Неть читнестэ Покш Березникень райононь Марьяновка велесь тешкстызе чачома чинзэ. Те кезэрень велесь саи ушодкс 1859 иестэ. Историктнень пачтямост коряс, самай се шкантень тосо аноколь винокуренной заводось (1902 иестэ ушодсь важодеме Владимиро-Марьяновской спиртзаводось).
Теевезь коень коряс те кенярксчинтень пурнавкшность ламо ломанть. Инжетне ульнесть кода райцентрасто, истя те ёнксонь лия велетнестэ. Спортонь вечкицятне сакшность весе республикастонть.
Велень чачома чинь тешкстамонь кенярксчись ушодовсь эрямонь шумбра лувонь мероприятиянь ютавтомасто. Мордовия Республикань Олимпийской резервань спортивной школанть вийсэ анокстазель шожда атлетикань коряс пелькстамо. Сонзэ эйсэ ёрокчист невтизь республикань ламо районтнэстэ кода ветерантнэ, истя од ломантнеяк. Весе сынь мазый оршамопельсэ лиснесть велень клубонть икелев. Сынст пси цяпамосо вастызь кенярксчив сыцятне.
Марьяновкав сыця почётонь ломантнень ютксо ульнесть спортонь заслуженной мастерэсь, Европань ды мирэнь чемпионкась, МР-нь СШОР-нь прявтонь полавтыцясь Елена Лашманова, спортонь заслуженной мастерэсь, мирэнь чемпионось, Мордовиянь Почётной гражданинэсь Сергей Кирдяпкин, Покш Березникень ДЮСШ-нь прявтось, спортонь ветеранось, шожда атлетикань коряс ламоксть чемпионось П. С. Прокин, «МордовАлкоПром» ООО-нь генеральной директоронь советникесь В. А. Кипаев, Марьяновкань средней школань прявтось Г. Н. Кипаева, райононь Благочинноесь, протоиереесь о. Евгений, Марьяновкань церьковань настоятелесь о. Виктор.
Марьяновкань эрицятненень ды инжетненень шумбракстнемань вал марто васняяк пшкадсь Покш Березникень муниципальной райононь социальной кевкстематнень коряс прявтонь полавтыцясь О. В. Губанищева. Ольга Валентиновна тешкстызе истят кенярксчитнень эрявиксчист, седеяк пек – од ломантнень туртов.
– Паро койтнень-кирдатнень ванстомась, тиринь таркатнень вечкемась лезды кастомс алкуксонь патриотт, – мерсь Ольга Валентиновна.
Ольга Губанищевань валонзо коряс, спортонь пелькстамотне васняяк кортыть эрямонь шумбра лувонть ветямодо, од ломантнень вишка пингестэ тенень тонавтомадо. Неть пелькстамотне алтавсть СВО-нь участниктненень, тиринь масторонь ванстыцятненень.
Ламо лембе валт ды паронь арсемат пелькстыцятнень лемс ёвтась Елена Лашманова. Сон истя жо пачтясь шожда атлетикань сеть участниктнеде, кить ламоксть сакшность виест варчамо те кезэрень велентень. Сонзэ валонзо коряс, тесэ свал пелькстыть кода ушодыця, истя республикань ды масторлангонь келес содавикс спортсментнэ.
– Ули кинь лангсто саемс пример ды кинь кондямокс улемс, – мерсь Елена Лашманова.
Марьяновка велень поселениянь прявтось О. В. Симонова, велень эрицятненень седейшкавань поздоровонь ёвтамодо мейле, арсесь весенень шумбрачи ды од эскелькст икелев. Ольга Викторовна тешкстынзе сынст велень эрицятнень истят паро ёнкстнэнь, кода тиринь таркантень вечкеманть, сонзэ седе мазыекс теемс бажамонть, общественной тевтнеде ве ёнов акадовоманть.
Кода мерсь Ольга Викторовна, сынст велень эрицятне эрьва тевсэ докат. Саемс куш те кенярксчинть. Сынь седейшкава ушодсть лездамо васень чистэнть саезь. Марьяновкань волонтёртнэ сынсь пидесть сывель марто тантей каша ды анокстасть пси чай.
