Неть читнестэ Мордовиянь Технопарксо ютавтовсь пресс-конференция, конась алтазель «Монь Мордовиям» республикань кадрань проектэнтень яволявтоматнень максомань кампаниянь невтевкстнэнь ёвтамонтень.
Мероприятиясонть ульнесть Мордовия Республикань Прявтонь тевтнень топавтыцясь Артём Здунов, Мордовия Республикань Общественной палатань председателень полавтыцясь, проектэнь Наблюдательной советэнь председателесь Наталья Долматова, РФ-нь Федеральной Собраниянь Федерациянь Советэнь МР-нь Правительстванть пельде членэсь Сергей Кисляк, проектэнь оценкань мероприятиятнень блоконь ветицясь Дмитрий Лисицын, «Монь Мордовиям» проектэнь участникесь Анастасия Гришнева.
«Монь Мордовиям» проектэнь васенце этапонь прявт невтевкстнэде кортамсто Артём Здунов тешкстызе, яволявтсть 6 047 участникть. Сон явсь мель сень лангс, проектсэнть примить участия аволь ансяк Мордовиянь, истя жо Российской Федерациянь лия регионтнэнь ды натой лия мастортнэнь эрицятне. Мордовиясо эрицятнень эли сонзэ марто сюлмавозтнень пельксэсь пек покш – малав 90%, ансяк улить истят, кинь республиканть марто мезеяк а сюлми, сынь неить тесэ касомань тарка, эсь потенциалост панжомань ёнкс.
«Проектэнь участниктне невтить Мордовиянь 156 эрямонь пунктт, Россиянь 56 регионт ды омбо масторонь 5 государстват», – мерсь Артём Здунов.
Наблюдательной советэнь председателесь Наталья Долматова кортась участниктнень иетнень ды опытэнть коряс: «Те невти, од участниктне тонадыть мезес-бути опытной коллегатнень пельде, сетне жо – кармить содамо, кодат мельть-арсемат ёвтыть управленецтнэнь од поколениясь. Арсян, те лезды республиканть виевгавтомантень».
Сон башка тешкстызе тейтерь-аватнень ёрокчист. «Монь Мордовиям» проектсэнть, лия регионтнэсэ ютавтовиця истят жо проекттнэнь коряс, тейтерь-аватнень сехте покш пельксэсь – 45,1%: «Монень маряви, те пек вадря. Улить ёнкст, конатнесэ сехте вадря прявтокс свал ульнесть аватне. Невтемакс, шумбрачинь ванстомась, тонавтомась ды истя седе тов. Арсян, аватне совавтыть од вановт ды тевть эрямонь «церань» ёнкстнэс», – тешкстызе Наталья Долматова.
Сергей Кисляк пурнавозтненень пшкадсь онлайн-форматонть вельде. Эсь кортамосонть тешкстызе, ней Мордовиянть, Россиянть ды минек обществанть икеле аштить зярыя кевкстемат, конат сюлмавозь эрямонь эрьва кодат ёнкстнэнь марто. Ды мерсь, неть кевкстематнень витемаст туртов эрявить васняяк ломанть – неень шкань превей специалистт, конат маштыть аволь ансяк видестэ чарькодеме тевтнень ды ёвтамо решеният, истя жо маштост неть тевтнень совавтомо эрямос. Сон ёвтась кемема, эскелькстнэ, конатнень ёвтасызь ды топавтсызь проектэнь участниктне, кандыть лезэ ды кастсызь региононь экономической стабильностенть, истя жо вадрялгавтсызь ломантнень эрямост аволь ансяк Саранскойсэ, истя жо Мордовиянь весе оштнесэ ды велетнесэ.
Проектэнь оценочной мероприятиятнень блоконь ветицясь Дмитрий Лисицын ёвтнесь, прядовсь яволявтомань максомань кампаниянь омбоце пельксэсь – эссетнень примамось. Сонзэ валонзо коряс, седе тов карми ютавтовомо дистанционной тестированиясь, конась аламодо явови «Лидеры России» федеральной проектэнь тесттнэнь эйстэ.
«Участниктненень эряви ютамс вейке комплексной тест. «Лидеры России» проектэнь тесттнэнь эйстэ сонзэ яви се, питнесь карми максовомо участниктнень аволь содамочитненень, а сынст интеллектуальной потенциалонтень, кулятнень марто важодеме маштомантень. Весе заданиятне арсезь истя, штобу решавост опытной управленецтнэнень ды од специалисттнэнень».
Дмитрий Лисицын кармавтсь участниктненень покш ответственность марто топавтомс проектэнь весе заданиятнень, ледстизе, сынст эйстэ ашти региононть вандынь чизэ ды эсест сы шкань эрямост.
Кода тешкстызе Анастасия Гришнева, «Монь Мордовиям» проектсэнть эсь содамочитнень ды ёрокчитнень невтемантень сонзэ кармавтызе васняяк се, штобу эстензэ ваномс, мезес улить ды сатыть виензэ. Теке марто тейтересь алкукс арси сеть мелявтовтыця кевкстематнень лангсо, конат улить республикасонть.
«Проектэнть прявт аравтлувозо – вадрялгавтомс республикасо эрямонть. Те весемесь ламосо ашти минек эйстэ. Мон явинь мель проектэнтень ды кемекстыя, мекс бу а варчамс», – тешкстызе Анастасия Гришнева.
Ледстясынек, «Монь Мордовиям» республикань кадрань проектэсь ушодовсь 2021 иень эйзюрковонь 3-це чистэ, арсеви прядомс аштемковсто. Участниктне, конат ютасызь кочкамонь пелькстнэнь ды лисить финалс, совавтовить управленческой кадратнень региононь резервантень, сехте вадрятненень максовить важодема таркат Мордовиянь эрямонь эрьва кодат сфератнесэ управлениянь уровентнесэ, натой республикань правительствасо. Проектэнть коряс седе домкасто ёвтневи моя-мордовия.рф сайтсэнть.
Юлия Еремина
Фотось Эдуард Ретунскиень