедеде Мордовиясо тешкстазь уголовной 10 тевть, конат сюлмавозь омбо масторонь эрицятнень фиктивной регистрациянть, истя жо аволь закононь коряс миграциянь тееманть марто. Тешкстави закононь коламотнень ламолгадомась, конатнень тейнить омбо масторонь эрицятне минек республикасо. Те касомась сюлмавозь седе пек наркотиктнень марто. Региононь МВД-нь профильной подразделениянь важодицятне шкастонзо лоткавтсть наркопреступлениятнень топавтомань бажамотнень, наркотиктне саевсть, эзть понго оборотс. Эряви тешкстамс, зыянов тевтне, конатнень теизь омбо масторонь ломантне, республикасонть апак регистрирова.
«Миграциянь тевтне Мордовиясо аштить свалшкань лувсо. Тень туртов пек ламо теить кода правительствань органтнэ, истя жо властень ды управлениянь органтнэ, конатнень марто минь кирдтяно кеме сюлмот», – тешкстызе пресс-конференциянть прядовомсто Мордовия Республикава внутренней тевень министрань полавтыцясь.