...Те велесэнть а стувтыть специальной военной операциянь участниктнеде. Вана те чистэнтькак, Россиянь Гимнанть кунсоломадо мейле, ульнесь Чатьмонемань минута. Истя, весе пурнавозтне ледстизь сынст ёнкссо чачозенть-касозенть Василий Агейкинэнь. Сон ульнесь шожда атлетикань коряс пелькстамотнесэ свалшкань участник. Истя жо ледстизь Геннадий Хромовонь ды Николай Гороховонь валдо лемест.
Шкань ютазь од спортсментнэнень мерезель анокстамс пелькстамотнес. Те шкане сценанть лангс лиснесть Покш Березникень Культурно-досуговой центрань артисттнэ. Эсь ёрокчист невтизь артисттнэ Ю. Ворожейкина ды А. Смольянов. Эзть кадово ве ёнов Марьяновкань клубов якицятне, киштеме-морамо маштыцятне. Сынь вейсэ культорганизаторост А.Клякин марто казсть кенярксчинь ёжомарямо весе пурнавозтненень.
Кода свал эрси Велень читнень ютавтомсто, тешкстазельть казнесэ сеть, кить ветить покш общественной робота неень а шожда шкастонть. Марьяновка велень поселениянь прявтось Ольга Симонова башка мель явсь волонтёронь группантень. Теньсэ покш путовксозо тосонь депутатонть Т. Н. Калининань, конась сонськак сови райононь волонтёронь группантень ды лиятненьгак тов вети.
О. В. Симоновань валонзо коряс, сынст велень эрицятне свал васенцеть куш кодамо гуманитарной лезксэнь максомсто, госпитальсэ улезтненень, эли жо кодамояк кажос понгозтненень лездамсто. Истя жо аволь вишкине таликаст школасо тонавтницятнень окопонь штатолонь ды ванстыця алтымань теемасо. Теде башка, сынь сёрмадыть сёрмат, теить артовкст, пурныть посылкат солдаттнэнень. Эйдень кужов якицятнеяк а кадновить ве ёнов неть тевтнестэ.
Виде, ламось ашти сынст тетятнеде-аватнеде ды школасо тонавтыцятнеде. Башка тешкстазельть педагогонь коллективтне, конатнень прявтсо Г. Н. Кипаева ды В. А. Манякина. Нать, а стяко те чистэнть неть коллективтненень максозельть казнеть.
Талновтыця шкакс ульнесь спортсо пелькстыцятнень мероприятиясь, косо виест невтизь весе, кинь ульнесь мелезэ. Судьятненень а шождаль кемекстамс сетнень, кить васенцекс пачкодсть финишентень. Спортсментнэ куроксто ютызь эсест кист ды учость невтевкстнэнь.
Ушодовсь казнень максомань шкась. Иень коряс группатнес совицятнень ютксто кочказельть изницятне ды призёртнэ. Сынь мельга-мельцек лиснесть почётонь пьедесталонть лангс казне мельга. Те иень кизэсь пек опаняль ды псиль. Сень ловозь, што велетнесэ неень шкане улить кадозь кудот, перькаст пурнавсь ламо коське тикше. Марьяновкасо кирвазематнень анолдамонтень лездась добровольной дружинась. Ольга Викторовна сюкпрянь валт ёвтась те велень пожарной дружинас весе совицятненень, башка тешкстынзе Д. Н. Лизиковонь, Е. В. Симоновонь, К.И. Ларькинэнь, кить парсте топавтсть сынст лангс путозь тевенть. Истя жо эрьва тевсэ свал анок лездамс А. И. Калинкин. Сон ваны китнень ды лисьмапрянть мельга.
Ламо лембе валт велень поселениянь прявтось ёвтась тосонь эрицятненень, свалшкань лездыцятненень Г. А. Савоськиннэнь, Е. А. Сергейчевнень, О. А. Ступиннэнь, Н. Н. Симоновнень, Н.Н. Батраковнень, Т. Н. Ершовнень. Сыненст те чистэнть максозь Благодарственной сёрмат ды казнеть.
Потмура чинть лангс апак вано, весень ёжомарямост паролгавтызь моротне, киштематне, спортонь кубоктне, паро арсематне ды лембе мизолкстнэ. Нурькинестэ, кенярксчись удалась!
Валентина Юдина