Виталий Картышкинэнь лемензэ эрзянь ловныцятне парсте содасызь ды марсизь. Сон уш школасо тонавтнемстэ саезь кармась сёрмадомо ёвтнемат. Произведениянзо сеедьстэ лиснесть «Чилисема» эйкакшонь журналсо. Сёрмадомо сон полады нейгак. Келезэ чарькодевикс, ванькс, ловнови шождасто ды ловномадо мейле марят кодамо-бути тансть. Несак «Сятконь» од номерсэ фамилиянзо ды свал кецнят: ули мезе ловномс.
Вана неть читнестэ Рузаевкань типографиясо нолдазель од цёранть «Ютан велева» васенце книгазо! Авторось зярс эзизе нее, эзизе сайне кедьс. Ансяк курок, кемтяно, книгась кецявтсы кода эсензэ, истя ловныцятненьгак. Видьстэ меремс, мон умок ванан Виталиень творчестванзо мельга. Бути ловномс икелень сёрмадовксонзо, кадык лисстькак сынь, зярдо сон школасо тонавтницяль, эйсэст ули се, мезесь талновты ловныцянть, киньгак а кады мельтеме. Виталий сакшнось тенек редакцияв инжекс, ды минь мельспаросо кортнинек. Теевтяно мартонзо содавиксэкс.
– Мон чачинь 1991 иестэ Отяжелень райононь Ало Чукало велесэ. Эйкакш пингеде ледстнеман ансяк валдот ды лембеть. Сестэ кияк эзь марсе Интернеттэ, минек вишка шканок ютась уцяскавсто: тельня эрьке лангсо налксинек хоккейсэ, пандопрясто кирякстнинек тикшеде пештязь кескав лангсо, пек вечкинек футболонть. Школанок ульнесь ташто, чувтонь, вишкине (ней сон калавтозь). Тосо тонавтнесть 30 эйкакшт. «Ожо пусмо» ёвтнемасон ледстнян, кода яксинек якстерькаень таргамо, анокстынек Сёксень балс. Тетям ды авам роботасть школасо тонавтыцякс Авам, Вера Михайловна, ульнесь начальной классонь тонавтыцякс, ветясь немецень кель, морамонь кружок. Тетям, Валентин Николаевич, ветясь география, история. Чукалонь школасо сон пурнакшнось пек паро музей. Ней экспонаттнэ ды материалтнэ ванстовить клубсо. Мейле семиянек туинек эрямо Ицялбуев. 10-11-це класстнэнь прядынь Ицялсо. Ансяк те шкас ледстнян велень вишка школанок, косо эрьвантень явсть покш мель, ульнесь оймень лембечи. Чукалосо эрясть покштям-бабам, кудост те шкас ашти, – ледстни Виталий.
– Виталий, кода ушодыть сёрмадомо?
– Литературас пачтимим эйкакшонь сельмень сявадомась. Весть «Чилисемасо» лиссь Чукалонь тейтерькань сёрмадовкс. Кода те вастозель школасонок! Алкуксонь события. Саинь мель монгак мезеяк сёрмадомс ды кучомс журналс. Котоце классо тонавтнемстэ васня лиссь стихем, мейле – «Аксун ялга» вишка ёвтнемам. Кармасть тердтнемень Саранскоев литературань семинаров. Эрьва ие ардтнинь, свал анокстынь од сёрмадовкст. Тосо вастневинь эсень кондят ялгатнень марто, эрьвась мезе-бути сёрмалесь.
– Кие ульнесь теть лездыцякс ды превс путыцякс?
– Сёрмадомо кияк эзь кармавто, эзь ванкшно «шедевран». Сёрмалинь ды кучнинь. Витнемадо мейле сынь лисильть журналсо. Паро валсо ледстнян Н. И. Ишуткинэнь, кона ветясь семинаронок. Сон путсь превс, лездась, пансесь нузяксчим. Кадык сёрмадовксот лавшо, тонськак чарькодят, ковгак а маштови. Сон ялатеке муиль мезень кисэ шнамс, ёвтамс лембе валт. Чевтестэ кортыль, мезе косо а истя, невтиль асатыкстнэнь ды виев ёнкстнэнь. Витнесы, кода эряви, ялатеке кадсы тонь прявт меленть. Ансяк ней чарькодят, кодамоль покш путовксозо од ломанень семинартнэсэ. Сонтемензэ тунь аволь истят улевельть неть промкстнэ. Мукшныль автобус, сайнилимизь экскурсияв. Сюкпря тензэ покш, свал кармавтсь а кадомс сёрмадома тевенть. Истя жо паро валсо ледстявлия А. М. Доронинэнь, минь мартонзо сеедьстэ вастневинек, кортнинек.
