XIX-XX-це пингетнень чуросто вастневиця краеведческой изданиятне – А.С.Пушкин лемсэ Раськень библиотекань чуросто вастневиця книгань отделэнь фондонь сехте питней пелькс. Тосо ванстовить чуросто вастневиця ды питней 85 экземплярт. Весе изданиятне мелень явовтыцят ды эсь койсэст вейкинеть.
Краеведениянь коллекциясонть невтезь книгат, конат аштить покш сюпавчикс эрзянь-мокшонь ёнксонть тонавтнемасо: «Журналы очередного Пензенского губернского земского собрания» (1898 иесь), «Журналы Ардатовского уездного земского собрания, очередной сессии 1879 года» (1880 иесь) ды лиятне.
Книгатнень ютксо явовить земской управань, организациятнень, исполнительной комитеттнэнь, народной образованиянь отделтнэнь промкстнэнь изданиятне – отчёттнэ, доходонь ды расходонь сметатне, докладтнэ ды ламо лия мезе XIX-це пингень куншкавидьстэ саезь. Эйсэст пачтяви Орданьбуень, Темниковань уездтнэнь территориятнеде ды истя жо Симбирской, Пензенской, Тамбовской губерниятнеде.
Седе питнеекс лововить книгатне, конат лиссть Саранскойсэ Сыромятниковтнень типографиясо: «Каталог Саранской городской публичной библиотеки» (1898 иесь) ды «С юными паломниками в Пайгармский монастырь» (1909 иесь).
Покш питнейчи канды революциядо икелень «Господань минек Иисусань Христань Святой Евангелья» эрзянь кельсэ нолдавт книгась, кона лиссь Петербургсо Н.Гречень типографиясонть 1821 иестэ ды конань библиотекантень казизе 1940 иестэ Мордовской АССР-нь Верховной Советэнь Президиумонь Председателесь Иван Павлович Астайкин.
О.Шуляева,
А.С.Пушкин лемсэ Раськень
библиотекань
библиотекарь.