Виталий Картышкинэнь ёвтнематнесэ ламось саезь алкуксонь эрямосто. Геройтнень улить прототипест, ансяк лемест полавтозь. Апак полавто кадовсь Митряс паро ялганзо лемезэ, кона сеедьстэ понгони ёвтнематнесэ. «Ютан велева» книгантень совась вейке повестезэ, те сядодо ламо лопат (сон лиснесь «Сятко» журналсо). Кода мельстуезь тесэ невтевить велесэ ютавтозь шкась, ялгатне ды малавикстнэ! Те повестесь, теке мерят, эрьванть эрямосто саевкс. Геройтнень марто вейсэ понгат кизэнь пси читнес ды эрьва чинь тамашатнес. Сон вечки сёрмадомо валске марто, сэтьмечисэ. Васня теи теке сценарий, арсесынзе геройтнень лемест ды сюжетэнь линиянть. Од книганть лездась нолдамс МР-нь Прявтонь Администрациясь.
– Виталий, кинь вечкат ловномо писательтнень эйстэ?
– Вечкан ловномо эрьва кодамо жанрань книгат. Пек малавикст тень велень прозань сёрмадыцятне: Шукшин, Белов, Абрамов, Распутин, Астафьев. Классиктнень эйстэ вечкеви XIX-це пингень литературась. Тонавтнян пельдест. Мелезэнь тукшныть неень шкань автортнэяк. 2015 иестэ понгонинь «Таврида» весероссиянь образовательной форумонь литературань сменав. Мордовиясто якинек зярыя од ломанть. Мартонок вастовомо сакшность Россиянь содавикс писательть, морыцят. Теевинек содавиксэкс эрьва кодамо региононь од ломантнень марто, те шкас кирдтяно ялгаксчи.
Школанть прядомадо мейле Виталий Картышкин мольсь тонавтнеме Н. П. Огарёв лемсэ МГУ-нь филологиянь факультетэнь журналистика отделенияв. Вузонть прядызе 2013 иестэ. Седе тов служась армиясо, Екатеринбургсо. 2012 иестэ казевсь МР-нь Прявтонь премиясо, конась алтави од писательтненень.
Истя уш лиссь, мольсь важодеме школав, ютась одс анокстамо. Школав сась тонавтомо 2015 иестэ. Васня роботась Ицялбуень Ламбаськесэ, ветясь эрзянь кель ды литература. Ней колмоце ие важоди Ицялонь средней школасо. Васенце шкастонть, чарькодеви, стакаль. Мелявтсь ды кавтолдсь. Седе тов тонадовсь. Ней Виталий Валентинович вети рузонь кель ды литература 6-це «А», 6-це «Б» класстнэсэ ды 10-це классо; 2–7-це класстнэсэ – «Знай и люби родной язык» кружок. Сон 6-це «Б» классонь руководитель, косо 17 эйкакшт.
– Школань тонавтницятне эрьва кодат: кие бажи тонавтнеме, кие жо нузялгали. Мон сень кисэ, тесэ кадык пурныть эрявикс содамочить. Свал кортан, тонавтнемась – те стака ды эрявикс важодема. Кодат бу неень шкань технологият авольть уле, ялатеке сави важодемс, саемс информациянть, тонавтнемс. Вишкинетнень марто тевс нолдан налксемань ды пейдемань ёнкст. 6-це классонь программасо ламо част явовить кортамонть виевгавтомантень. Сёрмадтано сочиненият, изложеният, ковозонзо весть нолдатано стенгазета, косо лиснить сёрмадовксост. Кучнинек сынст «Чилисемав». Паряк, киньгак седейсэ вельми шкинемань сяткине, – ёвтни тонавтыцясь.
Лембе шкасто Виталий вечки ардтнеме васоло таркав велосипедсэ. Мазыйдеяк мазый пертьпельксэсь кецявты, максы оймень вийть. Свал учи пангонь кочкамо шканть. Юткошкасто малавиксэнзэ туртов ушосо пиди ярсамопельть: штюрьба, шурпа, плов, шашлыкть. «ВКонтакте» социальной сетьсэ од авторось вети «Ванан ды неян» группанзо, ков путни сёрмадовксонзо. Эряви меремс, улить сатышка ловныцянзо, конат вешить од произведеният, сёрмалить авторонтень ловнозденть мелест-арсемаст. Теде башка, сонзэ улить ламо ёвтнеманзо, конат апак нолда башка книгасо, сынь – велень эрямодо, студентэнь шкадо, эрьва кодат мизолкст. Ламот пшкалить тензэ, энялдыть нолдамс. Чарькодеви, неень шкане книгань нолдамось аволь шожда тев. Арсетяно тензэ топавтомс те тевенть, кадык васенце книганть мельга чачи омбоцеяк!
Ней од авторось важоди мизолксонь кондямо повесть лангсо.
Татьяна Маторкина